Первая книга Маккавейская, глава 6 неканонич.

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 6
6:1	И царь Антiохъ прохожда­ше вышнiя страны и слыша, яко есть Елимаисъ въ персидѣ градъ славенъ богат­ст­вомъ, сребромъ и златомъ,
6:2	и храмъ въ немъ богатъ зѣло, и ту запоны златы, и броня и оружiя, яже остави ту Александръ сынъ Филипповъ, царь македонскiй, иже цар­ст­вова первый во еллинѣхъ.
6:3	И прiиде и иска­ше взяти градъ и плѣнити его, и не воз­може, яко познася слово сущымъ во градѣ.
6:4	И восташа противу ему на брань, и побѣже от­туду, и иде со скорбiю велiею, и воз­вратися въ Вавилонъ.
6:5	И прiиде воз­вѣщаяй ему нѣкто въ персиду, яко от­бѣгоша полцы ходив­шiи во Иудею.
6:6	И ходи лисіа съ силою крѣпкою въ первыхъ, и прогнанъ бысть от­ лица ихъ, и воз­могоша оружiями и силами и корыстьми многими, яже взяша от­ полковъ, ихже избиша.
6:7	И разориша мерзость, юже созда на олтари во Иерусалимѣ, и святыню, якоже прежде окружиша стѣнами высокими, и веѳсуру градъ его.
6:8	И бысть яко услыша царь словеса сiя, устрашися и смутися зѣло: и паде на ложе и впаде въ недугъ от­ печали, понеже не сбыст­ся ему, якоже помышляше.
6:9	И бѣ ту дни многи, понеже обновися на немъ печаль велика, и мняше, яко умретъ.
6:10	И созва вся други своя и рече имъ: отъиде сонъ от­ очiю моею, и испадохъ сердцемъ от­ печали,
6:11	и рѣхъ въ сердцы мо­емъ: до коликiя скорби до­идохъ и волны велiя, въ нейже нынѣ есмь? яко благъ и любимь быхъ во власти мо­ей:
6:12	нынѣ же поминаю злая, яже сотворихъ во Иерусалимѣ, и взяхъ вся сосуды златы и сребряны въ немъ, и послахъ изъяти обитающихъ во Иудеи вотще:
6:13	познахъ убо, яко сихъ ради обрѣтоша мя злая сiя: и се, гибну скорбiю велiею въ земли чуждей.
6:14	И при­­зва Филиппа единаго от­ друговъ сво­ихъ, и постави его надъ всѣмъ цар­ст­вомъ сво­имъ,
6:15	и даде ему дiадиму и ризу свою и перстень, еже водити Антiоха сына его и воспитати его еже цар­ст­вовати.
6:16	И умре тамо Антiохъ царь въ лѣто сто четыредесять девятое.
6:17	И позна лисіа, яко умре царь. и постави цар­ст­вовати Антiоха сына его вмѣсто его, егоже воспита юношу, и нарече имя ему Евпаторъ.
6:18	И сущiи во краеградiи заключиша Израиля окрестъ святыхъ и искаху имъ злая всегда и утвержденiе языкомъ.
6:19	И умысли Иуда изгнати ихъ: и созва вся люди, да обстоятъ ихъ.
6:20	И собрашася вкупѣ и обсѣдоша ихъ въ лѣто сто пятьдесятое, и сотвори на нихъ стрѣлостоятелницы и миханы.
6:21	И изыдоша от­ нихъ изъ заключенiя, и при­­лѣпишася тѣмъ нѣцыи нечестивiи от­ Израиля,
6:22	и идоша ко царю и рѣша: доколѣ не сотвориши суда и от­мстиши братiю нашу?
6:23	мы благоволимъ служити отцу тво­ему и ходити въ заповѣдехъ его и послѣдовати повелѣниемъ его:
6:24	и облежени суть во краеградiи сынове людій нашихъ, сего ради и от­чуждают­ся от­ насъ: и елицы обрѣтахуся от­ насъ, погубляхуся, и наслѣдiя наша расхищаема бяху:
6:25	и не на насъ токмо простроша руку, но и на вся предѣлы нашя:
6:26	и се, ополчишася днесь на краеградiе во Иерусалимѣ, еже взяти его и святыню, и веѳсуру утвердиша:
6:27	и аще не предвариши ихъ скорѣе, болшая сихъ сотворятъ, и не воз­можеши удержати ихъ.
6:28	И прогнѣвася царь, егда услыша, и собра вся други своя и началники силы сво­ея и иже надъ кон­ники:
6:29	и от­ цар­ст­въ иныхъ и от­ острововъ морскихъ прiидоша къ нему силы наемницы:
6:30	и бысть число силъ его сто тысящъ пѣшцевъ и двадесять тысящъ кон­никовъ, и слоновъ тридесять два вѣдящихъ брань.
6:31	И прiидоша сквоз­ѣ Идумею и ополчишася въ веѳсурѣ, и ратоваху дни многи и сотвориша миханы: и изыдоша и пожгоша ихъ огнемъ и бишася муже­с­т­вен­нѣ.
6:32	И отъиде Иуда от­ краеградiя и ополчися въ веѳсахарiи противу полка царева.
6:33	И воста царь зѣло рано и воз­движе ополченiе во устремленiи его по пути веѳсахарiи: и устроишася силы на брань, и вострубиша трубами,
6:34	и слономъ показаша кровь гроздову и ягоды, еже поострити ихъ на брань:
6:35	и разлучиша звѣрей на полки и при­­ставиша ко­емуждо слону тысящу мужей облечен­ныхъ въ броня желѣзомъ соплетены, и шлемы мѣдяни на главахъ ихъ, и пять сотъ кон­никовъ вчиненыхъ ко­емуждо звѣрю избран­ныхъ.
6:36	Сiя бѣша прежде времене, идѣже аще бѣ звѣрь: и идѣже аще идяше, идяху вкупѣ и не от­ступаху от­ него.
6:37	И пирги древяни на нихъ крѣпцы защищающiи на ко­емждо звѣри, препоясани на немъ миханами, и на ко­емждо мужей силы тридесять два воюющихъ на нихъ, и индіанинъ управитель его.
6:38	И прочыя кон­ники сюду и сюду поставиша на двѣ части полка, побуждающе и заграждающе въ дебрехъ.
6:39	Егда же воз­сiя солнце на щиты златыя и мѣдяныя, обсiяша горы от­ нихъ и облисташа яко лампады огнен­ныя.
6:40	И от­лучися часть нѣкая от­ полка царева на горы высоки, и нѣцыи на нижшая, и идяху крѣпцѣ и чин­но.
6:41	И поколебашася вси слышащiи гласъ множе­ст­ва ихъ, и путьше­ст­вiя многихъ, и сраженiя оружiй: бѣ бо ополченiе велико зѣло и крѣпко.
6:42	И при­­ближися Иуда и полкъ его на брань, и падоша от­ полка царева шесть сотъ мужей.
6:43	И увидѣ Елеазаръ сынъ Саварань единаго от­ звѣрей облечена въ броню царску, и бяше выше прочiихъ звѣрей, и воз­мнѣся ему, яко на немъ есть царь:
6:44	и вдадеся самъ еже избавити люди своя и сотворити себѣ имя вѣчное,
6:45	и тече къ нему съ дерзостiю въ средину полка, и побива­ше одесную и ошуюю, и раздѣляхуся от­ него сюду и сюду:
6:46	и вниде подъ слона, и подложися ему, и уби его, и паде на землю верху его, и умре ту.
6:47	И видѣша силу цар­ст­ва и устремленiе воевъ, и уклонишася от­ нихъ.
6:48	Сущiи же от­ полка царева взыдоша противу ихъ на Иерусалимъ: и ополчися царь на Иудею и на гору Сiонъ.
6:49 См.: 🔗Лев. 25:4	И сотвори миръ съ сущими въ веѳсурѣхъ: и изыдоша изъ града, яко не бѣ имъ тамо пищи, еже затворитися въ немъ, понеже суббота бяше земли.
6:50	И взя царь веѳсуру и постави ту стражу хранити ю.
6:51	И ополчися на мѣсто святыни дни многи, и постави ту стрѣлостоятелницы и миханы, и огнеметницы и каменометницы и скорпiоны, еже бы метати стрѣлы и пращы.
6:52	Сотвориша же и тіи миханы противу миханъ ихъ, и брашася дни многи.
6:53 См.: 🔗Лев. 25:4	Пища же не бяше во градѣ, занеже седмое лѣто бѣ, и избѣжав­шiи во Иудею от­ языкъ поядоша останокъ сокровенiя.
6:54	И осташася во святилищи мужей мало, яко объятъ ихъ гладъ, и расточени быша кійждо въ мѣсто свое.
6:55	И слыша лисіа, яко Филиппъ, егоже постави царь Антiохъ, еще живъ сый, да воспитаетъ Антiоха сына его, во еже цар­ст­вовати ему,
6:56	воз­вратися от­ персиды и мидіи, и вои царстiи ходив­шiи съ нимъ, и яко ищетъ прiяти вещы:
6:57	и потщася по­ити от­ краеградiя и глаголати ко царю и во­еводамъ силы и къ мужемъ: оскудѣваемъ на всякъ день, и пища намъ мала [есть], и мѣсто, еже обсто­имъ, утверждено, и надлежитъ намъ [строити] яже о цар­ст­вѣ:
6:58	нынѣ убо дадимъ десницу человѣкомъ тѣмъ и сотворимъ съ ними миръ и со всѣми людьми ихъ,
6:59	и уставимъ имъ, да ходятъ въ законѣхъ сво­ихъ, якоже прежде: ради бо законовъ сво­ихъ, яже разрушихомъ, прогнѣвашася и сотвориша вся сiя.
6:60	И угодно бысть слово предъ царемъ и началники, и посла къ нимъ миръ сотворити. и прiяша.
6:61	И клят­ся имъ царь и началницы: о сихъ изыдоша изъ твердыни.
6:62	И вниде царь въ гору Сiонъ и видѣ твердыню мѣста: и от­вержеся клятвы, еюже клят­ся, и повелѣ разорити стѣну окрестъ.
6:63	И отъиде тщателно и воз­вратися во Антiохію, и обрѣте Филиппа господ­ст­ву­ю­ща надъ градомъ, и во­ева нань, и взя градъ нуждею.