Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 10 | |
10:1 | И бысть яко преста вопiющи ко Богу Израилеву и сконча вся глаголы сiя, |
10:2 | и воста от поверженiя и призва рабыню свою и сниде въ домъ, въ немже пребываше во дни субботнiя и въ праздники своя, |
10:3 | и сложи вретище, имже одѣвашеся, и совлече ризы вдовства своего, и обмы тѣло водою и помазася миромъ богатымъ, и разчеса власы главы своея и возложи увясло на ню и облечеся въ ризы веселiя своего, имиже одѣвашеся во дни живота мужа своего Манассіи: |
10:4 | и взя сандалiя на ноги своя, и обложи мониста и цѣпки, и перстни и усерязи и все украшенiе свое, и украсися зѣло на прельщенiе очесъ мужескихъ, елицы аще увидятъ ю: |
10:5 | и даде рабыни своей оплетенъ сосудъ вина и чванецъ елеа, и мѣшецъ наполни мукою и плетеницы смоквами и хлѣбы чистыми, и обви вся сосуды своя, и возложи на ню. |
10:6 | И изыдостѣ ко вратомъ града ветилуи и обрѣтостѣ стоящихъ при нихъ Озію и старцевъ града хаврина и Хармина. |
10:7 | Якоже увидѣша ю, и бѣ измѣнено лице ея, и ризу премѣненну ея, и удивишася о красотѣ ея попремногу зѣло и рѣша ей: |
10:8 | Богъ, Богъ отецъ нашихъ да дастъ тя въ благодать и совершитъ начинанiя твоя въ величiе сыновъ Израилевыхъ и возвышенiе Иерусалима. И поклонися Богу |
10:9 | и рече къ нимъ: повелите отверсти ми врата града, и изыду ко совершенiю словесъ, ихже глаголасте со мною. И повелѣша юношамъ отверсти ей, якоже глаголаше. |
10:10 | И сотвориша тако. И изыде Иудиѳъ сама и рабыня ея съ нею: назираху же ю мужiе града, дондеже сниде съ горы, дондеже прейде юдоль, и ктому не увидѣша ея. |
10:11 | И идястѣ юдолiю прямо. И срѣте ю первая стража Ассирійская, |
10:12 | и взяша ю и вопросиша: от коихъ еси? и откуду грядеши? и камо идеши? И рече: дщи есмь Евреовъ и убѣгаю от лица ихъ, яко имутъ предани быти вамъ на поглощенiе: |
10:13 | и азъ гряду предъ лице Олоферна вождоначалника силы вашея, еже возвѣстити глаголы истины, и покажу предъ лицемъ его путь, по немуже пойдетъ и возобладаетъ всею горнею, и не погибнетъ от мужей его плоть едина, ниже духъ жизни. |
10:14 | Якоже услышаша мужiе глаголы ея и усмотриша лице ея, и бяше предъ ними чудна красотою зѣло, и рѣша къ ней: |
10:15 | спасла еси душу твою, потщавшися снити предъ лице господина нашего: и нынѣ приступи ко шатру его, и от насъ проводятъ тя, дондеже предадутъ тя въ руцѣ его: |
10:16 | аще же станеши предъ нимъ, да не убоишися сердцемъ твоимъ, но возвѣсти по глаголомъ твоимъ, и благо тебѣ сотворитъ. |
10:17 | И избраша от себе мужей сто и присовокупиша ей и рабыни ея, и ведоша я ко шатру Олофернову. |
10:18 | И бысть стеченiе во всемъ ополченiи, разгласися бо по шатромъ пришествiе ея: и пришедше окружаху ю, яко стояше внѣ шатра Олофернова, дондеже возвѣстиша ему о ней. |
10:19 | И чудяхуся о красотѣ ея и удивляхуся сыномъ Израилевымъ о ней, и рѣша кійждо ко ближнему своему: кто презритъ людій сихъ, иже имутъ у себе женъ таковыхъ? яко не добро есть оставити изъ нихъ мужа единаго, иже оставлени бывше возмогутъ прехитрити всю землю. |
10:20 | И изыдоша спящiи при Олофернѣ и вси служителiе его и введоша ю въ шатеръ. |
10:21 | И бѣ Олофернъ опочивая на одрѣ своемъ подъ завѣсою, яже бѣ от порфиры и злата и смарагда и каменiй многоцѣнныхъ втканныхъ. |
10:22 | И возвѣстиша ему о ней, и изыде въ предсѣнiе, и лампады сребряныя предъидяху ему. |
10:23 | Егда же прiиде предъ лице его Иудиѳъ и слугъ его, дивишася вси о красотѣ лица ея. И падши на лице поклонися ему: и воздвигоша ю раби его. |