Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 12 | |
12:1 | И во время оно востанетъ Михаилъ князь великiй стояй о сынѣхъ людій твоихъ: и будетъ время скорби, скорбь, якова не бысть, отнелѣже создася языкъ на земли, даже до времене онаго: и въ то время спасутся людiе твои вси, обрѣтшiися вписани въ книзѣ, |
12:2 См.: 🔗Мф. 25:46 🔗Ин. 5:29 | и мнози от спящихъ въ земнѣй персти востанутъ, сіи въ жизнь вѣчную, а онiи во укоризну и въ стыдѣнiе вѣчное. |
12:3 См.: 🔗Прем. 3:7 🔗Мф. 13:43 | И смыслящiи просвѣтятся аки свѣтлость тверди, и от праведныхъ многихъ аки звѣзды во вѣки и еще. |
12:4 См.: 🔗Дан. 12:9 🔗Отк. 22:10 | Ты же, данiиле, загради словеса и запечатай книги до времене скончанiя, дондеже научатся мнози, и умножится вѣдѣнiе. |
12:5 См.: 🔗Отк. 10:5 | И видѣхъ азъ данiилъ, и се, два инiи стояху, единъ о сiю страну устiя рѣки, а другій объ ону страну устiя рѣки. |
12:6 См.: 🔗Дан. 10:5 | И рече къ мужу оболченному въ ризу льняну, иже бяше верху воды рѣчныя: доколѣ окончанiе чудесъ, яже реклъ еси? |
12:7 См.: 🔗Отк. 10:5 | И слышахъ от мужа оболченнаго въ ризу льняну, иже бяще верху воды рѣчныя, и воздвиже десницу свою и шуйцу свою на небо и клятся живущимъ во вѣки, яко во время и во времена и въ полъ времене, егда скончается разсыпанiе руки людій освященныхъ, и увѣдятъ сiя вся. |
12:8 | Азъ же слышахъ, и не разумѣхъ, и рѣхъ: господи, что послѣдняя сихъ? |
12:9 | И рече: гряди, данiиле, яко заграждена словеса и запечатана даже до конца времене: |
12:10 См.: 🔗Дан. 11:33 🔗1Пет. 1:7 | избранни будутъ и убѣлятся, и аки огнемъ искусятся и освятятся мнози: и собеззаконнуютъ беззаконницы, и не уразумѣютъ вси нечестивiи, но умнiи уразумѣютъ: |
12:11 См.: 🔗Дан. 9:27 🔗Мф. 24:15 | от времене же премѣненiя жертвы всегдашнiя, и дастся мерзость запустѣнiя на дни тысяща двѣсти девятьдесятъ: |
12:12 См.: 🔗Мк. 13:13 | блаженъ терпяй и достигнувый до дній тысящи трехъ сотъ тридесяти пяти: |
12:13 | ты же иди и почивай: еще бо дніе суть и часы во исполненiе скончанiя, и почіеши, и востанеши въ жребiй твой, въ скончанiе дній. |