Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 12 | |
12:1 | И повелѣ ввести ю, идѣже положени быша сосуди сребрянiи его, и повелѣ уготовити ей от пищей устроеваемыхъ себѣ и от вина своего пити. |
12:2 См.: 🔗Тов. 1:11 🔗Дан. 1:8 | И рече Иудиѳъ: не снѣмъ от нихъ, да не будетъ соблазнъ, но от принесенныхъ со мною мнѣ подаваемо да будетъ. |
12:3 | И рече къ ней Олофернъ: аще же оскудѣютъ сущая съ тобою, откуду принесемъ тебѣ давати подобная симъ? нѣсть бо съ нами от рода твоего. |
12:4 | И рече Иудиѳъ къ нему: жива есть душа твоя, господине мой, яко не иждиветъ раба твоя сущихъ со мною, дондеже сотворитъ Господь рукою моею, яже устави. |
12:5 | И ведоша ю отроцы Олоферновы въ шатеръ, и спа даже до полунощи: и воста о утренней стражи |
12:6 | и посла ко Олоферну, глаголющи: да повелитъ убо господинъ мой пущати рабу твою на молитву исходити. |
12:7 | И повелѣ Олофернъ тѣлохранителемъ не возбраняти ей. И пребысть въ полку дни три: и исхождаше въ нощи въ дебрь ветилуи и умывашеся во ополченiи во источницѣ воды, |
12:8 | и яко взыде, моляшеся Господу Богу Израилеву, да управитъ путь ея ко возставленiю сыновъ людій своихъ: |
12:9 | и входящи чиста пребываше въ шатрѣ, донелиже приношаше пищу свою ко вечеру. |
12:10 | И бысть въ день четвертый, сотвори Олофернъ пиръ рабомъ своимъ единымъ, и не призва въ послуженiе ни единаго от сущихъ при службахъ, |
12:11 | и рече вагою евнуху, иже бяше приставникъ надъ всѣми сущими его: шедъ убо увѣщай жену Евреиню, яже есть у тебе, еже прiити къ намъ и ясти и пити съ нами: |
12:12 | се бо, студно лицу нашему, аще жену сицевую оставимъ не бесѣдовавше съ нею, зане аще сея не призовемъ, посмѣется намъ. |
12:13 | И изыде вагоа от лица Олофернова и вниде къ ней и рече: да не облѣнится убо отроковица добрая сiя, пришедши ко господину моему, прославитися предъ лицемъ его и пити съ нами въ веселiе вино и быти въ день сей, яко дщи едина от сыновъ Ассуровыхъ, яже предстоятъ въ дому навуходоносоровѣ. |
12:14 | И рече къ нему Иудиѳъ: и кто есмь азъ противоглаголющи господину моему? зане все, еже будетъ предъ очесы его угодно, потщавшися сотворю, и будетъ сiе ми радованiе даже до дне смерти моея. |
12:15 | И воставши украсися одѣянiемъ и всякимъ украшенiемъ женскимъ: и прiиде раба ея и постла ей предъ Олоферномъ долу ковры, ихже взя от вагои ко повседневному употребленiю своему, во еже ясти возлегшей на нихъ: |
12:16 | и вшедши возлеже Иудиѳъ. И изступи сердце Олоферново о ней, и подвижеся душа его: и бяше желателенъ зѣло, еже снитися съ нею, и усмотреваше времене, еже обольстити ю, от негоже дне видѣ ю: |
12:17 | и рече къ ней Олофернъ: пій убо и буди съ нами въ веселiи. |
12:18 | И рече Иудиѳъ: буду убо пити, господине, яко возвеличися животъ мой во мнѣ днесь паче всѣхъ дній рожденiя моего. |
12:19 | И вземши яде и пи предъ нимъ, яже уготова раба ея. |
12:20 | И возвеселися Олофернъ о ней и пи вина много зѣло, елико не пи никогдаже въ день единъ, отнелиже родися. |