Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 35 | |
35:1 | Слово бывшее ко иереміи от Господа, во дни Иоакима сына Иосіина, царя Иудина, глаголя: |
35:2 См.: 🔗1Пар. 2:55 | иди въ домъ рихавль и призови я и веди я въ домъ Господень, во единъ от дворовъ, и напоиши я виномъ. |
35:3 | И изведохъ Иезонiю сына иереміина, сына хавасіина, и братiю его, и сыны его, и весь домъ рихавль, |
35:4 См.: 🔗1Езд. 10:6 | и введохъ я въ домъ Господень, во хранилище имѣнiя сыновъ Ананiи, сына годоліина, человѣка Божiя, иже есть близъ дому князей, выше дому маасеова, сына селомля, стрегушаго дворъ. |
35:5 | И поставихъ предъ ними корчагъ вина и чашы, и рекохъ: пійте вино. |
35:6 См.: 🔗4Цар. 10:15 | И рекоша: не пiемъ вина, яко Ионадавъ сынъ рихавль, отецъ нашъ, заповѣда намъ, глаголя: не пійте вина вы и сынове ваши до вѣка: |
35:7 | и храминъ да не соградите, и сѣмене не сѣйте, и виноградъ да не будетъ вамъ, но въ кущахъ да живете вся дни живота вашего, да поживете дни многи на земли, на нейже обитаете вы. |
35:8 | И послушахомъ словесе Ионадава отца нашего, еже не пити вина вся дни живота нашего, мы и жены нашя, и сынове наши и дщери нашя, |
35:9 | и еже не сограждати храминъ жити тамо: и винограда и нивы и сѣмене не бысть намъ. |
35:10 | И жихомъ въ кущахъ, и послушахомъ и сотворихомъ по всѣмъ, елика заповѣда намъ Ионадавъ отецъ нашъ. |
35:11 | И бысть, егда прiиде навуходоносоръ царь Вавилонскiй на землю нашу, и рекохомъ: вшедше да внидемъ во Иерусалимъ от лица Халдейска и от лица силы Ассирійскiя: и вселихомся ту. |
35:12 | И бысть слово Господне ко иереміи глаголя: |
35:13 | тако глаголетъ Господь силъ, Богъ Израилевъ: иди и рцы человѣку Иудину и живущымъ во Иерусалимѣ: еда не воспрiимете наказанiя послушати словесъ моихъ? |
35:14 См.: 🔗Иер. 7:13 | Утвердиша слово сынове Ионадава, сына рихавля, еже заповѣда сыномъ своимъ, еже не пити вина, и не пиша даже до дне сего, яко послушаша заповѣди отца своего: азъ же глаголахъ къ вамъ заутра, и не послушасте мене: |
35:15 | и посылахъ къ вамъ рабы моя пророки, утренюя и глаголя: обратитеся кійждо от пути своего злаго, и лучше сотворите дѣла своя, и не ходите вслѣдъ боговъ инѣхъ, еже служити имъ, и вселитеся на земли, юже дахъ вамъ и отцемъ вашымъ: и не приклонисте ушесъ вашихъ и не послушасте. |
35:16 | И уставиша сынове Ионадавли, сына рихавля, заповѣдь отца своего, юже заповѣда имъ: а людiе мои не послушаша мене. |
35:17 См.: 🔗Ис. 65:12 🔗Ис. 66:4 | Сего ради сице рече Господь силъ, Богъ Израилевъ: се, азъ наведу на Иуду и на вся живущыя во Иерусалимѣ вся злая, яже соглаголахъ на ня: понеже глаголахъ въ нимъ, и не послушаша, призывахъ я, и не отвѣщаша ми. |
35:18 | Дому же рихавлю рече иереміа: тако рече Господь Богъ Вседержитель: понеже послушаша сынове Ионадава, сына рихавля, заповѣди отца своего, творити, елика заповѣда имъ отецъ ихъ: |
35:19 См.: 🔗Иер. 33:17 | сего ради сiя глаголетъ Господь силъ, Богъ Израилевъ: не оскудѣетъ мужъ сыновъ Ионадавлихъ, сына рихавля, стояй предъ лицемъ моимъ, вся дни земли. |