Евангелие от Иоанна, глава 6

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) Рус. (еп. Кассиан) Беларускi Українська English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 6
6:1	[Зач. 17.] По сихъ иде Иисусъ на онъ полъ моря Галилеи Тиверiадска:
6:2	и по Немъ идяше народъ многъ, яко видяху знаменiя Его, яже творяше надъ недужными.
6:3	Взыде же на гору Иисусъ, и ту сѣдяше со ученики Сво­ими.
6:4 См.: 🔗Исх. 12:18	Бѣ же близъ Пасха, праздникъ Жидовскiй.
6:5 См.: 🔗Мф. 14:16 🔗Мк. 6:35 🔗Лк. 9:12	[Зач. 18.] Возведъ убо Иисусъ очи и видѣвъ, яко многъ народъ грядетъ къ Нему, глагола къ Филиппу: чимъ купимъ хлѣбы, да ядятъ сіи?
6:6	Сiе же глаголаше, искушая его: Самъ бо вѣдяше, что хощетъ сотворити.
6:7	Отвѣща Ему Филиппъ: двѣма стома пѣнязей хлѣбы не довлѣютъ имъ, да кіиждо ихъ мало что прiиметъ.
6:8	Глагола Ему единъ от­ ученикъ Его, Андрей, братъ Симона Петра:
6:9	есть отрочищь здѣ единъ, иже имать пять хлѣбъ ячмен­ныхъ и двѣ рыбѣ: но сіи что суть на толико?
6:10	Рече же Иисусъ: сотворите человѣки воз­лещи. Бѣ же трава многа на мѣстѣ. Возлеже убо мужей числомъ яко пять тысящъ.
6:11	Прiятъ же хлѣбы Иисусъ и, хвалу воз­давъ, подаде ученикомъ, ученицы же воз­лежащымъ: такожде и от­ рыбу, елико хотяху.
6:12	И яко насытишася, глагола ученикомъ Сво­имъ: соберите избытки укрухъ, да не погибнетъ ничтоже.
6:13 См.: 🔗Мк. 8:19	Собраша же, и исполниша два­на­де­ся­те кошя укрухъ от­ пятихъ хлѣбъ ячмен­ныхъ, иже избыша ядшымъ.
6:14 См.: 🔗Втор. 18:15 🔗Мф. 11:3	[Зач. 19.] Человѣцы же видѣв­ше знаменiе, еже сотвори Иисусъ, глаголаху, яко Сей есть во­истин­ну Пророкъ Грядый въ мiръ.
6:15	Иисусъ убо разумѣвъ, яко хотятъ прiити, да восхитятъ Его и сотворятъ Его царя, отъиде паки въ гору единъ.
6:16	Яко поздѣ бысть, снидоша ученицы Его на море,
6:17 См.: 🔗Мф. 14:22 🔗Мк. 6:47	и влѣзоша въ корабль, и идяху на онъ полъ моря въ Капернаумъ. И тма абiе бысть, и не [у] бѣ при­­шелъ къ нимъ Иисусъ.
6:18	Море же, вѣтру велiю дыхающу, воз­двиза­шеся.
6:19	Гребше же яко стадiй двадесять пять или тридесять, узрѣша Иисуса ходяща по морю и близъ корабля быв­ша, и убояшася.
6:20	Онъ же глагола имъ: Азъ есмь, не бойтеся.
6:21	Хотяху убо прiяти Его въ корабль: и абiе корабль бысть на земли, въ нюже идяху.
6:22	Во утрiй [же] народъ, иже стояше объ онъ полъ моря, видѣвъ, яко корабля иного не бѣ ту, токмо единъ той, въ оньже внидоша ученицы Его, и яко не вниде со ученики Сво­ими Иисусъ въ корабль, но едини ученицы Его идоша:
6:23	и ини прiидоша корабли от­ Тиверiады близъ мѣста, идѣже ядоша хлѣбы, хвалу воз­дав­ше Господеви:
6:24	егда же видѣша народи, яко Иисуса не бысть ту, ни ученикъ Его, влѣзоша сами въ корабли, и прiидоша въ Капернаумъ, ищуще Иисуса,
6:25	и обрѣтше Его объ онъ полъ моря, рѣша Ему: Равви, когда здѣ бысть {когда сѣмо при­­шелъ еси}?
6:26	Отвѣща имъ Иисусъ и рече: аминь, аминь глаголю вамъ, ищете Мене, не яко видѣсте знаменiе, но яко яли есте хлѣбы и насытистеся:
6:27 См.: 🔗Мф. 3:17 🔗Ин. 1:32 🔗Ин. 10:36	[Зач. 20.] дѣлайте же не брашно гиблющее, но брашно пребывающее въ животъ вѣчный, еже Сынъ Человѣческiй вамъ дастъ: Сего бо Отецъ знамена Богъ.
6:28	Рѣша же къ Нему: что сотворимъ, да дѣлаемъ дѣла Божiя?
6:29 См.: 🔗Ин. 17:3 🔗1Ин. 3:23	Отвѣща Иисусъ и рече имъ: се есть дѣло Божiе, да вѣруете въ Того, Егоже посла Онъ.
6:30	Рѣша же Ему: кое убо Ты твориши знаменiе, да видимъ и вѣру имемъ Тебѣ, что дѣлаеши,
6:31 См.: 🔗Пс. 77:24 🔗Исх. 16:14 🔗Чис. 11:7 🔗Прем. 16:20 🔗1Кор. 10:3	отцы наши ядоша ман­ну въ пустыни, якоже есть писано: хлѣбъ съ небесе даде имъ ясти.
6:32	Рече убо имъ Иисусъ: аминь, аминь глаголю вамъ, не Моисей даде вамъ хлѣбъ съ небесе, но Отецъ Мой даетъ вамъ хлѣбъ истин­ный съ небесе:
6:33	хлѣбъ бо Божiй есть сходяй съ небесе и даяй животъ мiру.
6:34	Рѣша убо къ Нему: Господи, всегда даждь намъ хлѣбъ сей.
6:35 См.: 🔗Ин. 4:14 🔗Ин. 7:37	Рече же имъ Иисусъ: [Зач. 21.] Азъ есмь хлѣбъ животный: грядый ко Мнѣ не имать взалкатися, и вѣруяй въ Мя не имать вжаждатися никогдаже.
6:36	Но рѣхъ вамъ, яко и видѣсте Мя, и не вѣруете.
6:37	Все, еже даетъ Мнѣ Отецъ, ко Мнѣ прiидетъ, и грядущаго ко Мнѣ не изжену вонъ:
6:38 См.: 🔗Мф. 26:39 🔗Ин. 8:29	яко снидохъ съ небесе, не да творю волю Мою, но волю послав­шаго Мя Отца.
6:39 См.: 🔗Ин. 10:28	Се же есть воля послав­шаго Мя Отца, да все, еже даде Ми, не погублю от­ Него, но воскрешу е въ послѣднiй день.
6:40	[Зач. 22.] Се же есть воля Послав­шаго Мя, да всякъ видяй Сына и вѣруяй въ Него имать животъ вѣчный, и воскрешу его Азъ въ послѣднiй день.
6:41	Роптаху убо Иудее о Немъ, яко рече: Азъ есмь хлѣбъ сшедый съ небесе.
6:42 См.: 🔗Мф. 13:55	И глаголаху: не Сей ли есть Иисусъ сынъ Иосифовъ, Егоже мы знаемъ отца и Матерь, како убо глаголетъ Сей, яко съ небесе снидохъ?
6:43	Отвѣща убо Иисусъ и рече имъ: не ропщите между собою:
6:44	никтоже можетъ прiити ко Мнѣ, аще не Отецъ пославый Мя при­­влечетъ его, и Азъ воскрешу его въ послѣднiй день.
6:45 См.: 🔗Ис. 54:13 🔗Иер. 31:34	Есть писано во пророцѣхъ: и будутъ вси научени Богомъ. Всякъ слышавый от­ Отца и навыкъ, прiидетъ ко Мнѣ.
6:46 См.: 🔗Мф. 11:27	Не яко Отца видѣлъ есть Кто, токмо сый от­ Бога, Сей видѣ Отца.
6:47	Аминь, аминь глаголю вамъ: вѣруяй въ Мя имать животъ вѣчный.
6:48	[Зач. 23.] Азъ есмь хлѣбъ животный:
6:49 См.: 🔗Ин. 6:31	отцы ваши ядоша ман­ну въ пустыни, и умроша:
6:50	сей есть хлѣбъ сходяй съ небесе, да, аще кто от­ него ястъ, не умретъ:
6:51	Азъ есмь хлѣбъ животный, иже сшедый съ небесе: аще кто снѣсть от­ хлѣба сего, живъ будетъ во вѣки: и хлѣбъ, егоже Азъ дамъ, Плоть Моя есть, юже Азъ дамъ за животъ мiра.
6:52	Пряхуся же между собою Жидове, глаголюще: како можетъ Сей намъ дати Плоть [Свою] ясти?
6:53 См.: 🔗Мф. 26:26	Рече же имъ Иисусъ: аминь, аминь глаголю вамъ: аще не снѣсте Плоти Сына Человѣческаго, ни пiете Крове Его, живота не имате въ себѣ.
6:54	Ядый Мою Плоть и пiяй Мою Кровь имать животъ вѣчный, и Азъ воскрешу его въ послѣднiй день.
6:55	Плоть бо Моя истин­но есть брашно, и Кровь Моя истин­но есть пиво.
6:56	[Зач. 24.] Ядый Мою Плоть и пiяй Мою Кровь во Мнѣ пребываетъ, и Азъ въ немъ.
6:57	Якоже посла Мя живый Отецъ, и Азъ живу Отца ради: и ядый Мя, и той живъ будетъ Мене ради.
6:58	Сей есть хлѣбъ сшедый съ небесе: не якоже ядоша отцы ваши ман­ну, и умроша: ядый хлѣбъ сей живъ будетъ во вѣки.
6:59	Сiя рече на сонмищи, учя въ Капернаумѣ.
6:60	Мнози убо слышав­ше от­ ученикъ Его, рѣша: жестоко есть слово сiе: [и] кто можетъ его послушати?
6:61	Вѣдый же Иисусъ въ Себѣ, яко ропщутъ о семъ ученицы Его, рече имъ: сiе ли вы блазнитъ?
6:62 См.: 🔗Мф. 26:64 🔗Ин. 3:13 🔗Еф. 4:8	Аще убо узрите Сына Человѣческаго восходяща, идѣже бѣ прежде?
6:63 См.: 🔗Рим. 8:2 🔗2Кор. 3:6	Духъ есть, иже оживляетъ, плоть не пользуетъ ничтоже: глаголы, яже Азъ глаголахъ вамъ, духъ суть и животъ суть:
6:64 См.: 🔗Мк. 2:8 🔗Ин. 2:24	но суть от­ васъ нѣцыи, иже не вѣруютъ. Вѣдяше бо искони Иисусъ, кіи суть невѣру­ю­щiи, и кто есть предаяй Его.
6:65 См.: 🔗Ин. 3:27	И глаголаше: сего ради рѣхъ вамъ, яко никтоже можетъ прiити ко Мнѣ, аще не будетъ ему дано от­ Отца Мо­его.
6:66	От сего мнози от­ ученикъ Его идоша вспять, и ктому не хождаху съ Нимъ.
6:67	Рече же Иисусъ обѣма­на­де­ся­те: еда и вы хощете ити?
6:68	Отвѣща убо ему Симонъ Петръ: Господи, къ кому идемъ? Глаголы живота вѣчнаго имаши,
6:69 См.: 🔗Мф. 16:16 🔗Мк. 8:29 🔗Лк. 9:20	и мы вѣровахомъ, и познахомъ, яко Ты еси Христосъ, Сынъ Бога живаго.
6:70 См.: 🔗Лк. 6:13	Отвѣща имъ Иисусъ: не Азъ ли васъ два­на­де­ся­те избрахъ? И единъ от­ васъ дiаволъ есть.
6:71	Глаголаше же Иуду Симонова Искарiота: сей бо хотяше предати Его, единъ сый от­ обою­на­де­ся­те.