Первая книга Маккавейская, глава 14 неканонич.

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 14
14:1	И въ лѣто сто седмьдесятъ второе, собра царь димитрiй силы своя и иде въ мидію собрати помощь себѣ, яко да ратуетъ противу трифона.
14:2	И слыша Арсакъ царь персскiй и мидскiй, яко прiиде димитрiй въ предѣлы его, и посла единаго от­ началникъ сво­ихъ яти его жива.
14:3	И иде и порази ополченiе димитрiево, и ятъ его и при­­веде его ко Арсаку: и всади его въ темницу.
14:4	И умолча земля Иудина во вся дни Симоновы, и взыска благая языку сво­ему, и угодна бысть имъ власть его и слава его во вся дни.
14:5	И со всею славою сво­ею взя Иоппію въ при­­станище и сотвори входъ островомъ морскимъ,
14:6	и распростре предѣлы языку сво­ему, и одержа страну,
14:7	и собра плѣненiе много, и господ­ст­вова надъ газары и веѳсуры и краеградiемъ, и отъ­ятъ нечистоты от­ него, и не бысть противляющагося ему.
14:8	И кійждо дѣлаше землю свою съ миромъ, и земля даяше жита своя, и древеса поль­ская плодъ свой.
14:9	Старѣйшины на стогнахъ сѣдяху и вси о благихъ бесѣдоваху, и юноши облачахуся славою и ризами ратными.
14:10	Градомъ даяше пищы и вчиняше ихъ въ сосуды утвержденiя, донелѣже именовася имя славы его даже до края земли.
14:11	Сотвори миръ на земли, и воз­веселися Израиль веселiемъ велiимъ.
14:12	И сѣде кійждо подъ виноградомъ сво­имъ и смоковницею сво­ею, и не бысть устрашающаго ихъ.
14:13	И оскудѣ ратуяй ихъ на земли, и царiе сотрошася во дни оны.
14:14	И укрѣпи всѣхъ смирен­ныхъ людій сво­ихъ: закона взыска и отъ­ятъ всяко беззаконiе и лукав­ст­во,
14:15	святая прослави и умножи сосуды святыхъ.
14:16	И слышано бѣ въ римѣ, яко умре Ионаѳанъ, и даже до спартiи слышася, и оскорбишася зѣло.
14:17	Егда же услышаша, яко Симонъ братъ его бысть вмѣсто его архiерей и одержа всю страну и грады въ ней,
14:18	писаша къ нему на дщицахъ мѣдяныхъ, еже обновити съ нимъ дружбу и споборенiе, яже сотвориша со Иудою и Ионаѳаномъ братiею его.
14:19	И прочтошася предъ церковiю во Иерусалимѣ.
14:20	И сей образъ посланiй, ихже послаша спартiаты: спартiатовъ началницы и градъ Симону иерею великому и старѣйшинамъ, и жерцемъ и прочымъ людемъ иудейскимъ братiи радоватися:
14:21	послы, иже послани суть къ людемъ нашымъ, воз­вѣстиша намъ о ва­шей славѣ и чести, и воз­веселихомся о при­­ходѣ ихъ,
14:22	и списахомъ яже от­ нихъ речена въ совѣтѣхъ людій сице: нуминiй сынъ Антiоховъ и антипатръ Иасоновъ, послы Иудейстiи, прiидоста къ намъ воз­новляюща съ нами дружбу:
14:23	и угодно бысть людемъ прiяти мужы славно и положити восписанiе словесъ ихъ во особыя людскія книги, да будетъ память людемъ спартiатовъ: образъ же тѣхъ писахомъ Симону архiерею.
14:24	По сихъ посла Симонъ нуминiа въ римъ, имущаго щитъ златъ великъ вѣсомъ мнасъ тысяща на уставленiе съ ними дружбы.
14:25	Егда же услышаша людiе словеса сiя, рѣша: кую благодать воз­дадимъ Симону и сыномъ его?
14:26	утверди бо самъ и братiя его и домъ отца его, и поби враги Израилевы от­ нихъ, и уставиша ему свободу.
14:27	И написаша на дскахъ мѣдяныхъ и поставиша на столпѣ въ горѣ Сiонѣ. и сей есть образъ писанiя: во осмый­на­де­сять день месяца Елулъ, лѣта сто седмьдесятъ втораго, и сiе третiе лѣто при­­ Симонѣ архiереи, въ сарамели,
14:28	въ собранiи велицѣмъ жерцевъ и людій, и князей языка и старѣйшинъ страны воз­вѣстися намъ: понеже многащи быша брани въ странѣ,
14:29	Симонъ же сынъ маттаѳіевъ, сынъ сыновъ Иаривовыхъ, и братiя его вдаша себе въ бѣд­ст­во, и противосташа сопостатомъ языка сво­его, яко да стоятъ святая ихъ и законъ, и славою великою прославиша люди своя:
14:30	и собра Ионаѳанъ люди своя, и бысть имъ архiерей, и при­­ложися къ людемъ сво­имъ:
14:31	и хотѣша врази ихъ внити въ страну ихъ, еже сокрушити страну ихъ и простерти руку на святая ихъ,
14:32	тогда воста Симонъ и брася за люди своя, и разда сребрениковъ много сво­имъ, и вооружи мужы сильныя языка сво­его, и даде имъ оброки,
14:33	и утверди грады иудейскiя и веѳсуру, яже въ предѣлѣхъ Иудейскихъ, идѣже бяху оружiя бран­никовъ прежде, и постави тамо на стражу мужы иудейскiя:
14:34	и Иоппію утверди, яже на при­­морiи, и газару, яже въ предѣлѣхъ азота, въ нейже врази прежде обитаху, и насели тамо иудеи, и елика потребна бяху на управленiе сихъ, положи въ нихъ:
14:35	и видѣша людiе дѣй­ст­во Симоново и славу, юже умысли сотворити языку сво­ему, и поставиша его въ вожда сво­его и архiереа, занеже сотвори сiя вся, и правду и вѣру, юже соблюде языку сво­ему, и взыска всякимъ образомъ воз­нести люди своя:
14:36	и во дни его благо­успѣва­ше въ руку его, еже изъяти языки от­ страны ихъ, и иже во градѣ давидовѣ бѣху во Иерусалимѣ, иже сотвориша себѣ краеградiе, изъ негоже исхождаху и скверняху окрестъ святыхъ и творяху язву велiю въ чистотѣ,
14:37	и насели въ немъ мужы иудейски и утверди ко укрѣпленiю страны и града и воз­выси стѣны во Иерусалимѣ:
14:38	и царь димитрiй устави ему начал­ст­во жрече­ст­ва,
14:39	по симъ сотвори его друга сво­его и прослави его славою великою:
14:40	слыша бо, яко нарѣчени суть Иудее от­ римлянъ друзи и споборницы и братiя, и яко прiяша пословъ Симоновыхъ преславно:
14:41	и яко благоволиша Иудее и жерцы быти Симону вождомъ и архiереемъ въ вѣкъ, дондеже востанетъ пророкъ вѣренъ:
14:42	и да будетъ надъ ними во­евода, и яко да радѣетъ о святыхъ поставляти ихъ надъ дѣлами ихъ и надъ страною, и надъ оружiемъ и надъ твердынями,
14:43	и яко да радѣетъ о святыхъ, и да слушаютъ еговси, и да пишут­ся на имя его вся писанiя во странѣ,и да облачит­ся въ порфиру и златую ризу,
14:44	и не лѣть будетъ ни комуже от­ людій и от­ жрецъ от­врещи что от­ сихъ и вопреки глаголати от­ него реченымъ, или совокупити сонмъ во странѣ безъ него и облещися въ порфиру и носити гривну злату:
14:45	а иже аще сотворитъ кромѣ сихъ, или от­вержетъ что сихъ, повиненъ будетъ.
14:46	И угодно бысть всѣмъ людемъ уставити Симону и сотворити по словесемъ симъ.
14:47	И прiя Симонъ, и благоволи архiерей­ст­вовати, и быти во­еводою и началникомъ языка Иудейска и жерцемъ, и начал­ст­вовати надъ всѣми.
14:48	И писанiе сiе рѣша водрузити во дщицахъ мѣдяныхъ и поставити ихъ въ при­­творѣ святыхъ, въ мѣстѣ славнѣ,
14:49	списанiе же сихъ положити въ газофилакiи, яко да имать Симонъ и сынове его.