Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 5 | |
5:1 См.: 🔗Деян. 15:10 🔗1Пет. 2:16 | Свободою убо, еюже Христосъ насъ свободи, стойте, и не паки подъ игомъ работы держитеся. |
5:2 См.: 🔗Гал. 2:21 | Се азъ Павелъ глаголю вамъ, яко аще обрѣзаетеся, Христосъ васъ ничтоже пользуетъ. |
5:3 | Свидѣтелствую же паки всякому человѣку обрѣзающемуся, яко долженъ есть весь законъ творити. |
5:4 | Упразднистеся от Христа, иже закономъ оправдаетеся, от благодати отпадосте: |
5:5 См.: 🔗Рим. 5:5 | мы бо духомъ от вѣры упованiя правды ждемъ. |
5:6 См.: 🔗Рим. 2:29 | О Христѣ бо Иисусѣ ни обрѣзанiе что можетъ, ни необрѣзанiе, но вѣра любовiю поспѣшествуема. |
5:7 | Течасте добрѣ: кто вамъ возбрани не покарятися истинѣ? |
5:8 | Препрѣнiе не от Призвавшаго вы. |
5:9 См.: 🔗1Кор. 5:6 | Малъ квасъ все смѣшенiе кваситъ. |
5:10 | Азъ надѣюся о васъ въ Господѣ, яко ничтоже ино разумѣти будете: смущаяй же васъ понесетъ грѣхъ, кто бы ни былъ. |
5:11 См.: 🔗1Кор. 1:23 | [Зач. 212.] Азъ же, братiе, аще обрѣзанiе еще проповѣдую, почто еще гонимь есмь? Убо упразднися соблазнъ креста. |
5:12 | О, дабы отсѣчени были развращающiи васъ. |
5:13 См.: 🔗1Пет. 2:16 🔗1Кор. 8:9 | Вы бо на свободу звани бысте, братiе: точiю да не свобода ваша въ вину плоти, но любовiю работайте другъ другу. |
5:14 | Ибо весъ законъ въ единѣмъ словеси исполняется, во еже: возлюбиши ближняго твоего якоже себе. |
5:15 | Аще же другъ друга угрызаете и снѣдаете, блюдитеся, да не другъ от друга истреблени будете. |
5:16 | Глаголю же: духомъ ходите, и похоти плотскія не совершайте: |
5:17 См.: 🔗1Пет. 2:11 🔗Рим. 7:23 | плоть бо похотствуетъ на духа, духъ же на плоть: сiя же другъ другу противятся, да не яже хощете, сiя творите. |
5:18 См.: 🔗Рим. 6:14 | Аще ли духомъ водими есте, нѣсте подъ закономъ. |
5:19 См.: 🔗1Кор. 6:9 | Явлена же суть дѣла плотская, яже суть прелюбодѣянiе, блудъ, нечистота, студодѣянiе, |
5:20 | идолослуженiе, чародѣянiя, вражды, рвенiя, завиды, ярости, разжженiя, распри, соблазны, ереси, |
5:21 | зависти, убийства, пiянства, безчинни кличи и подобная симъ: яже предглаголю вамъ, якоже и предрекохъ, яко таковая творящiи Царствiя Божiя не наслѣдятъ. |
5:22 См.: 🔗Кол. 3:12 | [Зач. 213.] Плодъ же духовный есть любы, радость, миръ, долготерпѣнiе, благость, милосердiе, вѣра, |
5:23 | кротость, воздержанiе: на таковыхъ нѣсть закона. |
5:24 См.: 🔗Гал. 2:20 | А иже Христовы суть, плоть распяша со страстьми и похотьми. |
5:25 | Аще живемъ духомъ, духомъ и да ходимъ. |
5:26 См.: 🔗Флп. 2:3 | Не бываимъ тщеславни, другъ друга раздражающе, другъ другу завидяще. |