|
Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 5 | |
| 5:1 | Не уповай на имѣнiя твоя и не рцы: доволна ми суть. |
| 5:2 | Не послѣдуй души твоей и крѣпости твоей, еже ходити въ похотехъ сердца твоего, |
| 5:3 | и не рцы: кто мя преможетъ? Господь бо мстяй отмститъ ти. |
| 5:4 | Не рцы: согрѣшихъ, и что ми бысть? Господь бо есть долготерпѣливъ. |
| 5:5 | О очищенiи безстрашенъ не буди, прилагати грѣхи на грѣхи, |
| 5:6 | не рцы: щедрота его многа есть, множество грѣховъ моихъ очиститъ: |
| 5:7 | милость бо и гнѣвъ у него, и на грѣшницѣхъ почіетъ ярость его. |
| 5:8 | Не медли обратитися ко Господу и не отлагай день от дне: |
| 5:9 | внезапу бо изыдетъ гнѣвъ Господень, и во время мести погибнеши. |
| 5:10 | Не уповай на имѣнiя неправедна: ни чимже бо упользуютъ въ день наведенiя. |
| 5:11 | Не вѣй себе всякимъ вѣтромъ и не ходи всякимъ путемъ: сице грѣшникъ двоязыченъ. |
| 5:12 | Буди утвержденъ въ разумѣ твоемъ, и едино буди слово твое. |
| 5:13 | Буди скоръ въ слушанiи твоемъ, и съ долготерпѣнiемъ отвѣщавай отвѣтъ. |
| 5:14 | Аще есть въ тебѣ разумъ, отвѣщай искреннему: аще же ни, то буди рука твоя на устѣхъ твоихъ. |
| 5:15 | Слава и безчестiе въ бесѣдѣ и языкъ человѣчь паденiе ему. |
| 5:16 | Не слови шепотникъ и языкомъ твоимъ не уловляй: |
| 5:17 | на тати бо студъ есть и зазоръ лукавъ надъ двоязычнымъ. |
| 5:18 | О велицѣ и о малѣ не неразумѣвай. |
