Книга пророка Иезекииля, глава 47

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) Українська English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 47
47:1 См.: 🔗Зах. 14:8	И введе мя ко преддверiю храма, и се, вода исхожда­ше изъ подъ непокровен­наго храма на востокъ, яко лице храма зряше на востокъ, и исхожда­ше вода от­ страны десныя, от­ юга къ жертвен­нику.
47:2	И изведе мя по пути вратъ яже на сѣверъ и обведе мя путемъ вратнымъ внѣуду ко вратомъ двора, зрящаго на востокъ, и се, вода исхожда­ше от­ страны десныя,
47:3	якоже исходъ мужа противу: и мѣра въ руцѣ его: и измѣри тысящу мѣрою, и прейде водою воду оставленiя {Евр.: и преведе мя чрезъ воду даже до глезнъ.}.
47:4	И [паки] измѣри тысящу, и преведе мя чрезъ воду, и взыде вода до колѣнъ: и размѣри тысящу, и взыде вода даже до чреслъ.
47:5 См.: 🔗Рим. 11:33	И размѣри тысящу, потокъ, и не воз­може прейти {Евр.: и не могохъ прейти.}, яко кипяше вода, аки шумъ поточный, егоже не прейдутъ.
47:6	И рече ко мнѣ: видѣлъ ли еси, сыне человѣчь? И веде мя и обрати мя на брегъ рѣчный, во обращенiи мо­емъ:
47:7 См.: 🔗Отк. 22:1	и се, на брезѣ рѣчнѣмъ древеса многа зѣло сюду и сюду.
47:8 См.: 🔗Зах. 14:8	И рече ко мнѣ: вода сiя текущая въ Галилею, яже на востокъ, и низхожда­ше ко Аравіи, и грядяше до моря къ водѣ исхода, и исцѣлитъ воды:
47:9 См.: 🔗Рим. 11:16 🔗Мф. 13:47	и будетъ всяка душа животныхъ врѣющихъ, на вся, на няже найдетъ тамо рѣка, жива будутъ: и будутъ тамо рыбы многи зѣло, яко прiидетъ тамо вода сiя и исцѣлитъ, и живо будетъ всякое, на неже аще прiидетъ рѣка, тамо живо будетъ.
47:10 См.: 🔗Иер. 16:16	И станутъ тамо рыбарiе от­ ингадда до ингалима: сушило мрежамъ будетъ, о себѣ будетъ: и рыбы ея яко рыбы моря великаго, множе­с­т­во много зѣло.
47:11	И во исходѣ ея и во обращенiи ея и въ воз­вышенiи ея мѣлины ея не исцѣлят­ся, въ соль вдадут­ся:
47:12 См.: 🔗Ис. 65:22 🔗Отк. 22:2	и надъ рѣку взыдетъ, и на брезѣ ея оба полы, всякое древо ядомое не обетшаетъ у нея, ни оскудѣетъ плодъ его, новости сво­ея первый плодъ при­­несетъ, ибо воды ихъ сiя от­ святыхъ исходятъ, и будетъ плодъ ихъ въ снѣдь и прозябенiе ихъ во здравiе.
47:13	Сице глаголетъ Господь Богъ: сiя предѣлы наслѣдите земли, дву­на­де­ся­ти племеномъ сыновъ Израилевыхъ при­­ложенiе ужа.
47:14 См.: 🔗Быт. 12:7	И наслѣдите ю кійждо, якоже братъ его, на нюже воз­двигохъ руку мою, еже дати ю отцемъ ихъ, и падетъ земля сiя вамъ въ наслѣдiе.
47:15	И сіи предѣлы земли на сѣверъ, от­ моря великаго сходящаго и от­дѣляющаго входъ имаселдамъ,
47:16	маавѳирасъ, еврамилiамъ средѣ предѣлъ Дамасковыхъ и средѣ предѣлъ имаѳовыхъ, дворы Савнани, иже суть выше предѣлъ авранитидскихъ.
47:17 См.: 🔗Чис. 34:9	Сіи предѣлы от­ моря: от­ двора Енанова, предѣлы Дамасковы, и яже къ сѣверу, и предѣлъ Емаѳовъ, и предѣлъ сѣверскъ.
47:18 См.: 🔗Чис. 34:10	И яже на востоки: между авранитидою и между Дамаскомъ, и между Галаадитидою и между землею Израилевою, Иорданъ дѣлитъ къ морю, еже на востоки финиковъ: сiя на востоки.
47:19 См.: 🔗Чис. 20:13 🔗Чис. 34:3 🔗Иез. 48:28	И яже къ югу и Ливу: от­ Ѳемана и финиковъ даже до воды Маримоѳъ-кадимъ, продолжающееся къ морю великому.
47:20	Сiя страна юга и Лива, сiя страна моря великаго раздѣляетъ даже прямо входу имаѳъ, даже до входа его: сiя суть яже къ морю имаѳъ.
47:21	И раздѣлите землю вамъ, племеномъ Израилевымъ.
47:22 См.: 🔗Ис. 56:3 🔗Гал. 3:28	Расположите ю жребiемъ вамъ и при­­шелцемъ обитающымъ средѣ васъ, иже родиша сыны посредѣ васъ, и будутъ вамъ яко туземцы въ сынѣхъ Израилевыхъ: съ вами да ядятъ во участiи средѣ племенъ Израилевыхъ,
47:23	и будутъ въ племени при­­шелцевъ, въ при­­шелцѣхъ иже съ ними: тамо дадите участiе имъ, глаголетъ Господь Богъ.