|
Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 5 | |
| 5:1 | И обратихся и возведохъ очи мои и видѣхъ, и се, серпъ летящь. |
| 5:2 | И рече ко мнѣ: что ты видиши? И рѣхъ: азъ вижду серпъ летящь, въ долготу лактей двадесять и въ широту десяти лактей. |
| 5:3 | И рече ко мнѣ: сiя клятва исходящая на лице всея земли: зане всякъ тать от сего даже до смерти отмщенъ будетъ, и всякъ кленыйся во лжу от сего до смерти отмстится. |
| 5:4 | И изнесу его, глаголетъ Господь Вседержитель, и внидетъ въ домъ татя и въ домъ кленущагося именемъ моимъ во лжу, и вселится посредѣ дому его, и скончаетъ его и древа его и каменiе его. |
| 5:5 | И изыде ангелъ глаголяй во мнѣ и рече ко мнѣ: воззри очима твоима и виждь исходящее сiе. И рѣхъ: |
| 5:6 | что есть? И рече: сiя мѣра исходящая. И рече: сiя неправда ихъ по всей земли. |
| 5:7 | И се, талантъ оловянъ вземляйся, и се, жена едина сѣдяше посредѣ мѣры. |
| 5:8 | И рече: сiя есть беззаконiе. И верже ю въ средину мѣры и вверже камень оловяный во уста ея. |
| 5:9 | И возведохъ очи мои и видѣхъ, и се, двѣ жены исходящыя, и духъ въ крилѣхъ ихъ, и тѣ имяху крила, яко крилѣ вдодовы: и взяша мѣру между землею и между небомъ. |
| 5:10 | И рѣхъ ко ангелу глаголющему во мнѣ: камо сiя относятъ мѣру? |
| 5:11 | И рече ко мнѣ: создати ей храмину въ земли Вавилонстѣй и уготовати, и положатъ ю тамо на уготованiе свое. |
