Первая книга Маккавейская, глава 1 неканонич.

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 1
1:1	И бысть, егда поража­ше Александръ македонскiй сынъ Филиппа, иже изыде от­ земли Хеттiимъ, порази и дарiа царя персскаго и мидскаго, и воцарися вмѣсто его первый во Елладѣ,
1:2	и состави брани многи, и одержа твердыни многи, и уби цари земскiя,
1:3	и пройде даже до краевъ земли, и взя корысти многихъ языковъ. и умолче земля предъ нимъ. и воз­высися, и воз­несеся сердце его.
1:4	И собра силу крѣпку зѣло, и начал­ст­вова надъ странами и языки и мучительми, и быша ему въ дан­ники.
1:5	И по сихъ паде на ложе и позна, яко умираетъ:
1:6	и созва отроки своя благородныя, иже съ нимъ бяху совоспитани от­ юности его, и раздѣли имъ цар­ст­во свое еще живъ сый.
1:7	И цар­ст­вова Александръ лѣтъ два­на­де­сять и умре.
1:8	И обладаша отроцы его кійждо въ мѣстѣ сво­емъ.
1:9	И воз­ложиша вси дiадимы по смерти его, и сынове ихъ по нихъ лѣта многа, и умножиша злая на земли.
1:10	И изыде от­ нихъ корень грѣха Антiохъ епифанъ, сынъ Антiоха царя, иже бѣ залогомъ въ римѣ: и цар­ст­вова въ лѣтѣ сто тридесять седмѣмъ цар­ст­ва еллинскаго.
1:11	Во днехъ тѣхъ изыдоша от­ Израиля сынове беззакон­нiи и наустиша многихъ глаголюще: пойдемъ и завѣщаемъ завѣтъ съ языки, иже окрестъ насъ, яко от­нелѣже от­лучихомся от­ нихъ, обрѣтоша насъ многа злая.
1:12	И благо­увидѣся слово во очiю ихъ:
1:13	и предъизбрашася нѣцыи от­ людій и идоша ко царю: и даде имъ власть творити оправданiя языческая.
1:14	И создаша [себѣ] училище во Иерусалимѣ по закономъ языческимъ.
1:15	И сотвориша себѣ необрѣзанiе, и от­ступиша от­ завѣта святаго, и сопрягошася языкомъ, и продашася еже творити лукавое.
1:16	И уготовася цар­ст­во предъ Антiохомъ: и умысли цар­ст­вовати во Египтѣ, яко да цар­ст­вуетъ надъ двѣма цар­ст­вома.
1:17	И вниде во Египетъ въ народѣ тяжцѣ, на колесницахъ и на слонѣхъ, и на всадникахъ и на кораблехъ многихъ.
1:18	И состави брань на Птоломеа царя Египетскаго: и убояся Птоломей от­ лица его и побѣже, и падоша язвени мнози.
1:19	И взяша грады тверды въ земли Египетстѣй: и взя корысти земли Египетскiя.
1:20	И обратися Антiохъ, повнегда порази Египта во сто четыредесять третiе лѣто: и взыде на Израиля и на Иерусалимъ въ народѣ тяжцѣ,
1:21	и вниде во святилище съ гордынею, и взя олтарь златый и свѣтилникъ свѣщный и вся сосуды его,
1:22	и трапезу предложенiя и воз­лiялники, и фiалы и кадилницы златыя, и катапетасму и вѣнцы и украшенiе златое, еже на лицы церкви [бяше], и сокруши вся:
1:23	и взя сребро и злато и сосуды вожделѣн­ныя: и взя сокровища тайная, ихже обрѣте.
1:24	И вземъ вся отъиде въ землю свою, и сотвори убій­ст­во, и глагола въ гордости велицѣй.
1:25	И бысть плачь великъ во Израили на всяцѣмъ мѣстѣ ихъ.
1:26	И воз­стенаша началницы и старѣйшины, дѣвы и юноши изнемогоша, и красота женская измѣнися.
1:27	Всякъ женихъ прiя плачь, и сѣдящая на одрѣ брачнѣ бысть въ печали.
1:28	И потрясеся земля на обитающихъ на ней, и весь домъ Иаковль облечеся студомъ.
1:29	И по двою лѣту дній посла царь началника данемъ во грады Иудины. и прiиде во Иерусалимъ съ народомъ великимъ
1:30	и глагола къ нимъ словеса мирная во льсти. и вѣроваша ему. и нападе на градъ внезапу и порази его язвою великою и погуби люди многи от­ Израиля:
1:31	и взя корысти града и сожже его огнемъ, и разори домы его и стѣны его окрестъ:
1:32	и плѣниша женъ и чадъ, и скоты раздѣлиша,
1:33	и оградиша градъ давидовъ стѣною великою и крѣпкою и башнями крѣпкими, и бысть имъ въ крѣпость:
1:34	и посадиша тамо людій грѣшниковъ, мужей беззакон­ныхъ, и воз­могоша въ ней:
1:35	и положиша оружiя и брашна, и собираху корысти Иерусалимскiя, и полагаху тамо: и быша въ сѣть велику,
1:36	и бысть въ ловител­ст­во святыни и въ дiавола лукаваго Израилю выну.
1:37	И пролiяша кровь неповин­ную окрестъ святилища и оскверниша святыню.
1:38	И бѣжаша обитающiи во Иерусалимѣ ихъ ради, и бысть обитанiе чуждимъ: и бысть чуждо сѣмени рожденiя сво­его, и чада его оставиша его.
1:39 См.: 🔗Тов. 2:6 🔗Ам. 8:10	Святыня его разорена яко пустыня, праздницы его обращени суть во плачь, субботы его въ поношенiе, честь его во уничиженiе:
1:40	по славѣ его умножися безчестiе его, и высота его обращена бысть во плачь.
1:41	И писа царь Антiохъ всему цар­ст­ву сво­ему, да будутъ вси людiе едино,
1:42	и оставитъ кійждо законъ свой. и со­изволиша вси языцы по слову царя [антiоха].
1:43	И мнози от­ Израиля изволиша служенiю его и пожроша идоломъ и оскверниша субботу.
1:44	И посла царь книги рукою вѣст­никовъ во Иерусалимъ и во грады Иудины, да пойдутъ вслѣдъ законовъ чуждихъ земли
1:45	и воз­бранятъ всесожженiя и жертву и воз­лiянiе от­ святыни, и омерзятъ субботы и праздники,
1:46	и осквернятъ святыню и святыхъ,
1:47	и созиждутъ требища и капища и кумирницы, и да жрутъ мяса свиная и скоты общыя:
1:48	и да оставятъ сыны своя необрѣзаны, еже осквернити душы ихъ во всяцѣй нечистотѣ и оскверненiи,
1:49	яко да забудутъ законъ и измѣнятъ вся оправданiя [Божiя].
1:50	И иже аще не сотворитъ по глаголу цареву, да умретъ.
1:51	По всѣмъ словесемъ симъ написа всему цар­ст­ву сво­ему и при­­стави надзиратели надъ всѣми людьми: и повелѣ градомъ Иудинымъ жрети во всяцѣмъ градѣ.
1:52	И собрашася мнози от­ людій къ нимъ, всякъ оставивый законъ Господень: и сотвориша лукавая на земли
1:53	и положиша Израиля въ тайныхъ во всяцѣмъ убѣжищи ихъ.
1:54 См.: 🔗2Мак. 6:7	И въ пятый­на­де­сять день месяца хаслева, въ лѣто сто четыредесять пятое создаша мерзость запустѣнiя на олтари [Божiи], и во градѣхъ Иудиныхъ окрестъ создаша требища.
1:55	И предъ дверьми домовъ и на стогнахъ кадяху,
1:56	и книги закона [Божiя], ихже обрѣтоша, сожгоша огнемъ, раздирающе [ихъ].
1:57	И идѣже обрѣта­шеся у кого книга завѣта Господня, и аще кто со­изволяше закону Господню, по повелѣнiю цареву закалаху его.
1:58	Въ силѣ сво­ей творяху сице людемъ Израилевымъ, обрѣтающымся во всяцѣмъ месяцѣ и месяцѣ во градѣхъ.
1:59	И въ двадесять пятый день месяца жряху въ капищи, еже бѣ на олтари.
1:60	И женъ обрѣзав­шихъ чада своя закалаша по повелѣнiю [цареву],
1:61	и обѣшаху дѣтища за шіи ихъ, домы ихъ расхищаху, и обрѣзав­шихъ я умерщвляху.
1:62	И мнози от­ людій Израилевыхъ удержашася и утвердишася въ себѣ, еже не ясти скверныхъ,
1:63	и избраша паче умрети, неже осквернитися брашны, и не хотѣша преступити закона Божiя святаго: и заклани быша.
1:64	И бысть гнѣвъ велiй на Израиля зѣло.