Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 1 | |
1:1 | Въ началѣ сотвори Богъ небо и землю. |
1:2 | Земля же бѣ невидима и неустроена, и тма верху бездны, и Духъ Божiй ношашеся верху воды. |
1:3 См.: 🔗Пс. 32:9 | И рече Богъ: да будетъ свѣтъ. И бысть свѣтъ. |
1:4 | И видѣ Богъ свѣтъ, яко добро, и разлучи Богъ между свѣтомъ и между тмою. |
1:5 | И нарече Богъ свѣтъ день, а тму нарече нощь. И бысть вечеръ, и бысть утро, день единъ. |
1:6 | И рече Богъ: да будетъ твердь посредѣ воды, и да будетъ разлучающи посредѣ воды и воды. И бысть тако. |
1:7 | И сотвори Богъ твердь, и разлучи Богъ между водою, яже бѣ подъ твердiю, и между водою, яже бѣ надъ твердiю. |
1:8 | И нарече Богъ твердь небо. И видѣ Богъ, яко добро. И бысть вечеръ, и бысть утро, день вторый. |
1:9 См.: 🔗Пс. 32:7 🔗Пс. 135:6 | И рече Богъ: да соберется вода, яже подъ небесемъ, въ собранiе едино, и да явится суша. И бысть тако. И собрася вода, яже подъ небесемъ, въ собранiя своя, и явися суша. |
1:10 | И нарече Богъ сушу землю, и собранiя водъ нарече моря. И видѣ Богъ, яко добро. |
1:11 | И рече Богъ: да прораститъ земля былiе травное, сѣющее сѣмя по роду и по подобiю, и древо плодовитое творящее плодъ, емуже сѣмя его въ немъ, по роду на земли. И бысть тако. |
1:12 | И изнесе земля былiе травное, сѣющее сѣмя по роду и по подобiю, и древо плодовитое творящее плодъ, емуже сѣмя его въ немъ, по роду на земли. И видѣ Богъ, яко добро. |
1:13 | И бысть вечеръ, и бысть утро, день третiй. |
1:14 См.: 🔗Пс. 135:7 | И рече Богъ: да будутъ свѣтила на тверди небеснѣй, освѣщати землю и разлучати между днемъ и между нощiю: и да будутъ въ знаменiя и во времена, и во дни и въ лѣта, |
1:15 | и да будутъ въ просвѣщенiе на тверди небеснѣй, яко свѣтити по земли. И бысть тако. |
1:16 См.: 🔗Втор. 4:19 🔗Иер. 31:35 | И сотвори Богъ два свѣтила великая: свѣтило великое въ начала дне, и свѣтило меншее въ начала нощи, и звѣзды: |
1:17 | и положи я Богъ на тверди небеснѣй, яко свѣтити на землю, |
1:18 См.: 🔗Пс. 103:19 | и владѣти днемъ и нощiю, и разлучати между свѣтомъ и между тмою. И видѣ Богъ, яко добро. |
1:19 | И бысть вечеръ, и бысть утро, день четвертый. |
1:20 | И рече Богъ: да изведутъ воды гады душъ живыхъ, и птицы летающыя по земли, по тверди небеснѣй. И бысть тако. |
1:21 См.: 🔗Иов. 40:20 🔗Пс. 103:25 | И сотвори Богъ киты великiя, и всяку душу животныхъ гадовъ, яже изведоша воды по родомъ ихъ, и всяку птицу пернату по роду. И видѣ Богъ, яко добра. |
1:22 См.: 🔗Быт. 8:17 | И благослови я Богъ, глаголя: раститеся и множитеся, и наполните воды, яже въ моряхъ, и птицы да умножатся на земли. |
1:23 | И бысть вечеръ, и бысть утро, день пятый. |
1:24 См.: 🔗Иов. 12:7 🔗Сир. 16:31 | И рече Богъ: да изведетъ земля душу живу по роду, четвероногая и гады, и звѣри земли по роду. И бысть тако. |
1:25 | И сотвори Богъ звѣри земли по роду, и скоты по роду ихъ, и вся гады земли по роду ихъ. И видѣ Богъ, яко добра. |
1:26 | И рече Богъ: сотворимъ человѣка по образу Нашему и по подобiю, и да обладаетъ рыбами морскими, и птицами небесными, [и звѣрьми] и скотами, и всею землею, и всѣми гады пресмыкающимися по земли. |
1:27 | И сотвори Богъ человѣка, по образу Божiю сотвори его: мужа и жену сотвори ихъ. |
1:28 См.: 🔗Быт. 8:17 🔗Быт. 9:1 | И благослови ихъ Богъ, глаголя: раститеся и множитеся, и наполните землю, и господствуйте ею, и обладайте рыбами морскими, [и звѣрьми] и птицами небесными, и всѣми скотами, и всею землею, и всѣми гадами пресмыкающимися по земли. |
1:29 См.: 🔗Быт. 9:3 | И рече Богъ: се, дахъ вамъ всякую траву сѣменную сѣющую сѣмя, еже есть верху земли всея: и всякое древо, еже имать въ себѣ плодъ сѣмене сѣменнаго, вамъ будетъ въ снѣдь: |
1:30 | и всѣмъ звѣремъ земнымъ, и всѣмъ птицамъ небеснымъ, и всякому гаду пресмыкающемуся по земли, иже имать въ себѣ душу живота, и всяку траву зелену въ снѣдь. И бысть тако. |
1:31 См.: 🔗Пс. 110:3 🔗Сир. 39:21 | И видѣ Богъ вся, елика сотвори: и се добра зѣло. И бысть вечеръ, и бысть утро, день шестый. |