Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 14 | |
14:1 | И царь Астиагъ приложися къ отцемъ своимъ: и прiя киръ персянинъ царство его. |
14:2 | И бяше данiилъ сожителствующь со царемъ и славенъ паче всѣхъ друговъ его. |
14:3 | И бяше кумiръ Вавилоняномъ, емуже имя вилъ, и иждиваху ему на кійждо день муки семидалны Артавасъ дванадесять и овецъ четыредесять и вина мѣръ шесть. |
14:4 | И царь почиташе его и хождаше по вся дни кланятися ему: данiилъ же кланяшеся Богу своему. И рече ему царь: почто не покланяешися вилу? |
14:5 | Онъ же рече: понеже не покланяюся кумiромъ руками сотвореннымъ, но живому Богу сотворщему небо и землю и владущему всѣми. |
14:6 | И рече ему царь: не мнится ли ти вилъ быти живъ богъ? или не видиши, колико ястъ и пiетъ по вся дни? |
14:7 См.: 🔗Сир. 30:19 | И рече данiилъ посмѣявся: не прельщайся, царю! той бо внутрьуду прахъ есть, а внѣуду мѣдь, и не яде, ни пи никогдаже. |
14:8 | И разгнѣвався царь призва жерцы своя и рече имъ: аще не повѣсте ми, кто ястъ брашно сiе, то умрете: |
14:9 | аще же покажете, яко вилъ снѣдаетъ е, умретъ данiилъ, яко похулилъ есть вила. И рече данiилъ царю: буди по глаголу твоему. |
14:10 | Бяше же жерцевъ виловыхъ седмьдесятъ, кромѣ женъ и дѣтей. |
14:11 | И прiиде царь со данiиломъ во храмъ виловъ. И рѣша жерцы виловы: се, мы изыдемъ вонъ, ты же, царю, постави яди, и вино начерпавъ постави, заключи же двери и запечатай перстнемъ своимъ: |
14:12 | и пришедъ заутра, аще не обрящеши всего изъядена виломъ, тогда измремъ, или данiилъ солгавый на ны. |
14:13 | Тіи же пренебрегаху, понеже сотвориша подъ трапезою сокровенъ входъ и вхождаху тѣмъ всегда и изъядаху тая. |
14:14 | И бысть, егда изыдоша они, и царь постави брашно вилу: и повелѣ данiилъ отрокомъ своимъ, и принесоша пепелъ и посыпаша весь храмъ предъ царемъ единымъ: и изшедше заключиша двери, и запечаташа перстнемъ царевымъ, и отидоша. |
14:15 | Жерцы же внидоша нощiю по обычаю своему, и жены ихъ и чада ихъ, и поядоша вся и испиша. |
14:16 | И урани царь заутра, и данiилъ съ нимъ. |
14:17 | И рече царь: цѣлы ли суть печати, данiиле? Онъ же рече: цѣлы, царю. |
14:18 | И бысть абiе, егда отверзоша двери, воззрѣвъ царь на трапезу, возопи гласомъ великимъ: великъ еси, виле, и нѣсть льсти въ тебѣ ни единыя. |
14:19 | И посмѣяся данiилъ, и удержа царя, еже бы не внити ему внутрь, и рече: виждь убо помостъ и уразумѣй, чiя суть стопы сiя? |
14:20 | И рече царь: вижду стопы мужески и женски и дѣтски. |
14:21 | И разгнѣвався царь, ятъ тогда жерцы и жены ихъ и дѣти ихъ, и показаша ему сокровенныя двери имиже вхождаху и поядаху яже на трапезѣ. |
14:22 | И изби я царь и даде вила въ руцѣ данiилу, и разби его и храмъ его разори. |
14:23 | И бяше змій великiй на мѣстѣ томъ, и почитаху его Вавилоняне. |
14:24 | И рече царь данiилу: еда и сему речеши, яко мѣдь есть? сей живъ есть, и ястъ и пiетъ: не можеши рещи, яко нѣсть сей богъ живъ: убо поклонися ему. |
14:25 | И рече данiилъ: Господу Богу моему поклонюся, яко той есть Богъ живъ: |
14:26 | ты же, царю, даждь ми власть, и убiю зміа безъ меча и безъ жезла. И рече царь: даю ти. |
14:27 | И взя данiилъ смолу и тукъ и волну, и возвари вкупѣ, и сотвори гомолу, и ввеже во уста змію, и изъядъ разсѣдеся змій. И рече данiилъ: зрите чтилища ваша. |
14:28 | И бысть, егда услышаша Вавилоняне, возропташа зѣло и обратишася на царя и рѣша: Иудеанинъ бысть царь, вила расторже, и зміа уби, и жерцы изсѣче. |
14:29 | И рѣша пришедше ко царю: предаждь намъ данiила: аще ли ни, то убiемъ тя и домъ твой. |
14:30 | И видѣ царь, яко налегаютъ на него зѣло, и принужденъ предаде имъ данiила. |
14:31 | Тіи же ввергоша его въ ровъ левскъ, и бѣ тамо дній шесть. |
14:32 | Бяху же въ ровѣ седмь львовъ, и даяху имъ на день два тѣла и двѣ овцы: тогда же не даша имъ, да снѣдятъ данiила. |
14:33 | Аввакумъ же пророкъ бяше во Иудеи, и той свари варенiе и вдроби хлѣбы въ нощвы, и идяше на поле донести жателемъ. |
14:34 | И рече ангелъ Господень Аввакуму: отнеси обѣдъ, егоже имаши, въ Вавилонъ данiилу, въ ровъ левскъ. |
14:35 | И рече Аввакумъ: Господи, Вавилона не видѣхъ, и рва не вѣмъ, гдѣ есть. |
14:36 См.: 🔗Иез. 8:3 | И ятъ его ангелъ Господень за верхъ его, и держа за власы главы его, и постави его въ Вавилонѣ верху рва шумомъ духа своего. |
14:37 | И возопи Аввакумъ глаголя: данiиле, данiиле! возми обѣдъ, егоже посла тебѣ Богъ. |
14:38 | И рече данiилъ: помянулъ бо мя еси, Боже, и нѣси оставилъ любящихъ тя. |
14:39 | И воставъ данiилъ яде: ангелъ же Божiй паки постави Аввакума внезапу на мѣстѣ его. |
14:40 | Царь же прiиде въ седмый день жалѣти данiила, и прiиде надъ ровъ, и воззрѣ и се, данiилъ сѣдя. |
14:41 | И возопи царь гласомъ великимъ и рече: великъ еси, Господи, Боже данiиловъ, и нѣсть иного развѣ тебе. |
14:42 | И исхити его, повинныя же пагубѣ его вверже въ ровъ, и изъядени быша абiе предъ нимъ. |