Первая книга Маккавейская, глава 4 неканонич.

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 4
4:1	И взя горгіа пять тысящъ мужей и тысящу кон­никъ избран­ныхъ, и подвигоша полкъ нощiю,
4:2	еже напасти на полкъ Иудейскiй и побити ихъ внезапу, и сынове краеградiя быша ему вождеве.
4:3	И услыша Иуда, и воста самъ и сильнiи, побити силу цареву, яже въ Еммаумѣ:
4:4	еще бо силы расточены быша от­ полка.
4:5	И прiиде горгіа въ полкъ Иудинъ нощiю и ни единаго обрѣте: и иска­ше ихъ въ горахъ, понеже рече: бѣжатъ сіи от­ насъ.
4:6	И вкупѣ со днемъ явися Иуда на поли со тремя тысящами мужей: обаче щитовъ и мечей не имяху, якоже хотяху.
4:7	И видѣша полкъ языческiй крѣпокъ вооруженъ и кон­ники окрестъ его, и сіи научени брани.
4:8	И рече Иуда мужемъ, иже съ нимъ бяху: не убойтеся множе­ст­ва ихъ и устремленiя ихъ не ужасайтеся:
4:9 См.: 🔗Исх. 14:9	помяните, како спасени быша отцы наши въ мори чермнѣмъ, егда гоняше ихъ фараонъ съ вои многими:
4:10	и нынѣ возопіимъ на небо, негли како умилосердит­ся на ны и помянетъ завѣтъ отцевъ нашихъ и сокрушитъ полкъ сей предъ лицемъ нашимъ днесь:
4:11	и увѣдятъ вси языцы, яко есть избавляяй и спасаяй Израиля.
4:12	И воз­ведоша иноплемен­ницы очи сво­и и видѣша ихъ грядущихъ сопротиву,
4:13	и изыдоша изъ полка на брань и вострубиша иже со Иудою.
4:14	И сразишася: и сотрени быша языцы и побѣгоша въ поле,
4:15	послѣднiи же вси падоша мечемъ: и прогнаша ихъ даже до Ассаримоѳа и даже до поль Идумейскихъ и азотскихъ и Иамнійскихъ, и падоша от­ нихъ до трiехъ тысящъ мужей.
4:16	И воз­вратися Иуда и вои его от­ гоненiя вслѣдъ ихъ,
4:17	и рече къ людемъ: не вожделѣйте корыстей, понеже брань противу насъ:
4:18	и горгіа и вои его близъ насъ на горѣ: но стойте нынѣ противу враговъ нашихъ и поборите ихъ, и по сихъ возмете корысти безъ боязни.
4:19	И еще глаголющу Иудѣ сiя, се, явися часть нѣкая при­­ницающая съ горы.
4:20	И видѣ, яко въ бѣгъ обратишася, и зажгоша полкъ, иже суть со Иудою, дымъ бо зримый являше быв­шее.
4:21	Смотрящiи же сiя убояшася зѣло: видяще же ополченiе Иудино въ поли готово на брань, бѣжаша вси въ землю иноплемен­никовъ.
4:22	И обратися Иуда на корысти ополченiя:
4:23	и взя злата много и сребра, и иакинѳа и порфиры морскія, и богат­ст­ва велика.
4:24 См.: 🔗Пс. 105:1 🔗Пс. 117:1	И воз­вращающеся пѣснь пояху и благословляху Бога небеснаго, яко благъ есть, яко въ вѣкъ милость его.
4:25	И бысть спасенiе велико Израилю въ день онъ.
4:26	Елицы же от­ иноплемен­никовъ уцѣлѣша, при­­шедше воз­вѣстиша лисіи вся случив­шаяся.
4:27	Онъ же слышавъ уны душею и опечалися, яко не яже хотяше, такова быша Израилю, и не какова заповѣда ему царь, сицевая сбышася.
4:28	И во грядущее лѣто собра лисіа мужей избран­ныхъ шестьдесятъ тысящъ и кон­никовъ пять тысящъ, да побiетъ Иерусалимъ.
4:29	И прiидоша во Идумею и ополчишася во веѳсурѣхъ, и срѣте ихъ Иуда съ десятiю тысящьми мужей.
4:30 См.: 🔗1Цар. 14:13 🔗1Цар. 17:50	И видѣ полкъ крѣпокъ, и помолися, и рече: благословенъ еси, спасе Израилевъ, сокрушивый стремленiе сильнаго рукою раба тво­его давида, и предалъ еси полкъ иноплемен­ныхъ въ руки Ионаѳана сына Сауля и носящаго оружiе его:
4:31	заключи полкъ сей рукою людій тво­ихъ Израиля, и да постыдят­ся о силѣ и кон­ницѣ сво­ей:
4:32	даждь имъ боязнь и растай дерзость силы ихъ, и да поколеблют­ся сотренiемъ сво­имъ:
4:33	низложи ихъ мечемъ любящихъ тя, и да восхвалятъ тебе вси вѣдущiи имя твое въ пѣснехъ.
4:34	И составиша брань, и падоша от­ полка лисіи до пяти тысящъ мужей, и падоша предъ ними.
4:35	Видя же лисіа сво­его ополченiя быв­шее бѣжанiе, а Иудину быв­шую дерзость, и яко готови суть или жити, или умрети храбро, отъиде во Антiохію и собира­ше чуждихъ воевъ: и умноживъ быв­шее воин­ство, умысли паки прiити на Иудею.
4:36	Рече же Иуда и братiя его: се, сотрени суть врази наши, взыдемъ нынѣ очистити святая и обновити.
4:37	И собрася весь полкъ и взыдоша на гору Сiонъ:
4:38	и видѣша святыню опустошену, и жертвен­никъ оскверненъ, и врата сожжена, и въ при­­творѣхъ воз­растоша древiе аки въ дубравѣ, или аки во единѣй от­ горъ, и пастофорiа разбиена.
4:39	И растерзаша ризы своя и плакаша плачемъ велiимъ, и воз­ложиша пепелъ на главы своя,
4:40	и падоша лицемъ на землю, и вострубиша трубнымъ знаменiемъ, и возопиша на небо.
4:41	Тогда повелѣ Иуда мужемъ ратовати сущихъ въ краеградiи, дондеже очиститъ святая.
4:42	И избра священ­ники непорочны волители закона Божiя:
4:43	и очистиша святая и от­вергоша каменiе оскверненiя въ мѣсто нечисто:
4:44	и совѣтоваша о жертвен­ницѣ всесожженiя оскверненѣмъ, что ему сотворятъ:
4:45	и нападе имъ совѣтъ благъ разорити его, да не когда будетъ имъ въ поношенiе, яко оскверниша его языцы. и разориша жертвен­никъ,
4:46	и положиша каменiе на горѣ храма на мѣстѣ при­­личнѣмъ, дондеже прiидетъ пророкъ от­вѣщати о нихъ:
4:47 См.: 🔗Исх. 20:25 🔗Нав. 8:31	и взяша каменiе цѣло по закону и создаша жертвен­никъ новъ по прежнему.
4:48	И создаша святая и вся яже внутрь храма, и при­­творы освятиша,
4:49	и сотвориша сосуды святыя новы, и внесоша свѣтилникъ и жертвен­никъ всесожженiй и ѳимiамовъ и трапезу во храмъ,
4:50	и кадиша на жертвен­ницѣ, и воз­жгоша свѣтилники, яже на подсвѣщницѣ, и свѣтяху во храмѣ,
4:51 См.: 🔗2Мак. 10:3	и положиша на трапезѣ хлѣбы и простроша катапетасмы, и скончаша вся дѣла, яже творяху.
4:52	И зѣло рано восташа въ пятый и двадесятый день месяца девятаго: сей месяцъ хаслевъ, сто четыредесять осмаго лѣта.
4:53	И при­­несоша жертву по закону на олтарь всесожженiй новый, егоже сотвориша:
4:54	по времени и по дни, въ оньже оскверниша его языцы, во онъ обновися въ пѣснехъ и гуслехъ и кинирѣхъ и въ кимвалѣхъ.
4:55	И падоша вси людiе на лице свое и поклонишася, и благословиша на небо благопоспѣшив­шаго имъ:
4:56	и сотвориша обновленiе олтаря дній осмь, и при­­несоша всесожженiя съ веселiемъ, и пожроша жертву спасенiя и хваленiя,
4:57	и украсиша сущее предъ лицемъ храма вѣнцы златыми и щитами, и обновиша врата и пастофорiа, и поставиша двери.
4:58	И бысть веселiе въ людехъ велико зѣло, и от­вращено бысть поношенiе языковъ.
4:59 См.: 🔗2Мак. 1:18 🔗Ин. 10:22	И устави Иуда и братiя его и весь соборъ Израилевъ, да празднуют­ся дніе обновленiя олтаря во времена своя на всяко лѣто дній осмь, от­ двадесять пятаго дне месяца хаслевъ съ веселiемъ и радостiю.
4:60	И создаша во время оно гору Сiонъ, окрестъ стѣны высокiя и пирги крѣпки, да не когда при­­шедше языцы поперутъ я, якоже прежде сотвориша.
4:61	И посади ту воевъ хранити ю, и утвердиша ю хранити веѳсуру, еже имѣти людемъ въ твердыню противу лица Идумеи.