Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Псалом 34 | |
34:1 | Псаломъ Давиду. |
34:2 См.: 🔗Ис. 49:25 | Суди, Господи, обидящыя мя, побори борющыя мя. |
34:3 | Прiими оружiе и щитъ и востани въ помощь мою: |
34:4 | изсуни мечь и заключи сопротивъ гонящихъ мя: рцы души моей: спасенiе твое есмь Азъ. |
34:5 См.: 🔗Пс. 69:3 | Да постыдятся и посрамятся ищущiи душу мою, да возвратятся вспять и постыдятся мыслящiи ми злая. |
34:6 | Да будутъ яко прахъ предъ лицемъ вѣтра, и Ангелъ Господень оскорбляя ихъ: |
34:7 | да будетъ путь ихъ тма и ползокъ, и Ангелъ Господень погоняяй ихъ: |
34:8 См.: 🔗Лк. 23:4 | яко туне скрыша ми пагубу сѣти своея, всуе поносиша души моей. |
34:9 См.: 🔗Пс. 7:16 🔗Дан. 6:24 | Да прiидетъ ему сѣть, юже не вѣсть, и ловитва, юже скры, да обыметъ и, и въ сѣть да впадетъ въ ню. |
34:10 | Душа же моя возрадуется о Господѣ, возвеселится о спасенiи Его. |
34:11 См.: 🔗Иов. 36:13 | Вся кости моя рекутъ: Господи, Господи, кто подобенъ Тебѣ? Избавляяй нища изъ руки крѣпльшихъ его, и нища, и убога от расхищающихъ его. |
34:12 | Воставше на мя свидѣтеле неправеднiи, яже не вѣдяхъ, вопрошаху мя. |
34:13 | Воздаша ми лукавая возъ благая, и безчадiе души моей. |
34:14 | Азъ же, внегда они стужаху ми, облачахся во вретище и смиряхъ постомъ душу мою, и молитва моя въ нѣдро мое возвратится. |
34:15 | Яко ближнему, яко брату нашему, тако угождахъ: яко плачя и сѣтуя, тако смиряхся. |
34:16 См.: 🔗Иов. 30:9 🔗Лк. 23:35 | И на мя возвеселишася и собрашася: собрашася на мя раны, и не познахъ: раздѣлишася, и не умилишася. |
34:17 | Искусиша мя, подражниша мя подражненiемъ, поскрежеташа на мя зубы своими. |
34:18 | Господи, когда узриши? Устрой душу мою от злодѣйства ихъ, от левъ единородную мою. |
34:19 См.: 🔗Пс. 21:26 | Исповѣмся Тебѣ въ церкви мнозѣ, въ людехъ тяжцѣхъ восхвалю Тя. |
34:20 См.: 🔗Ин. 15:25 | Да не возрадуются о мнѣ враждующiи ми неправедно, ненавидящiи мя туне и помизающiи очима: |
34:21 | яко мнѣ убо мирная глаголаху, и на гнѣвъ лести помышляху. |
34:22 | Разшириша на мя уста своя, рѣша: благоже, благоже, видѣша очи наши. |
34:23 | Видѣлъ еси, Господи, да не премолчиши: Господи, не отступи от мене. |
34:24 См.: 🔗Пс. 43:24 | Востани, Господи, и вонми суду моему, Боже мой и Господи мой, на прю мою. |
34:25 | Суди ми, Господи, по правдѣ Твоей, Господи Боже мой, и да не возрадуются о мнѣ. |
34:26 | Да не рекутъ въ сердцахъ своихъ: благоже, благоже души нашей: ниже да рекутъ: пожрохомъ его. |
34:27 См.: 🔗Иов. 8:22 🔗Пс. 6:11 | Да постыдятся и посрамятся вкупѣ радующiися зломъ моимъ: да облекутся въ студъ и срамъ велерѣчующiи на мя. |
34:28 См.: 🔗Пс. 39:17 | Да возрадуются и возвеселятся хотящiи правды моея: и да рекутъ выну, да возвеличится Господь, хотящiи мира рабу Его. |
34:29 | И языкъ мой поучится правдѣ Твоей, весь день хвалѣ Твоей. |