Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 21 | |
21:1 См.: 🔗Ис. 65:17 🔗2Пет. 3:13 | И видѣхъ небо ново и землю нову: первое бо небо и земля первая преидоста, и моря нѣсть ктому. |
21:2 | И азъ Иоаннъ видѣхъ градъ святый, Иерусалимъ новъ сходящь от Бога съ небесе, приготованъ яко невѣсту украшену мужу своему. |
21:3 См.: 🔗Лев. 26:12 🔗Иез. 43:7 | И слышахъ гласъ велiй съ небесе, глаголющь: се, скинiя Божiя съ человѣки, и вселится съ ними: и тіи людiе Его будутъ, и Самъ Богъ будетъ съ ними Богъ ихъ: |
21:4 | и отъиметъ Богъ всяку слезу от очiю ихъ, и смерти не будетъ ктому: ни плача, ни вопля, ни болѣзни не будетъ ктому, яко первая мимоидоша. |
21:5 См.: 🔗Ис. 43:19 🔗2Кор. 5:17 | И рече Сѣдяй на престолѣ: се, нова вся творю. И глагола ми: напиши, яко сiя словеса истинна и вѣрна суть. |
21:6 См.: 🔗Отк. 1:8 🔗Отк. 22:13 | И рече ми: совершишася. Азъ есмь Алфа и Омега, начатокъ и конецъ: Азъ жаждущему дамъ от источника воды животныя туне. |
21:7 См.: 🔗Евр. 8:10 | Побѣждаяй наслѣдитъ вся, и буду ему Богъ, и той будетъ Мнѣ въ сына. |
21:8 См.: 🔗1Кор. 6:9 🔗Гал. 5:19 | Страшливымъ же и невѣрнымъ, и сквернымъ и убійцамъ, и блудъ творящымъ и чары творящымъ, идоложерцемъ и всѣмъ лживымъ, часть имъ въ езерѣ горящемъ огнемъ и жупеломъ, еже есть смерть вторая. |
21:9 См.: 🔗Отк. 15:1 🔗Отк. 19:7 | И прiиде ко мнѣ единъ от седми Ангелъ, имущихъ седмь фiалъ исполненыхъ седмихъ язвъ послѣднихъ, и рече ко мнѣ, глаголя: гряди, покажу ти невѣсту Агнчу жену. |
21:10 | И веде мя духомъ на гору велику и высоку и показа ми градъ великiй, святый Иерусалимъ низходящь съ небесе от Бога, |
21:11 | имущь славу Божiю: и свѣтило его подобно камени драгому, яко камени Иаспису кристалловидну: |
21:12 См.: 🔗Иез. 48:31 | имущь стѣну велику и высоку, имущь вратъ дванадесять, и на вратѣхъ Ангеловъ дванадесять и имена написана, яже суть имена дванадесятимъ колѣномъ сыновъ Израилевыхъ: |
21:13 | от востока врата троя и от сѣвера врата троя, от юга врата троя и от запада врата троя. |
21:14 | И стѣна града имѣяше основанiй дванадесять, и на нихъ именъ дванадесять апостоловъ Агнчихъ. |
21:15 См.: 🔗Иез. 40:3 | И глаголяй со мною имѣяше трость злату, да измѣритъ градъ и врата его и стѣны его. |
21:16 | И градъ на четыри углы стоитъ, и долгота его толика есть, елика же и широта. И измѣри градъ тростiю на стадiй дванадесять тысящъ: долгота и широта и высота его равна суть. |
21:17 | И размѣри стѣну его во сто и четыридесять и четыри лакти, въ мѣру человѣческу, яже есть Ангела. |
21:18 | И бѣ созданiе стѣны его Иасписъ: и градъ злато чисто, подобенъ стклу чисту. |
21:19 См.: 🔗Исх. 28:17 🔗Ис. 54:11 | И основанiя стѣны града всякимъ драгимъ каменiемъ украшена бяху: основанiе первое Иасписъ, второе сапфиръ, третiе халкидонъ, четвертое смарагдъ, |
21:20 | пятое сардониксъ, шестое Сардiй, седмое хрисолиѳъ, осмое вириллъ, девятое топазiй, десятое хрисопрасъ, первоенадесять иакинѳъ, второенадесять амеѳистъ. |
21:21 | И дванадесять вратъ дванадесять бисеровъ: едина каяждо врата бѣша от единаго бисера. И стогны града злато чисто, яко сткло пресвѣтло. |
21:22 | И храма не видѣхъ въ немъ: Господь бо Богъ Вседержитель храмъ ему есть, и Агнецъ. |
21:23 См.: 🔗Ис. 60:19 🔗Отк. 22:5 | И градъ не требуя солнца и луны, да свѣтятъ въ немъ, слава бо Божiя просвѣти его, и свѣтилникъ его Агнецъ. |
21:24 См.: 🔗Ис. 60:3 | И языцы спасени во свѣтѣ его пойдутъ, и царiе земстiи принесутъ славу и честь свою въ него. |
21:25 См.: 🔗Ис. 60:11 🔗Отк. 22:5 | И врата его не имутъ затворитися во дни: нощи бо не будетъ ту. |
21:26 | И принесутъ славу и честь языковъ въ него: |
21:27 См.: 🔗Ис. 35:8 🔗Отк. 20:12 | и не имать въ него внити всяко скверно, и творяй мерзость и лжу, но токмо написаныя въ книгахъ животныхъ Агнца. |