Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 15 | |
15:1 | По глаголѣхъ же сихъ, бысть слово Господне ко Авраму въ видѣнiи нощiю, глаголя: не бойся, Авраме: Азъ защищаю тя, мзда твоя многа будетъ зѣло. |
15:2 См.: 🔗Быт. 24:2 | Глагола же Аврамъ: Владыко Господи, что ми даси? Азъ же отпущаюся безчаденъ: сынъ же Масекъ домочадицы моея, сей Дамаскъ Елiезеръ. |
15:3 | И рече Аврамъ: понеже мнѣ не далъ еси сѣмене, домочадецъ же мой наслѣдникъ мой будетъ. |
15:4 | И абiе гласъ Господень бысть къ нему, глаголющiй: не будетъ сей наслѣдникъ твой, но иже изыдетъ изъ тебе, той будетъ наслѣдникъ тебѣ. |
15:5 См.: 🔗Быт. 22:17 | Изведе же его вонъ и рече ему: воззри на небо и изочти звѣзды, аще возможеши исчести я. И рече: тако будетъ сѣмя твое. |
15:6 | И вѣрова Аврамъ Богу, и вмѣнися ему въ правду. |
15:7 | Рече же къ нему: Азъ [есмь] Богъ изведый тя от страны Халдейскiя, яко дати тебѣ землю сiю наслѣдствовати. |
15:8 | И рече: Владыко Господи, по чесому уразумѣю, яко наслѣдити ю имамъ? |
15:9 | Рече же къ нему: возми Мнѣ юницу трилѣтну и козу трилѣтну и овна трилѣтна, и горлицу и голубя. |
15:10 См.: 🔗Иер. 34:18 | Взя же онъ вся сiя и раздѣли я на полы, и положи я противолична едина ко другому: птицъ же не раздѣли. |
15:11 | Слетѣша же птицы на тѣлеса растесаная ихъ: и сѣде близу ихъ Аврамъ. |
15:12 | Заходящу же солнцу, ужасъ нападе на Аврама, и се, страхъ теменъ велiй нападе нань. |
15:13 См.: 🔗Деян. 7:6 🔗Исх. 12:40 | И речено бысть ко Авраму: вѣдый увѣси, яко преселно будетъ сѣмя твое въ земли не своей, и поработятъ я, и озлобятъ я, и смирятъ я лѣтъ четыриста: |
15:14 | языку же, емуже поработаютъ, сужду Азъ: по сихъ же изыдутъ сѣмо со имѣнiемъ многимъ: |
15:15 | ты же отъидеши ко отцемъ твоимъ въ мирѣ, препитанъ въ старости добрѣй: |
15:16 См.: 🔗Исх. 12:41 | въ четвертѣмъ же родѣ возвратятся сѣмо: не бо исполнишася грѣси Аморреовъ до нынѣ. |
15:17 См.: 🔗Иер. 34:18 | Егда же бысть солнце на западѣ, пламень бысть: и се, пещь дымящися, и свѣщы огненны, яже проидоша между растесанiи сими. |
15:18 | Въ день той завѣща Господь Авраму завѣтъ, глаголя: сѣмени твоему дамъ землю сiю от рѣки Египетскiя даже до рѣки великiя Евфрата: |
15:19 | Кенеовъ и Кенезеовъ и Кедмонеовъ, |
15:20 | и Хеттеовъ и Ферезеовъ и Рафаиновъ, |
15:21 | и Аморреовъ и Хананеовъ, и Евеовъ и Гергесеовъ и Иевусеовъ. |