Евангелие от Матфея, глава 17

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) Рус. (еп. Кассиан) Беларускi Українська English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 17
17:1 См.: 🔗Мк. 9:2 🔗Лк. 9:28	И по днехъ шестихъ поятъ Иисусъ Петра и Иакова и Иоан­на брата его, и воз­веде ихъ на гору высоку едины,
17:2	и преобразися предъ ними: и просвѣтися лице Его яко солнце, ризы же Его быша бѣлы яко свѣтъ.
17:3	И се, явистася имъ Моисей и Илiа, съ Нимъ глаголюща.
17:4	Отвѣщавъ же Петръ рече [ко] Иисусови: Господи, добро есть намъ здѣ быти: аще хощеши, сотворимъ здѣ три сѣни, Тебѣ едину, и Моисеови едину, и едину Илiи.
17:5 См.: 🔗Втор. 18:15 🔗Мф. 3:17 🔗Лк. 3:22	Еще [же] ему глаголющу, се, облакъ свѣтелъ осѣни ихъ: и се, гласъ изъ облака глаголя: Сей есть Сынъ Мой Воз­люблен­ный, о Немже благоволихъ: Того послушайте.
17:6	И слышав­ше ученицы падоша ницы и убояшася зѣло.
17:7	И при­­ступль Иисусъ при­­коснуся ихъ и рече: востаните и не бойтеся.
17:8	Возведше же очи сво­и, ни когоже видѣша, токмо Иисуса единаго.
17:9	И сходящымъ имъ съ горы, заповѣда имъ Иисусъ, глаголя: ни комуже повѣдите видѣнiя, дондеже Сынъ Человѣческiй изъ мертвыхъ воскреснетъ.
17:10 См.: 🔗Мф. 11:14 🔗Мк. 9:11	[Зач. 71.] И вопросиша Его ученицы Его, глаголюще: что убо книжницы глаголютъ, яко Илiи подобаетъ прiити прежде?
17:11	Иисусъ же от­вѣщавъ рече имъ: Илiа убо прiидетъ прежде и устроитъ вся:
17:12	глаголю же вамъ, яко Илiа уже прiиде, и не познаша его, но сотвориша о немъ, елика восхотѣша: тако и Сынъ Человѣческiй имать пострадати от­ нихъ.
17:13	Тогда разумѣша ученицы, яко о Иоан­нѣ Крестители рече имъ.
17:14 См.: 🔗Мк. 9:17 🔗Лк. 9:38	[Зач. 72.] И при­­шедшымъ имъ къ народу, при­­ступи къ Нему человѣкъ, кланяяся Ему
17:15	и глаголя: Господи, помилуй сына мо­его, яко на новы месяцы бѣснует­ся и злѣ страждетъ: множицею бо падаетъ во огнь и множицею въ воду:
17:16	и при­­ведохъ его ко ученикомъ Тво­имъ, и не воз­могоша его исцѣлити.
17:17	Отвѣщавъ же Иисусъ рече: о, роде невѣрный и развращен­ный, доколѣ буду съ вами? Доколѣ терплю вамъ? При­­ведите Ми его сѣмо.
17:18	И запрети ему Иисусъ, и изыде изъ него бѣсъ: и исцѣлѣ отрокъ от­ часа того.
17:19	Тогда при­­ступльше ученицы ко Иисусу на единѣ, рѣша: почто мы не воз­могохомъ изгнати его?
17:20 См.: 🔗Мф. 21:21 🔗Мк. 9:23 🔗Мк. 11:23 🔗Лк. 17:6	Иисусъ же рече имъ: за невѣр­ст­вiе ва­ше: аминь бо глаголю вамъ: аще имате вѣру яко зерно горушно, речете горѣ сей: прейди от­сюду тамо, и прейдетъ: и ничтоже невоз­можно будетъ вамъ:
17:21 См.: 🔗Мк. 9:29	сей же родъ не исходитъ, токмо молитвою и постомъ.
17:22 См.: 🔗Лк. 9:22 🔗Лк. 24:7	Живущымъ же имъ въ Галилеи, рече имъ Иисусъ: преданъ имать быти Сынъ Человѣческiй въ руцѣ человѣкомъ,
17:23	и убiютъ его, и въ третiй день востанетъ. И скорбни быша зѣло.
17:24	[Зач. 73.] Пришедшымъ же имъ въ Капернаумъ, при­­ступиша прiемлющiи дидрахмы къ Петрови и рѣша: Учитель вашъ не дастъ ли дидрахмы?
17:25	Глаголя: ей. И егда вниде въ домъ, предвари его Иисусъ, глаголя: что ти мнит­ся, Симоне? Царiе земстiи от­ кіихъ прiемлютъ дани или кинсонъ? От­ сво­ихъ ли сыновъ, или от­ чужихъ?
17:26	Глагола Ему Петръ: от­ чужихъ. Рече ему Иисусъ: убо свободни суть сынове:
17:27	но да не соблазнимъ ихъ, шедъ на море, верзи удицу, и, юже прежде имеши рыбу, воз­ми: и от­верзъ уста ей, обрящеши статиръ: той вземъ даждь имъ за Мя и за ся.