|
Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 4 | |
| 4:1 | И услышаша сынове Израилевы живущiи во Иудеи вся, елика сотвори Олофернъ языкомъ, вождоначалникъ навуходоносора царя Ассирійскаго, и имже образомъ расхити вся священная ихъ и даде сiя во истребленiе: |
| 4:2 | и убояшася зѣло от лица его, и о иерусалимѣ и о храмѣ Господа Бога своего смятошася, |
| 4:3 | понеже недавно изыдоша от плѣненiя и недавно вси людiе собрашася Иудейстiи, и сосуди и олтарь и домъ от оскверненiя освящена быша. |
| 4:4 | И послаша во всякiй предѣлъ самаріи и коніи, и веѳорона и велмена и иерихона, и въ хову и есору и во юдоль Салимскую, |
| 4:5 | и предпрiяша вся верхи горъ высокихъ, и оградиша стѣнами сущыя въ нихъ села, и отложиша на пищу ко приуготовленiю брани, яко недавно быша поля ихъ пожата. |
| 4:6 | И писа Иоакимъ иерей великiй, иже бѣ во днехъ онѣхъ во Иерусалимѣ, живущымъ во ветилуи и ветомесѳемѣ, иже есть противу есдрилона, на лицы поля сущаго близъ Доѳаима, |
| 4:7 | глаголя одержати восходы горнiя, ибо ими бѣ входъ во Иудею, и бѣ удобно возбраняти ихъ приходящихъ, тѣсну проходу сущу, яко всѣмъ мужемъ по два [проити]. |
| 4:8 | И сотвориша сынове Израилевы, якоже повелѣ имъ Иоакимъ иерей великiй и старѣйшинство всего сонма Израилева, иже сѣдяху во Иерусалимѣ. |
| 4:9 | И возопиша всякiй мужъ Израилевъ къ Богу съ прилѣжанiемъ великимъ и смириша душы своя въ прилѣжанiи велицѣмъ: |
| 4:10 | сами и жены ихъ и младенцы ихъ, и скоти ихъ, и всякiй пришлецъ и наемникъ, и сребромъ купленый ихъ, возложиша вретища на чресла своя. |
| 4:11 | И всякiй мужъ Израилевъ и жена, и дѣти, и живущiи во іерусалимѣ падоша предъ лицемъ храма, и посыпаша перстiю главы своя, и простроша вретища своя предъ лицемъ Господнимъ, |
| 4:12 | и олтарь вретищемъ одѣяша, и возопиша къ Богу Израилеву единодушно прилѣжно, еже не дати въ расхищенiе младенцевъ ихъ, и женъ въ плѣненiе, и градовъ наслѣдiя ихъ въ разоренiе, и святая во оскверненiе и поношенiе, обрадованiе языкомъ. |
| 4:13 | И услыша Господь гласъ ихъ и призрѣ на скорбь ихъ. И бяху людiе постящеся дни многи во всей Иудеи и Иерусалимѣ, предъ лицемъ святыхъ Господа Вседержителя. |
| 4:14 | И Иоакимъ иерей великiй, и вси предстоящiи предъ Господемъ, иерее и служащiи Господеви, вретищами препоясани о чреслѣхъ своихъ, приношаху всесожженiе непрестанное и обѣты и произвольная даянiя людій: |
| 4:15 | и бѣ пепелъ на кидарѣхъ ихъ, и вопiяху ко Господу от всея силы, да посѣтитъ во благо весь домъ Израилевъ. |
