Третья книга Ездры, глава 15 неканонич.

	Язык: Церковнослав. (дореф.) Церковнослав. (цс.) Рус. (Синодальный) English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 15
15:1	Се, глаголи во ушы людемъ мо­имъ словеса пророче­ст­ва, яже дамъ во уста твоя, глаголетъ Господь:
15:2	и сотвори, да на Хартiи напишут­ся, яко вѣрна и истин­на суть:
15:3	не бойся от­ помышленiй на тя, ниже да смутятъ тя невѣрности глаголющихъ,
15:4	понеже всякъ невѣрный въ невѣрiи сво­емъ умретъ.
15:5	Се, азъ наведу [рече Господь] на кругъ земный злая, мечь и гладъ, и смерть и погубленiе,
15:6	понеже оскверни беззаконiе всю землю, и наполнена суть дѣла ихъ вредная.
15:7	Сего ради рече Господь:
15:8	уже не умолчу о нечестiихъ ихъ, яже беззакон­но содѣловаютъ, ни потерплю имъ, яже злѣ творятъ: се, кровь неповин­ная и праведная вопiетъ ко мнѣ, и души праведныхъ вопiютъ безпрестан­но:
15:9	от­мщая от­мщу имъ, рече Господь, и воспрiиму всяку кровь неповин­ную от­ тѣхъ ко мнѣ.
15:10	Се, людiе мо­и яко стада къ заколенiю ведут­ся, уже не потерплю того, еже обитати имъ въ земли Египетстѣй,
15:11	но изведу я рукою сильною и мышцею высокою, и поражу [Египетъ] казнiю якоже прежде, и растлю всю землю его:
15:12	восплачет­ся Египетъ, и основанiя его казнiю избиена будутъ и наказанiемъ, яже наведетъ ему Богъ:
15:13	восплачутъ дѣлателе дѣла­ю­щiи землю, яко оскудѣютъ сѣмена ихъ от­ ржи и града и от­ звѣзды страшныя.
15:14	Горе вѣку, и иже обитаютъ въ немъ:
15:15	понеже при­­ближися мечь и сокрушенiе ихъ, и востанетъ языкъ на языкъ къ брани, и мечь въ рукахъ ихъ.
15:16	Будетъ бо непостоянiе человѣкомъ, и иніи иныхъ одолѣвающiи воз­нерадятъ о цари сво­емъ, и началницы путій о дѣлѣхъ сво­ихъ въ могут­ст­вѣ сво­емъ.
15:17	Восхощетъ бо человѣкъ во градъ ити и не воз­можетъ:
15:18	гордыни бо ихъ ради гради смятут­ся, домы сокрушат­ся, человѣцы убоят­ся.
15:19	Не умилосердит­ся человѣкъ ко искрен­нему сво­ему, на разоренiе домовъ ихъ во оружiе, на расхищенiе имѣнiй ихъ, глада ради хлѣбнаго и оскорбленiя многа.
15:20	Се, азъ созываю, рече Господь, вся цари земскiя, еже мене боятися, иже суть от­ востока и юга, от­ сѣвера и Ливана, ко обращенiю къ себѣ, и воз­дати, яже воз­даша тѣмъ:
15:21	якоже творятъ даже до днесь избран­нымъ мо­имъ, тако сотворю и воз­дамъ въ нѣдра ихъ. Сiя глаголетъ Господь Богъ:
15:22	не пощадитъ десница моя грѣшниковъ, и не престанетъ мечь на проливающихъ кровь неповин­ную на земли:
15:23	изыде огнь от­ гнѣва его, и пожре основанiя земли, и грѣшники яко хврастiе зажжено.
15:24	Горе симъ, иже согрѣшаютъ и не содержатъ заповѣдiй мо­ихъ, рече Господь,
15:25	не прошу имъ: от­идите, сынове, от­ власти, не оскверняйте святыни мо­ея.
15:26	Яко вѣсть Господь всѣхъ, иже согрѣшаютъ ему, сего ради предаде ихъ въ смерть и въ заколенiе.
15:27	Уже бо прiидоша на кругъ земный злая, и пребудете въ нихъ, не избавитъ бо васъ Богъ, понеже согрѣшисте предъ нимъ.
15:28	Се, видѣнiе грозное, и лице его от­ востока:
15:29	и изыдутъ рожденiя змиевъ Аравскихъ на колесницахъ многихъ: якоже дыханiе [вѣтровъ] число ихъ понесет­ся по земли, яко уже убоят­ся и вострепещутъ вси, иже ихъ услышатъ:
15:30	кармоняне неистов­ст­ву­ю­щiи во гнѣвѣ изыдутъ яко вепри от­ дубравы и прiидутъ въ силѣ велицѣй, и станутъ на брань съ ними и опустошатъ часть земли Ассирійскiя:
15:31	и по сихъ превоз­могутъ зміеве помнящiи рожденiе свое и обратят­ся согласующе въ силѣ велицѣй на постизанiе ихъ:
15:32	сіи смутят­ся, и умолчатъ въ силѣ ихъ, и обратятъ нозѣ сво­и на бѣжанiе:
15:33	и от­ области Ассирійскiя обстоятель обстанетъ ихъ и скончаетъ единаго от­ нихъ, и будетъ боязнь и страхъ въ полцѣ ихъ, и рвенiе на цари ихъ.
15:34	Се, облацы от­ востока и сѣвера даже до полудне, и лице ихъ грозно зѣло, исполнено гнѣва и бури:
15:35	и сразят­ся между собою и сразятъ звѣзду многу на земли и звѣзду ихъ: и будетъ кровь от­ меча даже до утробы,
15:36	и гной человѣческiй даже до сѣдла велблюждя, и будетъ боязнь и страхъ многъ на земли,
15:37	и устрашат­ся, иже узрятъ гнѣвъ сей, и трепетъ прiиметъ ихъ:
15:38	и по семъ воз­двигнут­ся бури многи от­ полудне и сѣвера, и часть ина от­ запада,
15:39	и премогутъ вѣтри от­ востока, и отворятъ его, и облакъ, егоже воз­движе во гнѣвѣ, и звѣзда на сотворенiе страха от­ восточна вѣтра и западна повредит­ся:
15:40	и воз­двигнут­ся облацы велiи и зѣлнiи, полни гнѣва, и звѣзда, да устрашатъ всю землю и обитающихъ на ней, и воз­лiютъ на всяко мѣсто высоко и воз­несеное звѣзду страшную,
15:41	огнь и градъ, и мечы летающыя и воды многи, яко да наполнят­ся вся поля и вси источницы исполненiемъ водъ многихъ:
15:42	и сокрушатъ грады и стѣны, и горы и холмы, [и удолiя] и древа дубравная, и сѣна лужная и жита ихъ,
15:43	и пройдутъ непоколеблеми до Вавилона и сокрушатъ его:
15:44	соберут­ся къ нему, и обыдутъ его, и излiютъ звѣзду и всю ярость нань: и взыдетъ прахъ и дымъ даже до небесе, и вси, иже окрестъ, воз­рыдаютъ о немъ,
15:45	и иже подъ нимъ останутъ, послужатъ тѣмъ, иже устрашиша ихъ.
15:46	И ты, Асіе, согласна во упованiе Вавилона, и слава лица его:
15:47	горе тебѣ бѣднѣй! понеже уподобилася еси ему и украсила еси дщери твоя въ любо­дѣянiи, ко угожденiю и прославленiю въ любо­вныхъ тво­ихъ, иже съ тобою похотѣша всегда блудити:
15:48	ненавидѣн­ному подражала еси во всѣхъ дѣлѣхъ его и въ начинанiихъ его.
15:49	Сего ради, рече Господь, послю на тя злая, вдов­ст­во, убоже­с­т­во и гладъ, и мечь и губител­ст­во на разоренiе домовъ тво­ихъ от­ насилiя и смерти,
15:50	и слава силы тво­ея якоже цвѣтъ изсхнетъ, егда востанетъ зной, иже посланъ есть на тя:
15:51	изнеможеши якоже убожайшая язвена и наказана от­ женъ, яко не воз­могутъ тебе прiяти сильнiи и любовницы.
15:52	Еда азъ тако воз­ревную тебѣ, рече Господь,
15:53	аще бы не заклала еси избран­ныхъ мо­ихъ во всяко время, воз­вышающи на пораженiе руцѣ и глаголющи на смерть ихъ, егда упивалася еси?
15:54	украси лѣпоту лица тво­его:
15:55	мзда блуженiя тво­его въ нѣдрѣхъ тво­ихъ, сего ради воз­даянiе прiимеши.
15:56	Якоже сотвориши избран­нымъ мо­имъ, рече Господь, тако сотворитъ тебѣ Богъ и предастъ тя во злая:
15:57	и чада твоя гладомъ погибнутъ, ты же мечемъ падеши, и гради тво­и сокрушат­ся, и вси тво­и въ поли оружiемъ падутъ:
15:58	и иже суть въ горахъ, гладомъ погибнутъ и ясти будутъ мяса своя от­ глада хлѣба и кровь пити от­ жажды воды:
15:59	неблагополучна чрезъ моря прiидеши и паки прiимеши злая,
15:60	и въ прехожденiи поразятъ градъ избiен­ный, и искоренятъ нѣкую часть земли тво­ея, и часть славы тво­ея истребятъ, паки воз­вращающеся къ Вавилону превращен­ному:
15:61	и разорена будеши имъ яко хврастiе, и тіи будутъ тебѣ аки огнь,
15:62	и пожрутъ тя и грады твоя, землю твою и горы твоя, и вся дубравы твоя и древеса плодоносная огнемъ пожгутъ,
15:63	сыны твоя въ плѣненiе поведутъ, и дани твоя въ корысть возмутъ, и славу лица тво­его истребятъ.