Первая книга Царств (Первая книга Самуила), глава 22

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) Українська English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 22
22:1 См.: 🔗2Цар. 23:13 🔗Пс. 141:1	И отъиде давидъ от­туду, и спасеся, и прiиде въ пещеру Одолламску: и слышав­ше братiя его и домъ отца его, прiидоша къ нему тамо.
22:2 См.: 🔗Суд. 11:3	И собрашася къ нему всякъ иже въ нуждѣ, и всякъ должникъ, и всякъ печальный душею, и бѣ ими обладаяй, и бяше съ нимъ яко четыреста мужей.
22:3 См.: 🔗Суд. 10:17	И отъиде давидъ от­туду въ Массифаѳъ Моавитскiй и рече къ царю Моавитску: да будутъ нынѣ отецъ мой и мати моя у тебе, дондеже познаю, что сотворитъ мнѣ Богъ.
22:4 См.: 🔗2Цар. 23:14	И умоли лице царя Моавитска, и пребываху у него по вся дни, сущу давиду во области той.
22:5 См.: 🔗Пс. 62:1	И рече гадъ пророкъ къ давиду: не сѣди во области сей: иди, и да внидеши въ землю Иудину. И иде давидъ и при­­шедъ сѣде въ градѣ сарихъ.
22:6	И слыша Саулъ, яко познанъ бысть давидъ, и мужiе иже съ нимъ: и Саулъ сѣдяше на холмѣ подъ дубравою яже въ рамѣ, и копiе въ руку его, и вси отроцы его предстояху ему.
22:7	И рече Саулъ ко отрокомъ сво­имъ предстоящымъ ему: слышите нынѣ, сынове Венiаминовы, аще во­истин­ну всѣмъ вамъ дастъ сынъ Иессеевъ села и винограды и поставитъ васъ всѣхъ въ сотники и тысящники:
22:8	яко вси согласистеся на мя, и нѣсть от­крываяй во ухо мое, егда положи завѣтъ сынъ мой съ сыномъ Иессеовымъ, и нѣсть от­ васъ ни единъ боляй о мнѣ и воз­вѣщаяй во ушы мо­и, яко воз­движе сынъ мой раба мо­его на мя врага, якоже день сей?
22:9 См.: 🔗1Цар. 21:1 🔗Пс. 51:2	И от­вѣща доикъ Сиринъ при­­ставленый надъ мсками Сауловыми и рече: видѣхъ сына Иессеева при­­шедша въ номву ко Авимелеху сыну Ахитову иерею:
22:10 См.: 🔗1Цар. 21:6	и вопроша­ше о немъ Бога, и брашно вдаде ему, и мечь голiаѳа иноплемен­ника вдаде ему.
22:11 См.: 🔗Пс. 56:1	И посла царь при­­звати Авимелеха сына Ахитова, и вся сыны отца его иереи от­ номвы. И прiидоша вси къ царю.
22:12	И рече Саулъ: слыши нынѣ, сыне Ахитовъ. И рече: се, азъ, глаголи, господине.
22:13	И рече ему Саулъ: почто совѣщал­ся еси на мя ты и сынъ Иессеевъ, яко вдалъ еси ему хлѣбъ и мечь, и вопрошалъ еси о немъ Бога положити его на мя во врага, якоже день сей?
22:14	И от­вѣща Авимелехъ царю и рече: и кто во всѣхъ рабѣхъ тво­ихъ вѣренъ якоже давидъ, и зять царевъ, и князь всѣмъ заповѣдемъ тво­имъ, и славенъ въ дому тво­емъ?
22:15	еда днесь начахъ вопрошати о немъ Бога? никако: да не воз­ложиши, царю, на раба тво­его словесе сего, и на весь домъ отца мо­его, яко не вѣдяше рабъ твой во всѣхъ сихъ словесе мала, или велика.
22:16 См.: 🔗1Цар. 2:31	И рече царь Саулъ: смертiю умреши, Авимелехъ, ты и весь домъ отца тво­его.
22:17	И рече царь скороходцемъ предстоящымъ предъ нимъ: при­­ведите и избійте иереи Господни, яко рука ихъ съ давидомъ, и понеже познаша, яко бѣжитъ той, и не воз­вѣстиша во ушiю моею. И не хотяху отроцы царевы воз­ложити рукъ сво­ихъ на иереи Господни.
22:18	И рече царь доику: обратися ты, и устремися на иереи. И обратися доикъ Сиринъ, и уби иереевъ Господнихъ въ той день, триста пять мужей, всѣхъ носящихъ Ефудъ:
22:19	и номву градъ иерейскiй погуби острiемъ оружiя от­ мужеска полу и до женска, от­ отрока и до ссущаго, и телца и осла и овчате.
22:20 См.: 🔗2Цар. 15:29 🔗3Цар. 2:26	И угонзе единъ сынъ Авимелеха сына Ахитова, имя ему Авiаѳаръ, и бѣжа вслѣдъ давида.
22:21 См.: 🔗Мф. 14:12	И воз­вѣсти Авiаѳаръ давиду, яко изби Саулъ вся иереи Господни.
22:22	И рече давидъ ко Авiаѳару: вѣдяхъ въ день той, яко тамо бѣ доикъ Сиринъ, яко воз­вѣщая воз­вѣститъ Саулу: азъ есмь виновенъ о душахъ дому отца тво­его:
22:23	сѣди со мною, не бойся, яко идѣже аще взыщу души мо­ей мѣсто, взыщу и души тво­ей, яко сохраненъ будеши ты у мене.