Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 5 | |
5:1 | [Зач. 13.] Мужъ же нѣкiй, Ананiа именемъ, съ Сапфирою женою своею, продаде село |
5:2 | и утаи от цѣны, свѣдущей и женѣ его: и принесъ часть нѣкую, предъ ногами апостолъ положи. |
5:3 См.: 🔗Чис. 30:3 🔗Еккл. 5:3 | Рече же Петръ: Ананiе, почто исполни сатана сердце твое солгати Духу Святому и утаити от цѣны села? |
5:4 | Сущее тебѣ не твое ли бѣ, и проданое не въ твоей ли власти бяше? Что яко положилъ еси въ сердцы твоемъ вещь сiю? Не человѣкомъ солгалъ еси, но Богу. |
5:5 | Слышавъ же Ананiа словеса сiя, падъ издше: и бысть страхъ великъ на всѣхъ слышащихъ сiя. |
5:6 | Вставше же юноши взяша его и изнесше погребоша. |
5:7 | Бысть же яко трiемъ часомъ минувшымъ, и жена его не вѣдущи бывшаго вниде. |
5:8 | Отвѣща же ей Петръ: рцы ми, аще на толицѣ село отдаста? Она же рече: ей, на толицѣ. |
5:9 | Петръ же рече къ ней: что яко согласистася искусити Духа Господня? Се, ноги погребшихъ мужа твоего при дверехъ, и изнесутъ тя. |
5:10 | Паде же абiе предъ ногама его и издше: вшедше же юноши обрѣтоша ю мертву и изнесше погребоша близъ мужа ея. |
5:11 | И бысть страхъ великъ на всей церкви и на всѣхъ слышашихъ сiя. |
5:12 См.: 🔗Деян. 2:43 🔗Рим. 5:19 | [Зач. 14.] Руками же апостолскими быша знаменiя и чудеса въ людехъ многа: и бяху единодушно вси въ притворѣ Соломони: |
5:13 | от прочихъ же никтоже смѣяше прилѣплятися имъ, но величаху ихъ людiе. |
5:14 См.: 🔗Деян. 2:47 🔗Деян. 11:21 | Паче же прилагахуся вѣрующiи Господеви, множество мужей же и женъ, |
5:15 | яко и на стогны износити недужныя и полагати на постелехъ и на одрѣхъ, да грядущу Петру поне сѣнь его осѣнитъ нѣкоего от нихъ. |
5:16 | Схождашеся же и множество от окрестныхъ градовъ во Иерусалимъ, приносяще недужныя и страждущыя от духъ нечистыхъ, иже исцѣлѣвахуся вси. |
5:17 | Воставъ же архiерей и вси иже съ нимъ, сущая ересь саддукейская, исполнишася зависти, |
5:18 | и возложиша руки своя на апостолы и послаша ихъ въ соблюденiе общее. |
5:19 | Ангелъ же Господень нощiю отверзе двери темницы, изведъ же ихъ, рече: |
5:20 См.: 🔗Ин. 6:68 | идите и ставше глаголите въ церкви людемъ вся глаголы жизни сея. |
5:21 | [Зач. 15.] Слышавше же внидоша по утреницѣ {утро} въ церковь и учаху. Пришедъ же архiерей и иже съ нимъ, созваша соборъ и вся старцы от сыновъ Израилевыхъ и послаша во узилище, привести ихъ. |
5:22 | Слуги же шедше не обрѣтоша ихъ въ темницѣ, возвращшежеся возвѣстиша, |
5:23 | глаголюще, яко темницу убо обрѣтохомъ заключену со всякимъ утвержденiемъ и блюстители стоящыя предъ дверьми: отверзше же, внутрь ни единаго обрѣтохомъ. |
5:24 | Якоже слышаша словеса сiя архiерей же и воевода церковный и первосвященницы, недоумѣвахуся о нихъ, что убо будетъ сiе. |
5:25 | Пришедъ же нѣкто возвѣсти имъ, глаголя, яко се, мужiе, ихже всадисте въ темницу, суть въ церкви стояще и учаще люди. |
5:26 | Тогда шедъ воевода со слугами, приведе ихъ не съ нуждею, бояхуся бо людій, да не каменiемъ побiютъ ихъ: |
5:27 | приведше же ихъ, поставиша на сонмищи, и вопроси ихъ архiерей, глаголя: |
5:28 | не запрещенiемъ ли запретихомъ вамъ не учити о имени семъ? И се, исполнисте Иерусалимъ ученiемъ вашимъ и хощете навести на ны кровь Человѣка Сего. |
5:29 См.: 🔗Деян. 4:19 | Отвѣщавъ же Петръ и апостоли рѣша: повиноватися подобаетъ Богови паче, нежели человѣкомъ: |
5:30 См.: 🔗Деян. 3:15 | Богъ отецъ нашихъ воздвиже Иисуса, Егоже вы убисте, повѣсивше на древѣ: |
5:31 | Сего Богъ Началника и Спаса возвыси десницею Своею, дати покаянiе Израилеви и оставленiе грѣховъ: |
5:32 См.: 🔗Ин. 15:26 🔗Деян. 3:15 | и мы есмы Того свидѣтелiе глаголъ сихъ, и Духъ Святый, Егоже даде Богъ повинующымся Ему. |
5:33 | Они же слышавше распыхахуся и совѣщаша убити ихъ. |
5:34 | Воставъ же нѣкiй на сонмищи фарисей, именемъ Гамалiилъ, законоучитель честенъ всѣмъ людемъ, повелѣ внѣ мало что апостоломъ уступити, |
5:35 | рече же къ нимъ: мужiе Израилтяне, внимайте себѣ о человѣцѣхъ сихъ, что хощете сотворити: |
5:36 См.: 🔗Деян. 21:38 | предъ сими бо денми воста Ѳевда, глаголя быти велика нѣкоего себе, емуже прилѣпишася числомъ мужей яко четыреста: иже убiенъ бысть, и вси, елицы повинушася ему, разыдошася и быша ни во чтоже: |
5:37 См.: 🔗Лк. 2:2 | по семъ воста Иуда Галилеанинъ во дни написанiя и отвлече люди доволны вслѣдъ себе: и той погибе, и вси, елицы послушаша его, разсыпашася: |
5:38 См.: 🔗Мф. 15:13 | и нынѣ, глаголю вамъ, отступите от человѣкъ сихъ и оставите ихъ: яко аще будетъ от человѣкъ совѣтъ сей или дѣло сiе, разорится, |
5:39 См.: 🔗Лк. 21:15 | аще ли же от Бога есть, не можете разорити то, да не како и богоборцы обрящетеся. |
5:40 | Послушаша же его, и призвавше апостолы, бивше запретиша имъ не глаголати о имени Иисусовѣ и отпустиша ихъ. |
5:41 | Они же убо идяху радующеся от лица собора, яко за имя Господа Иисуса сподобишася безчестiе прiяти: |
5:42 | по вся же дни въ церкви и въ домѣхъ не престаяху учаще и благовѣствующе Иисуса Христа. |