Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 3 | |
3:1 | И вниде паки въ сонмище: и бѣ тамо человѣкъ, суху имый руку. |
3:2 | И назираху Его, аще въ субботы исцѣлитъ его, да Нань возглаголютъ. |
3:3 | И глагола человѣку суху имущему руку: стани посредѣ. |
3:4 | И глагола имъ: достоитъ ли въ субботы добро творити, или зло творити? Душу спасти, или погубити? Они же молчаху. |
3:5 | И воззрѣвъ на нихъ со гнѣвомъ, скорбя о окамененiи сердецъ ихъ, глагола человѣку: простри руку твою. И простре: и утвердися рука его цѣла яко другая. |
3:6 См.: 🔗Ин. 10:39 | [Зач. 11.] И изшедше фарисее, абiе со иродiаны совѣтъ творяху Нань, како Его погубятъ. |
3:7 См.: 🔗Мф. 4:25 | Иисусъ же отъиде со ученики Своими къ морю: и многъ народъ от Галилеи по Немъ иде, и от Иудеи, |
3:8 | и от Иерусалима, и от Идумеи, и со онаго полу Иордана. И от Тира и Сидона множество многое, слышавше, елика творяше, [и] прiидоша къ Нему. |
3:9 | И рече ученикомъ Своимъ, да корабль будетъ у Него народа ради, да не стужаютъ Ему. |
3:10 | Многи бо исцѣли, якоже нападати на Него, да Ему прикоснутся, елицы имѣяху раны. |
3:11 См.: 🔗Мф. 16:16 | И дуси нечистiи, егда видяху Его, припадаху къ Нему и зваху, глаголюще, яко Ты еси Сынъ Божiй. |
3:12 | И много прещаше имъ, да не явлена Его сотворятъ. |
3:13 | [Зач. 12.] И взыде на гору и призва, ихже хотяше Самъ: и прiидоша къ Нему. |
3:14 | И сотвори дванадесяте, да будутъ съ Нимъ, и да посылаетъ ихъ проповѣдати, |
3:15 | и имѣти власть цѣлити недуги и изгонити бѣсы: |
3:16 См.: 🔗Мф. 16:18 | и нарече Симону имя Петръ: |
3:17 | и Иакова Зеведеова и Иоанна брата Иаковля: и нарече има имена Воанергесъ, еже есть сына громова: |
3:18 | и Андреа, и Филиппа, и Варѳоломеа, и Матѳеа, и Ѳому, и Иакова Алфеова, и Ѳаддеа, и Симона Кананита, |
3:19 | и Иуду Искарiотскаго, иже и предаде Его. |
3:20 | [Зач. 13.] И прiидоша въ домъ: и собрася паки народъ, яко не мощи имъ ни хлѣба ясти. |
3:21 См.: 🔗Ин. 10:20 | И слышавше иже бяху у Него, изыдоша, да имутъ Его: глаголаху бо, яко неистовъ есть. |
3:22 См.: 🔗Мф. 9:34 🔗Лк. 11:15 | И книжницы, иже от Иерусалима низшедшiи, глаголаху, яко веельзевула имать и яко о князи бѣсовстѣмъ изгонитъ бѣсы. |
3:23 | И призвавъ ихъ, въ притчахъ глаголаше имъ: како можетъ сатана сатану изгонити? |
3:24 См.: 🔗Мф. 12:25 🔗Лк. 11:17 | И аще царство на ся раздѣлится, не можетъ стати царство то: |
3:25 | и аще домъ на ся раздѣлится, не можетъ стати домъ той: |
3:26 | и аще сатана воста на ся самъ и раздѣлися, не можетъ стати, но конецъ имать. |
3:27 | Никтоже можетъ сосуды крѣпкаго, вшедъ въ домъ его, расхитити, аще не первѣе крѣпкаго свяжетъ: и тогда домъ его расхититъ. |
3:28 | [Зач. 14.] Аминь глаголю вамъ, яко вся отпустятся согрѣшенiя сыномъ человѣческимъ, и хуленiя, елика аще восхулятъ: |
3:29 | а иже восхулитъ на Духа Святаго, не имать отпущенiя во вѣки, но повиненъ есть вѣчному суду. |
3:30 | Зане глаголаху: духа нечистаго имать. |
3:31 См.: 🔗Мф. 12:46 🔗Лк. 8:19 | Прiидоша убо Мати и братiя Его, и внѣ стояще послаша къ Нему, зовуще Его. |
3:32 | И сѣдяше народъ окрестъ Его. Рѣша же Ему: се, Мати Твоя и братiя Твоя [и сестры Твоя] внѣ ищутъ Тебе. |
3:33 | И отвѣща имъ, глаголя: кто есть мати Моя, или братiя Моя? |
3:34 | И соглядавъ окрестъ Себе сѣдящыя, глагола: се, мати Моя и братiя Моя: |
3:35 | иже бо аще сотворитъ волю Божiю, сей братъ Мой и сестра Моя и мати [Ми] есть. |