Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 8 | |
8:1 | И рече Господь къ Моисею, глаголя: |
8:2 См.: 🔗Исх. 25:37 🔗Исх. 27:21 | глаголи Аарону и речеши къ нему: егда поставиши свѣтила, от страны спреди свѣтилника да свѣтятъ седмь свѣтила. |
8:3 | И сотвори тако Ааронъ: от единыя страны спреди свѣтилника возжже свѣтила его, якоже повелѣ Господь Моисею. |
8:4 См.: 🔗Исх. 25:31 🔗3Цар. 7:49 | И сiе устроенiе свѣтилника: слiяно злато стебль его и крины его, слiяно все: по образу, егоже показа Господь Моисею, тако сотвори свѣтилникъ. |
8:5 | И рече Господь къ Моисею, глаголя: |
8:6 См.: 🔗Чис. 19:7 | поими левиты от среды сыновъ Израилевыхъ, и да очистиши я: |
8:7 См.: 🔗Лев. 14:8 🔗2Пар. 23:6 | и сице да сотвориши имъ очищенiе ихъ: покропиши на нихъ воду очищенiя, и да взыдетъ бритва на все тѣло ихъ, и исперутъ ризы своя, и чисти будутъ: |
8:8 | и да возмутъ телца единаго от воловъ, и сего жертву муки пшеничны, спряжены съ елеемъ, и телца единолѣтна от воловъ да возмеши грѣха ради: |
8:9 См.: 🔗1Езд. 6:18 | и да приведеши левиты предъ скинiю свидѣнiя, и собереши весь сонмъ сыновъ Израилевыхъ: |
8:10 | и приведеши левиты предъ Господа, и да возложатъ сынове Израилстiи руки своя на левиты: |
8:11 См.: 🔗Исх. 29:24 | и да отлучитъ Ааронъ левиты отданiе предъ Господа от сыновъ Израилевыхъ, и да служатъ службы Господеви: |
8:12 | левити же да возложатъ руки на главы телцевъ: и да сотвориши единаго о грѣсѣ и единаго во всесожженiе Господу, умилостивити о нихъ: |
8:13 | и поставиши левиты предъ Господемъ и предъ Аарономъ и предъ сынми его, и отдаси я отданiе Господу: |
8:14 | и да отлучиши левиты от среды сыновъ Израилевыхъ, и будутъ Мнѣ: |
8:15 | и по сихъ да внидутъ левиты дѣлати дѣла скинiи свидѣнiя: и да очистиши ихъ, и отдаси я предъ Господемъ: яко отданiе отданы сіи Мнѣ суть от среды сыновъ Израилевыхъ: |
8:16 См.: 🔗Чис. 3:12 🔗Чис. 18:6 | вмѣсто отверзающихъ всяка ложесна первенцевъ всѣхъ от сыновъ Израилевыхъ, прiяхъ я Себѣ: |
8:17 См.: 🔗Чис. 3:13 | яко Мнѣ есть всякъ первенецъ от сыновъ Израилевыхъ, от человѣка до скота: въ день въ оньже поразихъ всякаго первенца въ земли Египетстѣй, освятихъ я Себѣ, |
8:18 | и взяхъ левиты вмѣсто всякаго первенца сыновъ Израилевыхъ, |
8:19 См.: 🔗Чис. 3:9 | и отдахъ левиты отданiемъ Аарону и сыномъ его от среды сыновъ Израилевыхъ дѣлати дѣла сыновъ Израилевыхъ въ скинiи свидѣнiя и умилостивляти о сынѣхъ Израилевыхъ: да не будетъ язва на сынѣхъ Израилевыхъ, внегда приступати имъ къ святымъ. |
8:20 | И сотвори Моисей и Ааронъ и весь сонмъ сыновъ Израилевыхъ левитомъ, якоже заповѣда Господь Моисею о левитѣхъ, тако сотвориша имъ сынове Израилевы. |
8:21 | И очистишася левити и испраша ризы своя: и отдаде я Ааронъ отданiе предъ Господемъ, и помолися о нихъ Ааронъ, очищенiя ради ихъ. |
8:22 | И по сихъ внидоша левити служити службы своя въ скинiи свидѣнiя предъ Аарономъ и предъ сыны его: якоже повелѣ Господь Моисею о левитѣхъ, тако сотвориша имъ. |
8:23 | И рече Господь къ Моисею глаголя: |
8:24 См.: 🔗Чис. 4:3 🔗1Пар. 23:3 | сiе есть еже о левитѣхъ: от двадесяти пяти лѣтъ и вышше, да внидутъ служити служенiе въ скинiи свидѣнiя: |
8:25 | и от пятидесяти лѣтъ да отстанутъ от служенiя и не служатъ ктому. |
8:26 | И да служатъ братiя его въ скинiи свидѣнiя еже стрещи стражи, дѣлъ же да не дѣлаютъ. Тако сотвориши левитомъ въ стражахъ ихъ. |