Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 38 | |
38:1 | Почитай врача противу потребъ честiю его, ибо Господь созда его: |
38:2 | от вышняго бо есть изцѣленiе, и от царя прiиметъ даръ. |
38:3 | Художество врача вознесетъ главу его, и предъ вельможами удивимь будетъ. |
38:4 | Господь созда от земли врачеванiя, и мужъ мудрый не возгнушается ими. |
38:5 См.: 🔗Исх. 15:25 | Не от древа ли осладися вода, да познана будетъ сила его? |
38:6 | И той далъ есть художество человѣкомъ, да славится въ чудесѣхъ своихъ: |
38:7 | тѣми уврачева и отъятъ болѣзни ихъ. |
38:8 См.: 🔗Иак. 1:17 | Мироварецъ сими состроитъ смѣшенiе, и не скончаются дѣла его, и миръ от него есть на лицы земли. |
38:9 См.: 🔗Ис. 38:2 🔗Иак. 5:14 | Чадо, въ болѣзни твоей не презирай, но молися Господеви, и той тя изцѣлитъ: |
38:10 | отступи от прегрѣшенiя и направи руцѣ, и от всякаго грѣха очисти сердце [твое]: |
38:11 | даждь благоуханiе и память семидала и умасти приношенiе, акибы не первѣе приносяй: |
38:12 | и даждь мѣсто врачу, Господь бо его созда: и да не удалится от тебе, потребенъ бо ти есть. |
38:13 | Есть время, егда въ руку его благоуханiе: |
38:14 | ибо и тіи Господеви молятся, да управитъ имъ покой и изцѣленiе ради оздравленiя. |
38:15 См.: 🔗Втор. 28:21 | Согрѣшаяй предъ сотворшимъ его впадетъ въ руцѣ врачу. |
38:16 См.: 🔗1Фес. 4:13 | Чадо, надъ мертвецемъ источи слезы и якоже злѣ страждущь начни плачь: и якоже достоитъ ему, соскутай тѣло его и не презри погребенiя его. |
38:17 См.: 🔗Прит. 15:13 | Горекъ сотвори плачь и рыданiе тепло, и сотвори сѣтованiе, якоже ему достоитъ, день единъ и два хуленiя ради, и утѣшися печали ради: |
38:18 См.: 🔗Прит. 17:22 🔗Сир. 30:25 | от печали бо смерть бываетъ, и печаль сердечная слячетъ крѣпость. |
38:19 | Въ нанесенiи пребываетъ и печаль, и житiе нищаго въ сердцы. |
38:20 | Не даждь въ печаль сердца твоего, остави ю помянувъ послѣдняя. |
38:21 См.: 🔗2Цар. 12:23 | Не забуди, нѣсть бо возвращенiя: и ему пользы не сотвориши, и себе озлобиши. |
38:22 | Помяни судъ его, яко сице и твой: мнѣ вчера, а тебѣ днесь. |
38:23 См.: 🔗2Цар. 12:20 | Въ покои мертвеца упокой память его, и утѣшися о немъ во исходѣ духа его. |
38:24 | Премудрость книжника во благовременiи празднества, и умаляяйся дѣянiемъ своимъ упремудрится. |
38:25 | Чимъ умудрится держай орало и хваляйся остномъ, гоняй волы и обращаяйся въ дѣлѣхъ ихъ, и повѣсть его въ сынѣхъ юнчихъ? |
38:26 | Сердце свое дастъ возрыти бразды, и бдѣнiе его на насыщенiихъ юницъ. |
38:27 | Тако всякъ древодѣля и архитектонъ, иже нощи яко дни провождаетъ, дѣлая изваянiя печатей, и прилѣжанiе его измѣнити различiе: |
38:28 | сердце свое дастъ уподобити живописанiе, и бдѣнiе его еже совершити дѣло. |
38:29 | Такожде и ковачь сѣдя близъ наковални и соглядаяй дѣло желѣза: куренiе огня удручитъ тѣло его, и теплотою пещи утрудится: |
38:30 | гласъ млата обновитъ ухо его, и прямо подобiю сосуда очи его: |
38:31 | сердце свое вдастъ на скончанiе дѣлъ, и бдѣнiе его украсити до конца. |
38:32 См.: 🔗Иер. 18:3 🔗Прем. 15:7 | Такожде и скудельникъ сѣдя на дѣлѣ своемъ и вертя ногама своима коло, |
38:33 | иже въ печали лежитъ выну на дѣлѣ своемъ, изчисляемо все дѣланiе его: |
38:34 | мышцею своею вообразитъ бренiе и предъ ногама преклонитъ крѣпость его: |
38:35 | сердце свое вдастъ скончати сосудъ, и бдѣнiе его очистити пещь. |
38:36 См.: 🔗Сир. 10:30 | Вси сіи на руки своя надѣются, и кійждо въ дѣлѣ своемъ умудряется. |
38:37 | Безъ тѣхъ не населится градъ, и не вселятся, ни походятъ и въ соборище не возмутся: |
38:38 | на престолѣ же судій не сядутъ и завѣта суду не размыслятъ, ниже имутъ извѣщати наказанiя и суда, и въ притчахъ не обрящутся: |
38:39 | но токмо зданиемъ житейскимъ прилѣжатъ, и моленiе ихъ въ дѣланiи художества. |