Книга Товита, глава 6 неканонич.

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 6
6:1	И преста плакати.
6:2	Она же шедша путемъ, прiидоста въ вечеръ ко Тигру рѣцѣ и пребыста тамо.
6:3	Отрочищь же сниде омытися и изскочи рыба от рѣки и хотяше пожрети отрочища.
6:4	Ангелъ же рече ему: воз­ми рыбу. И ятъ рыбу отрочищь и изверже ю на землю.
6:5	И рече ему ангелъ: разрѣжи рыбу, и взявъ сердце и печень и желчь, положи сохран­но.
6:6	И сотвори отрочищь, якоже рече ему ангелъ: рыбу же испекша, снѣдоста: и идоста оба, донелиже при­­ближишася ко екватаномъ.
6:7	И рече отрочищь ангелу: азаріа брате, что есть сердце и печень и желчь рыбiя?
6:8	И рече ему: сердце и печень, аще кого смущаетъ демонъ или духъ золъ, симъ подобаетъ курити предъ человѣкомъ или женою, и ктому не будетъ смущатсия:
6:9	желчь же, помазати человѣка, иже имать бѣльма на очесѣхъ, и изцѣлѣетъ.
6:10	Егда же при­­ближистася ко рагѣ,
6:11	рече ангелъ отрочищу: брате, днесь пребудемъ у Рагуила, и онъ сродникъ твой есть, и есть ему дщерь единородна именемъ Сарра:
6:12 См.: 🔗Чис. 27:8 🔗Чис. 36:7	воз­глаголю о ней, еже датися тебѣ ей въ жену, зане тебѣ надлежитъ наслѣдiе ея, и ты единъ еси от­ рода ея: отроковица же красна и умна есть:
6:13	и нынѣ послушай мя, и воз­глаголю отцу ея, и егда воз­вратимся от­ рагъ, сотворимъ бракъ: понеже вѣмъ Рагуила, яко не дастъ ея мужу иному по закону Моисеову, или повиненъ будетъ смерти, зане наслѣдiе тебѣ подобаетъ прiяти, нежели всякому человѣку.
6:14	Тогда рече отрочищь ангелу: азаріа брате, слышахъ азъ, яко отроковица дана бѣ седми мужемъ, и вси въ невѣстницѣ погибоша:
6:15	и нынѣ азъ единъ есмь отцу и боюся, да не в­шедъ умру якоже и прежднiи, понеже демонъ любитъ ю, иже не вредитъ ни когоже развѣ при­­ходящихъ къ ней: и нынѣ азъ боюся да не умру и низведу животъ отца мо­его и матере мо­ея съ печалiю о мнѣ во гробъ ихъ, и сынъ другій нѣсть има, иже погребетъ я.
6:16	Рече же ему ангелъ: не помниши ли словесъ, яже заповѣда тебѣ отецъ твой, о еже взяти тебѣ жену от­ рода тво­его? и нынѣ послушай мя, брате, понеже тебѣ будетъ въ жену, а о демонѣ ни единыя мысли имѣй, зане въ нощь сiю даст­ся тебѣ она въ жену:
6:17	и аще внидеши въ невѣст­никъ, возмеши жератокъ ѳимiамный, и воз­ложиши от­ сердца и от­ печени рыбныя и покуриши:
6:18	и обоняетъ демонъ, и от­бѣжитъ и не воз­вратится во вѣкъ вѣка: егда же прiидеши къ ней, востаните оба и возопійте къ милостивому Богу, и спасетъ васъ и помилуетъ: не бойся, зане тебѣ сiя уготована есть от­ вѣка, и ты ю спасеши, и пойдетъ съ тобою, и непщую, яко тебѣ будутъ от­ нея чада. И яко услыша товіа сiя, воз­люби ю, и душа его при­­лѣпися зѣло ей. И прiидоста во екватаны.