Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 15 | |
15:1 | И егда услышаша въ шатрѣхъ сущiи, ужасошася о бывшемъ, |
15:2 | и нападе на ня страхъ и трепетъ, и не бѣ человѣка пребывающа предъ лицемъ ближняго ктому, но истекше единодушно бѣжаху по всякому пути поля и нагорныя: |
15:3 | и иже ополчившiися въ горней окрестъ ветилуи обратишася въ бѣгство: и тогда сынове Израилевы всякъ мужъ ратникъ от нихъ устремишася на нихъ. |
15:4 | И посла Озіа въ ветомасѳемъ и виваю, и ховаю и холу, и во всякъ предѣлъ Израилевъ, вѣстники о совершившихся, и да вси потекутъ вслѣдъ враговъ на погубленiе ихъ. |
15:5 | Егда же услышаша сынове Израилевы, вси единодушно нападоша на нихъ и сѣкоша ихъ даже до ховы. Такожде же и иже изъ Иерусалима прiидоша и изъ всея нагорныя: возвѣстиша бо имъ бывшая ополченiю враговъ ихъ: и иже въ Галаадѣ и въ Галилеи бодоша ихъ язвою великою, дондеже минуша Дамаскъ и предѣлы его. |
15:6 | Прочiи же живущiи во ветилуи, нападоша на полкъ Ассуровъ и плѣниша ихъ и обогатишася зѣло. |
15:7 | Сынове же Израилевы возвратившеся от сѣчи, возобладаша прочими, и веси и села, яже въ горней и напольнѣй, возобладаша многими корыстьми: бѣ бо множество много зѣло. |
15:8 | Иоакимъ же иерей великiй и старѣйшины сыновъ Израилевыхъ живущiи во Иерусалимѣ прiидоша еже зрѣти благая, яже сотвори Господь Израилю, и еже видѣти Иудиѳъ и глаголати съ нею миръ. |
15:9 | Егда же прiидоша къ ней, благословиша ю вси единодушно и рѣша къ ней: ты возвышенiе Израилево! ты радованiе велико Израилево! ты слава велiя рода нашего! |
15:10 | сотворила еси вся сiя рукою твоею, сотворила еси благая со Израилемъ, и да благоволитъ о нихъ Богъ: благословена буди у Вседержителя Господа въ вѣчное время. И рѣша вси людiе: буди. |
15:11 | И плѣняху вси людiе полкъ чрезъ дній тридесять, и даша Иудиѳѣ шатеръ Олоферновъ и вся сребряныя сосуды, и одры и умывалницы, и вся устроенiя его. И прiемши она возложи на мска своего, и впряже колесницы, и сложи я на ня. |
15:12 | И притече всякая жена Израилска еже видѣти ю, и благословиша ю и сотвориша ей ликъ от себе. И взя копiя цвѣтами украшенная въ руцѣ свои и даде женамъ сущымъ съ нею: |
15:13 | и увѣнчася маслиною сама и яже съ нею, и идяше предъ всѣми людьми въ лицѣ, ведущи всѣхъ женъ. И послѣдоваше всякъ мужъ Израилевъ вооружени съ вѣнцы и пѣсньми во устахъ своихъ. |
15:14 | И нача Иудиѳъ исповѣданiе сiе во всемъ Израили, и возглашаху вси людiе хваленiе сiе. |