Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 6 | |
6:1 См.: 🔗Чис. 10:9 🔗Иер. 4:5 | Укрѣпитеся, сынове Венiаминовы, посредѣ Иерусалима, и въ Ѳекуи вострубите трубою, и надъ веѳахармомъ воздвигните хоругвь: яко злая произникоша от сѣвера, и сотренiе велико бываетъ: |
6:2 | и отъимется высота твоя, дщи Сiоня. |
6:3 См.: 🔗Иер. 12:10 | Къ ней прiидутъ пастырiе и стада ихъ, и поставятъ на ней кущы окрестъ, и упасутъ кійждо рукою своею. |
6:4 См.: 🔗Иер. 51:27 | Уготовитеся на ню на брань, востаните и взыдемъ на ню о полудни: горе намъ, яко уклонися день, яко исчезаютъ сѣни дневныя. |
6:5 | Востаните и взыдемъ на ню нощiю и расточимъ основанiя ея. |
6:6 См.: 🔗Ис. 5:7 | Яко сiя глаголетъ Господь силъ: посѣцы древа его, излій на Иерусалимъ силу: о, граде лживый, всякое насильство въ немъ! |
6:7 См.: 🔗Иер. 9:3 | Якоже студену творитъ кладязь воду свою, тако студену творитъ ю злоба ея: нечестiе и пакости услышатся въ немъ надъ лицемъ его всегда. |
6:8 | Немощiю и язвою накажешися, Иерусалиме: да не отступитъ душа моя от тебе, да не сотворю тя непроходну, землю необитанну. |
6:9 См.: 🔗Иер. 8:13 🔗Иер. 17:6 | Яко сiя глаголетъ Господь силъ: обирайте, обирайте, аки виноградъ, останки Израилевы, обратитеся аки обиратель на кошницу свою. |
6:10 См.: 🔗Деян. 7:51 | Кому возглаголю и [кому] засвидѣтелствую, и услышитъ? се, необрѣзана ушеса ихъ, и слышати не возмогутъ: се, слово Господне бысть къ нимъ въ поношенiе, и не воспрiимутъ того. |
6:11 См.: 🔗Иер. 7:20 | И ярость мою исполнихъ, и терпѣхъ, и не скончахъ ихъ: излiю на младенцы отвнѣ и на собранiе юношъ вкупѣ: мужъ бо и жена яти будутъ, старецъ со исполненнымъ дній. |
6:12 См.: 🔗Втор. 28:30 | И прейдутъ домы ихъ ко инымъ, поля и жены ихъ такожде, яко простру руку мою на обитающихъ на земли сей, глаголетъ Господь. |
6:13 См.: 🔗Ис. 56:11 🔗Иер. 8:10 | Понеже от меншаго и даже до болшаго вси совершиша беззаконная, от священника и даже до лжепророка вси сотвориша ложная |
6:14 См.: 🔗Иер. 8:11 🔗Иер. 23:17 | и цѣляху сотренiе людій моихъ, уничижающе и глаголюще: миръ, миръ: и гдѣ есть миръ? |
6:15 См.: 🔗Иер. 18:11 | Постыдѣшася, яко оскудѣша: и ниже аки посрамляеми постыдѣшася и безчестiя своего не познаша: сего ради падутъ паденiемъ своимъ и во время посѣщенiя своего погибнутъ, рече Господь. |
6:16 См.: 🔗Иер. 18:15 🔗Мф. 11:29 | Сiя глаголетъ Господь: станите на путехъ и видите, и вопросите о стезяхъ Господнихъ вѣчныхъ и видите, кій есть путь благъ, и ходите по нему и обрящете очищенiе душамъ вашымъ. И рекоша: не пойдемъ. |
6:17 См.: 🔗Ис. 62:6 | И поставихъ надъ вами стражы: слышите гласъ трубы. И рекоша: не послушаемъ. |
6:18 | Сего ради услышаша языцы и пасущiи стада своя. |
6:19 См.: 🔗Чис. 14:35 🔗Ис. 1:2 | Слыши, земле: се, азъ навожду на люди сiя злая, плодъ отвращенiя ихъ, яко словесъ моихъ не послушаша и законъ мой отвергоша. |
6:20 | Вскую мнѣ кадило от Савы приносите и кинамонъ от земли дальнiя? всесожженiя ваша не суть прiятна, и жертвы вашя не усладиша мя. |
6:21 | Сего ради тако глаголетъ Господь: се, азъ дамъ на люди сiя болѣзнь, и изнемогутъ отцы и сынове вкупѣ, сосѣдъ и искреннiй его погибнутъ. |
6:22 | Сiя глаголетъ Господь: се, людiе грядутъ от сѣвера, и языкъ великъ востанетъ от конецъ земли, |
6:23 | лукъ и щитъ возмутъ: мучителенъ есть и не умилосердится: гласъ его, яко море шумящее: на конехъ и колесницахъ ополчится аки огнь на брань на тя, дщи Сiоня. |
6:24 | Слышахомъ слухъ его, ослабѣша руцѣ наши, скорбь объятъ насъ, болѣзни яко родящiя. |
6:25 См.: 🔗Мф. 24:17 | Не исходите на нивы и на пути не ходите, понеже мечь вражiй обитаетъ окрестъ. |
6:26 См.: 🔗Иер. 4:8 | Дщи людій моихъ, препояшися вретищемъ и посыплися пепеломъ, плачь возлюбленнаго сотвори тебѣ рыданiе горько, понеже внезапу прiидетъ запустѣнiе на васъ. |
6:27 См.: 🔗Иер. 1:10 | Искусителя дахъ тя въ людехъ искусныхъ, и увѣси мя, внегда искусити ми путь ихъ: |
6:28 См.: 🔗Иез. 22:18 | вси непослушни ходящiи строптиво: мѣдь и желѣзо, вси растлѣни суть. |
6:29 | Оскудѣ мѣхъ от огня, истлѣ олово: всуе ковачь сребро куетъ, лукавства бо ихъ не истаяша. |
6:30 См.: 🔗Ис. 1:22 | Сребро отриновено нарцыте ихъ, яко Господь отверже ихъ. |