Книга Притчей Соломоновых, глава 11

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) Українська English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 11
11:1 См.: 🔗Втор. 25:13	Мѣрила льстивая мерзость предъ Господемъ, вѣсъ же праведный прiятенъ ему.
11:2	Идѣже аще внидетъ досажденiе, тамо и безчестiе: уста же смирен­ныхъ по­учают­ся премудрости.
11:3	Умираяй праведникъ остави раскаянiе, удобна же бываетъ и посмѣятелна нечестивыхъ погибель.
11:4 См.: 🔗Прит. 10:2 🔗Сир. 5:10 🔗Иез. 7:19 🔗Соф. 1:18	Совершен­ство правыхъ наставитъ ихъ, и поползновенiе от­рицающихся плѣнитъ ихъ. Не упользуютъ имѣнiя въ день ярости: правда же избавитъ от­ смерти.
11:5	Правда непорочнаго исправляетъ пути, нечестiе же впадаетъ въ неправду.
11:6 См.: 🔗Прем. 5:15	Правда мужей правыхъ избавитъ ихъ, безсовѣтiемъ же уловляют­ся беззакон­нiи.
11:7	Скончав­шуся мужу праведну, не погибнетъ надежда: похвала же нечестивыхъ погибнетъ.
11:8 См.: 🔗Есф. 7:9 🔗Пс. 33:20	Праведный от­ лова убѣгнетъ, въ негоже мѣсто предает­ся нечестивый.
11:9	Во устѣхъ нечестивыхъ сѣть гражданомъ, чув­ст­во же праведныхъ благопоспѣшно.
11:10 См.: 🔗Прит. 28:12	Во благихъ праведныхъ исправит­ся градъ, и въ погибели нечестивыхъ радованiе.
11:11 См.: 🔗Быт. 18:32 🔗Сир. 16:5	Въ благословенiи правыхъ воз­высит­ся градъ, усты же нечестивыхъ раскопает­ся.
11:12	Ругает­ся гражданомъ лишен­ный разума, мужъ же мудръ безмолвiе водитъ.
11:13 См.: 🔗Прит. 20:19 🔗Сир. 27:17	Мужъ двоязыченъ от­крываетъ совѣты въ сонмищи, вѣрный же духомъ таитъ вещы.
11:14 См.: 🔗Прит. 15:22 🔗Прем. 6:26	Имже и нѣсть управленiя, падаютъ аки ли­ст­вiе, спасенiе же есть во мнозѣ совѣтѣ.
11:15	Лукавый злодѣй­ст­вуетъ, егда сочетавает­ся съ праведнымъ, ненавидитъ же гласа утвержденiя.
11:16	Жена благодатна воз­носитъ мужу славу: престолъ же безчестiя жена ненавидящая правды. Богат­ст­ва лѣнивiи скудни бываютъ, крѣпцыи же утверждают­ся богат­ст­вомъ.
11:17	Души сво­ей благотворитъ мужъ милостивый, погубляетъ же тѣло свое немилостивый.
11:18 См.: 🔗Гал. 6:8	Нечестивый творитъ дѣла неправедная: сѣмя же праведныхъ мзда истины.
11:19	Сынъ праведный раждает­ся въ животъ: гоненiе же нечестиваго въ смерть.
11:20 См.: 🔗Пс. 5:7 🔗Пс. 118:1	Мерзость Господеви путiе развращен­ни, прiятни же ему вси непорочнiи въ путехъ сво­ихъ.
11:21 См.: 🔗Прит. 16:5	Въ руку руцѣ вложивъ неправедно, не безъ муки будетъ злыхъ: сѣяй же правду прiиметъ мзду вѣрну.
11:22	Якоже усерязь златый въ ноздрехъ свинiи, тако женѣ зло­умнѣй лѣпота.
11:23 См.: 🔗Пс. 111:10	Желанiе праведныхъ все благое, надежда же нечестивыхъ погибнетъ.
11:24 См.: 🔗2Кор. 9:6	Суть, иже своя сѣюще, множайшая творятъ: суть же и собирающе чуждая, умаляют­ся.
11:25	Душа благословен­на всякая простая: мужъ ярый неблагообразенъ.
11:26	Удержаваяй пшеницу оставитъ ю языкомъ: продаяй пшеницу скупо, от­ народа проклятъ, благословенiе же Господне на главѣ подавающаго.
11:27	Творяй благая ищетъ благодати добры: ищущаго же злая постигнутъ его.
11:28 См.: 🔗Иов. 31:25 🔗Мф. 19:23 🔗1Тим. 6:17	Надѣяйся на богат­ст­во свое, сей падетъ: заступаяй же праведныхъ, той воз­сiяетъ.
11:29	Не сматряяй сво­его дому наслѣдитъ вѣтры: поработаетъ же безумный разумному.
11:30 См.: 🔗Прит. 3:18	От плода правды древо жизни прозябаетъ: отъ­емлют­ся же безвремен­но души беззакон­ныхъ.
11:31 См.: 🔗1Пет. 4:18	Аще праведный едва спасает­ся, нечестивый же и грѣшный гдѣ явит­ся?