Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 3 | |
3:1 См.: 🔗Иез. 4:16 🔗Иез. 5:16 | Се, Владыка Господь Саваоѳъ отъиметъ от Иерусалима и от Иудеи крѣпкаго и крѣпкую, крѣпость хлѣба и крѣпость воды, |
3:2 | исполина и крѣпкаго, и человѣка ратника и судiю, и пророка и смотреливаго, и старца |
3:3 См.: 🔗4Цар. 24:14 | и пятьдесятоначалника, и дивнаго совѣтника и премудраго архитектона и разумнаго послушателя. |
3:4 См.: 🔗Еккл. 10:16 | И поставлю юношы князи ихъ, и ругателiе господствовати будутъ ими. |
3:5 См.: 🔗Иез. 22:29 | И нападати имутъ людiе, человѣкъ на человѣка, и человѣкъ на ближняго своего: приразится отроча къ старцу, и безчестный къ честному. |
3:6 | Яко имется человѣкъ брата своего, или домашняго отца своего, глаголя: ризу имаши, началовождь намъ буди, и брашно мое подъ тобою да будетъ. |
3:7 См.: 🔗Исх. 15:26 | И отвѣщавъ въ день оный речетъ: не буду твой началовождь, нѣсть бо въ дому моемъ ни хлѣба, ни ризы: не буду началовождь людемъ симъ. |
3:8 | Яко оставленъ бысть Иерусалимъ, и Иудеа паде, и языкъ ихъ со беззаконiемъ, не покаряющься Господеви. |
3:9 См.: 🔗Быт. 13:13 🔗Быт. 18:20 | Сего ради нынѣ смирися слава ихъ, и студъ лица ихъ противу ста имъ: грѣхъ же свой яко Cодомскiй возвѣстиша и явиша. Горе души ихъ, зане умыслиша совѣтъ лукавый на себе самихъ, |
3:10 См.: 🔗Ис. 32:17 🔗Иак. 3:18 | рекше: свяжемъ праведнаго, яко непотребенъ намъ есть. Убо плоды дѣлъ своихъ снѣдятъ. |
3:11 См.: 🔗Иер. 25:14 | Горе беззаконному: лукавая бо приключатся ему по дѣломъ руку его. |
3:12 | Людiе мои, приставницы ваши пожинаютъ васъ, и истязающiи обладаютъ вами: людiе мои, блажащiи васъ льстятъ вы и стези ногъ вашихъ возмущаютъ. |
3:13 См.: 🔗Пс. 97:9 | Но нынѣ устроится Господь на судъ и поставитъ на судъ люди своя: |
3:14 | самъ Господь на судъ прiидетъ со старѣйшины людій и со князи ихъ. Вы же почто запалисте виноградъ мой, и разграбленiе убогаго въ домѣхъ вашихъ? |
3:15 | почто вы обидите людій моихъ и лице убогихъ посрамляете? глаголетъ Господь Саваоѳъ. |
3:16 См.: 🔗1Тим. 2:9 | Сiя глаголетъ Господь: понеже вознесошася дщери Сiони и ходиша высокою выею и помизанiемъ очесъ и ступанiемъ ногъ, купно ризы влекушыя [по долу] и ногама купно играющыя: |
3:17 | и смиритъ Господь началныя дщери Сiони, и Господь открыетъ срамоту ихъ. |
3:18 | Въ день онъ, и отъиметъ Господь славу ризъ ихъ и красоты ихъ, и вплетенiя златая [на главѣ] и тресны ризныя, и луницы гривенныя |
3:19 | и срачицы тонкiя, и красоту лица ихъ и состроенiе красы славныя, и обручи и перстни, и мониста и запястiя и художныя усерязи, |
3:20 | и багряницы и пребагряная, и утварь храмную |
3:21 | и свѣтлая лаконская, и виссоны и синеты, и червленицы |
3:22 | и виссонъ со златомъ и синетою претыканы, и тончицы преиманы златомъ: |
3:23 | и будетъ вмѣсто вони добрыя смрадъ, и вмѣсто пояса ужемъ препояшешися, и вмѣсто украшенiя златаго, еже на главѣ, плѣшь имѣти будеши дѣлъ твоихъ ради, и вмѣсто ризы багряныя препояшешися вретищемъ: |
3:24 | и сынъ твой добрѣйшiй, егоже любиши, мечемъ падетъ, и крѣпцыи ваши мечемъ падутъ и смирятся: |
3:25 См.: 🔗Плч. 1:4 | и восплачутся хранилища утварей вашихъ, и останешися едина и о землю ударена будеши. |