|
Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 5 | |
| 5:1 | Молитва иереміи пророка. Помяни, Господи, что бысть намъ: призри и виждь укоризну нашу: |
| 5:2 | достоянiе наше обратися къ чуждимъ и домы нашя ко иноплеменникомъ: |
| 5:3 | сири быхомъ, нѣсть отца, матери нашя яко вдовы. |
| 5:4 | Воду нашу за сребро пихомъ, дрова наша за цѣну куповахомъ: |
| 5:5 | на выя нашя гоними быхомъ, трудихомся, не почихомъ. |
| 5:6 | Египетъ даде руку, Ассуръ въ насыщенiе ихъ. |
| 5:7 | Отцы наши согрѣшиша, и нѣсть ихъ, мы же беззаконiя ихъ подъяхомъ. |
| 5:8 | Раби обладаша нами, избавляющаго нѣсть от руку ихъ. |
| 5:9 | Въ душахъ нашихъ носихомъ хлѣбъ нашъ, от лица меча въ пустыни. |
| 5:10 | Кожа наша аки пещь обгорѣ, разсѣдошася от лица бурей глада. |
| 5:11 | Женъ въ Сiонѣ смириша, дѣвицъ во градѣхъ Иудиныхъ. |
| 5:12 | Князи въ рукахъ ихъ повѣшени быша, старѣйшины не прославишася. |
| 5:13 | Избраннiи плачь подъяша, и юноши въ кладѣ изнемогоша. |
| 5:14 | И старцы от вратъ оскудѣша, избраннiи от пѣсней своихъ умолкоша. |
| 5:15 | Разсыпася радость сердецъ нашихъ, обратися въ плачь ликъ нашъ, |
| 5:16 | спаде вѣнецъ со главы нашея: горе намъ, яко согрѣшихомъ. |
| 5:17 | О семъ смутися сердце наше, о семъ померкнуша очи наши. |
| 5:18 | На горѣ Сiонѣ, яко погибе, лисицы ходиша. |
| 5:19 | Ты же, Господи, во вѣки вселишися, престолъ твой въ родъ и родъ. |
| 5:20 | Вскую во вѣки забываеши насъ, оставиши ли насъ въ продолженiе дній? |
| 5:21 | Обрати ны, Господи, къ тебѣ, и обратимся, и вознови дни нашя якоже прежде. |
| 5:22 | Яко отрѣвая отринулъ еси насъ, разгнѣвался еси на ны зѣло. |
