Книга Числа, глава 32

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) Українська English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 32
32:1 См.: 🔗Быт. 46:32 🔗Быт. 47:3	И скота множе­с­т­во бяше сыномъ Рувимлимъ и сыномъ Гадовымъ, много зѣло. И видѣша страну Иазирову и страну Галаадову, и бяше мѣсто, мѣсто скотно.
32:2	И при­­шедше сынове Рувимли и сынове Гадовы рекоша къ Моисею и ко Елеазару жерцу и ко княземъ сонма, глаголюще:
32:3	Атароѳъ и Девонъ, и Иазиръ и Намра, и Есевонъ и Елеали, и Севама и Нававъ и Веанъ,
32:4	земля, юже предаде Господь предъ сыны Израилевыми, земля скотопитателна есть, рабомъ же тво­имъ скотъ есть.
32:5	И рѣша: аще обрѣтохомъ благодать предъ тобою, да даст­ся намъ земля сiя рабомъ тво­имъ во одержанiе, и не преводи насъ чрезъ Иорданъ.
32:6	И рече Моисей сыномъ Гадовымъ и сыномъ Рувимлимъ: братiя вашя пойдутъ на брань, и вы ли сядете ту?
32:7 См.: 🔗Втор. 1:28 🔗Деян. 21:13	И вскую развращаете сердце сыновъ Израилевыхъ, не прейти на землю, юже даетъ Господь имъ?
32:8 См.: 🔗Чис. 13:3	Не тако ли сотвориша отцы ваши, егда послахъ я от­ Кадисъ-Варни соглядати землю?
32:9 См.: 🔗Чис. 13:24 🔗Втор. 1:28	И взыдоша до дебри Грезновныя, и соглядаша землю, и от­вратиша сердце сыновъ Израилевыхъ, яко да не внидутъ въ землю, юже даде имъ Господь?
32:10 См.: 🔗Чис. 14:28 🔗Чис. 26:65	И разгнѣвася яростiю Господь въ день онъ и клят­ся, глаголя:
32:11 См.: 🔗Чис. 14:23 🔗Быт. 50:24	аще узрятъ человѣцы сіи изшедшiи изъ Египта, от­ двадесяти лѣтъ и вышше, вѣдущiи добро и зло, землю, еюже кляхся Аврааму и Исааку и Иакову: не послѣдоваша бо вслѣдъ Мене,
32:12 См.: 🔗Чис. 14:30	точiю Халевъ сынъ Иефон­ніинъ от­лучен­ный и Иисусъ сынъ Навинъ, яко послѣдоваша вслѣдъ Господа.
32:13	И разгнѣвася яростiю Господь на Израиля, и томи я въ пустыни четыредесять лѣтъ, дондеже потребися весь родъ творящiй злая предъ Господемъ.
32:14	Се, востасте вмѣсто отецъ вашихъ, сокрушенiе человѣкъ грѣшниковъ, при­­ложити еще къ ярости гнѣва Господня на Израиля:
32:15	яко от­вратитеся от­ Него, при­­ложити еще оставити его въ пустыни, и воз­беззакон­нуете на весь сонмъ сей.
32:16	И прiидоша къ нему и глаголаша: ограды овцамъ да соградимъ здѣ скотомъ сво­имъ, и грады имѣниемъ нашымъ:
32:17 См.: 🔗Втор. 3:18	и мы вооружени пойдемъ на стражбу первiи сыномъ Израилевымъ, дондеже введемъ я въ мѣсто ихъ: и да вселят­ся имѣнiя наша во градѣхъ утвержденыхъ ради живущихъ на земли:
32:18 См.: 🔗Нав. 22:1	не воз­вратимся въ домы нашя, дондеже раздѣлят­ся сынове Израилтестiи, кійждо въ наслѣдiе свое:
32:19 См.: 🔗Втор. 3:12	и ктому не наслѣдимъ въ нихъ объ ону страну Иордана и далѣе, яко прiяхомъ жребiя нашя сiю страну Иордана на востоки.
32:20 См.: 🔗Нав. 1:13	И рече къ нимъ Моисей: аще сотворите по словеси сему, аще вооружитеся предъ Господемъ на брань,
32:21	и прейдетъ всякъ оружникъ вашъ Иорданъ предъ Господемъ на брань, дондеже потребит­ся врагъ Его от­ лица Его,
32:22	и обладана будетъ земля предъ Господемъ, и посемъ воз­вратитеся, и будете безвин­ни предъ Господемъ и от­ Израиля: и будетъ земля сiя вамъ во одержанiе предъ Господемъ:
32:23	аще же не сотворите тако, согрѣшите предъ Господемъ, и увѣсте грѣхъ вашъ, егда васъ постигнутъ злая:
32:24 См.: 🔗Втор. 23:23	и соградите вы себѣ грады имѣнiю ва­шему и ограды скотомъ вашымъ: и исходящее изъ устъ вашихъ сотворите.
32:25	И рекоша сынове Рувимли и сынове Гадовы къ Моисею, глаголюще: раби тво­и сотворятъ, якоже Господь нашъ повелѣлъ есть:
32:26	имѣнiе на­ше, и жены наши, и весь скотъ нашъ да будутъ во градѣхъ Галаадовыхъ:
32:27	раби же тво­и прейдутъ вси вооружени и уготовани предъ Господемъ на брань, якоже глаголетъ Господь.
32:28	И при­­стави имъ Моисей Елеазара жерца и Иисуса сына Навина, и князи отече­ст­въ племенъ сыновъ Израилевыхъ.
32:29 См.: 🔗Нав. 4:12	И рече къ нимъ Моисей: аще прейдутъ сынове Рувимли и сынове Гадовы съ вами чрезъ Иорданъ, всякъ вооруженъ на брань предъ Господемъ, и обладаете землею предъ собою, и дадите имъ землю Галаадову во одержанiе.
32:30	Аще ли не прейдутъ вооружени съ вами на брань предъ Господемъ, то предпослите имѣнiе ихъ и жены ихъ и скоты ихъ прежде васъ на землю Ханааню, и да наслѣдятъ купно съ вами въ земли Ханаани.
32:31	И от­вѣщаша сынове Рувимли и сынове Гадовы, глаголюще: елика глаголетъ Господь рабомъ Сво­имъ, тако сотворимъ мы:
32:32	прейдемъ вооружени предъ Господемъ въ землю Ханааню, и дадите намъ во одержанiе страну сiю Иордана.
32:33 См.: 🔗Втор. 3:12 🔗Нав. 13:8	И даде имъ Моисей сыномъ Гадовымъ и сыномъ Рувимлимъ и полуплемени Манассіину сыновъ Иосифовыхъ цар­ст­во Сиона царя Аморрейска и цар­ст­во Ога царя Васанска, землю и грады съ предѣлы ея, грады окрестныя земли.
32:34	И соградиша сынове Гадовы Девонъ и Атароѳъ и Аро­иръ,
32:35	и Софанъ и Иазиръ, и воз­несоша ихъ,
32:36	и Намрамъ и Веѳаранъ грады тверды, и ограды овцамъ.
32:37	И сынове Рувимли соградиша Есевонъ и Елеали и Карiаѳаимъ,
32:38	и Навонъ и Веельмеонъ ограждены, и Севама: и прозваша по именомъ сво­имъ имена градомъ, яже соградиша.
32:39 См.: 🔗Быт. 50:23	И иде уръ сынъ Махировъ, внукъ Манассіевъ, въ Галаадъ, и взя его, и погуби Аморреа живущаго въ немъ:
32:40	и даде Моисей Галаадъ Махиру сыну Манассіину, и вселися ту.
32:41 См.: 🔗Нав. 13:30 🔗1Пар. 2:22	И Иаиръ сынъ Манассіевъ иде и взя села ихъ, и прозваша я села Иаирова.
32:42 См.: 🔗Чис. 21:25 🔗Суд. 8:11 🔗1Пар. 2:23	И Нававъ иде и взя Кааѳа и села его, и именова я Навоѳъ от­ имене сво­его.