Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 2 | |
2:1 См.: 🔗2Мак. 1:19 | Обрѣтается же во описанiихъ иереміи пророка, яко повелѣ огня взяти преселяющымся, якоже знаменовася, |
2:2 См.: 🔗Иер. 1:4 | и якоже заповѣда преселяющымся пророкъ, давъ имъ законъ, да не забываютъ повелѣнiй Господнихъ и да не прельстятся умы, видяще идолы златы и сребряны и сущую окрестъ ихъ утварь. |
2:3 | И ина такова глаголя, моляше, да не отступитъ законъ от сердца ихъ. |
2:4 См.: 🔗Втор. 34:1 | Бѣ же въ писанiи, яко скинiи и кивоту повелѣ пророкъ по Божественному отвѣту бывшему ему послѣдствовати, дондеже взыде въ гору на нюже Моисей возшедъ, видѣ Божiе наслѣдiе. |
2:5 | И пришедъ иереміа обрѣте пещеру и жилище, и скинiю и кивотъ, и олтарь ѳимiама внесе тамо, и двери загради. |
2:6 | И приступиша нѣцыи от послѣдствующихъ, да назнаменаютъ себѣ путь, и не могоша обрѣсти. |
2:7 | Егда же позна иереміа, укоривъ ихъ, рече: яко невѣдомо будетъ мѣсто, дондеже соберетъ Богъ собранiе людій и милостивъ будетъ: |
2:8 См.: 🔗Исх. 40:34 🔗3Цар. 8:22 | и тогда Господь покажетъ сiя, и явится слава Господня и облакъ, якоже и при Моисеи являшеся, якоже и соломонъ моли, да мѣсто освятится вельми. |
2:9 | Являшеся же, и яко премудрость имѣя вознесе жертву обновленiя и совершенiя церкве. |
2:10 | Якоже и Моисей моляшеся ко Господу, и сниде огнь съ небесе и пояде жертвы: такожде и соломонъ молися, и сниде огнь съ небесе и пожже всесожженiя. |
2:11 См.: 🔗Лев. 10:16 | И рече Моисей: понеже не снѣдено бысть сущее за грѣхъ, попалися. |
2:12 | Такожде и соломонъ осмь дній празднова. |
2:13 | Повѣдашася же и въ написанiихъ и въ памятописанiихъ бывшихъ при нееміи таяжде: и како строящь книгоположницу собра книги, яже о царехъ и о пророцѣхъ и о давидѣ, и епистолiи царей о приношенiихъ. |
2:14 | Такожде и Иуда, падшая бранiю бывшею намъ, собра вся, и суть при насъ. |
2:15 | Сихъ убо аще требуете, приносящихъ вамъ послите. |
2:16 | Хотяще убо праздновати очищенiе, писахомъ вамъ: благо убо сотворите празднующе дни. |
2:17 | Богъ же спасый вся люди своя и воздавый наслѣдiе всѣмъ и царствiе, и священство и освященiе, |
2:18 См.: 🔗Втор. 30:4 | якоже обѣща въ законѣ: уповаемъ бо на Бога, яко скоро насъ помилуетъ и соберетъ от поднебесныя въ мѣсто святое: |
2:19 | изъятъ бо насъ от великихъ бѣдъ и мѣсто очисти. |
2:20 | Дѣла же Иуды маккавеа и братiй его, и церкве великiя очищенiе, и обновленiе жертвенника: |
2:21 | еще же и о бранехъ на Антiоха епифана и сына его Евпатора: |
2:22 | и о явленiихъ съ небесе бывшихъ благомужествовавшымъ Иудейства ради любочестно, яко всю страну мали суще опустошаху, и варваровъ множество прогоняху, |
2:23 | и преславную во всей вселеннѣй церковь возсоздаша, и градъ избавиша, и хотящыя разоритися законы исправляху, Господу со всякою кротостiю милостиву бывающу имъ: |
2:24 | яже от Иасона киринеа извѣщена пятiю книгами, покусимся единымъ сочиненiемъ сократити. |
2:25 | Созерцающе бо многое число [вещей] и сущее неудобство хотящымъ приступити къ повѣсти исторiи множества ради вещества, |
2:26 | попекохомся, дабы хотящiи читати имели души утѣшенiе, любомудрствующiи же удобѣе прiимали на память, вси же чтущiи пользу. |
2:27 | И намъ убо прiявшымъ трудъ сокращенiя неудобно, пота же и бдѣнiя дѣло [творимъ]: |
2:28 | якоже уготовляющему пиръ и ищущему иныхъ пользы не легко убо, обаче за благодаренiе многихъ сладцѣ трудъ потерпимъ. |
2:29 | Испытность убо о кіихждо списателю попустивше, послѣдовати примѣру сокращенiя потщимся. |
2:30 | Якоже бо новыя храмины архитектону о всемъ зданiи пещися подобаетъ, и живописати начинающему приличныхъ ко украшенiю искати, тако мню и о насъ. |
2:31 | Еже убо глубочае испытовати и о всѣхъ творити слово и любопытствовати о коемждо подробну, повѣсти сочинителю достоитъ. |
2:32 | Сокращенiю же реченiй послѣдовати и тонкаго испытанiя вещей бѣгати, сокращенiе творящему попущати должно. |
2:33 | Отсюду убо начнимъ повѣсть предреченнымъ толико присовокупивше: неразумно бо предисловiе исторiи умножати, самую исторiю сокращати. |