Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 2 | |
2:1 См.: 🔗Чис. 21:4 | И возвратившеся воздвигохомся въ пустыню, путемъ моря Чермнаго, якоже глагола Господь ко мнѣ: и обходихомъ гору Сииръ дни многи. |
2:2 | И рече Господь ко мнѣ: |
2:3 См.: 🔗Суд. 5:4 | довлѣетъ вамъ обхождати гору сiю: возвратитеся убо къ сѣверу: |
2:4 См.: 🔗Чис. 20:14 | и людемъ заповѣждь, глаголя: вы пройдите сквозѣ предѣлы братiи вашея, сыновъ Исавовыхъ, живущихъ въ Сиирѣ, и убоятся васъ и ужаснутся зѣло: |
2:5 | не сотворите съ ними рати: не дахъ бо вамъ от земли ихъ ниже стопы ноги, яко во жребiй дахъ сыномъ Исавовымъ гору Сииръ: |
2:6 | сребромъ пищу купите себѣ у нихъ и ядите, и воду въ мѣру возмите от нихъ на цѣнѣ и пійте: |
2:7 См.: 🔗Втор. 1:31 🔗Быт. 21:22 | ибо Господь Богъ твой благослови тебе во всякомъ дѣлѣ руку твоею: разумѣй, како прошелъ еси пустыню великую и страшную сiю: се, четыредесять лѣтъ Господь Богъ твой съ тобою, и не востребовалъ еси словесе. |
2:8 См.: 🔗4Цар. 14:22 🔗3Цар. 9:26 | И минухомъ братiю свою сыны Исавли, живущыя въ Сиирѣ, у пути Аравскаго от Елона и от Гесiонъ-Гавера, и возвратившеся преидохомъ путь въ пустыню Моавлю. |
2:9 См.: 🔗2Пар. 20:10 | И рече Господь ко мнѣ: не совраждуйтеся Моавитомъ и не сотворите съ ними рати: не дахъ бо вамъ от земли ихъ во жребiй, сыномъ бо Лотовымъ дахъ Ароиръ наслѣдити. |
2:10 См.: 🔗Быт. 14:5 🔗Чис. 13:23 | Оммины прежде сѣдяху на ней, народъ великъ и многъ и крѣпокъ якоже Енакими: |
2:11 | Рафаины глаголются и сіи, якоже и Енакими: и Моавити прозываютъ я Оммины. |
2:12 См.: 🔗Быт. 14:6 🔗Быт. 36:20 | И въ Сиирѣ сѣдяше Хоррей прежде, но сынове Исавовы потребиша я и искорениша я от лица своего: и вселишася вмѣсто ихъ, имже образомъ сотвори Израиль земли наслѣдiя своего, юже даде Господь имъ. |
2:13 См.: 🔗Чис. 21:12 | Нынѣ убо вы востаните и воздвигнитеся, и пройдите дебрь Заретову. |
2:14 | И дни, въ няже отидохомъ от Кадисъ-Варни дондеже преидохомъ дебрь Заретову, тридесять и осмь лѣтъ, дондеже паде весь родъ мужей воинскихъ от полка, якоже клятся имъ Господь Богъ. |
2:15 | И рука Божiя бяше на нихъ, погубити я от полка, дондеже падоша. |
2:16 | И бысть внегда падоша вси мужи воинстiи умирающе от среды людій, |
2:17 | и рече Господь ко мнѣ, глаголя: |
2:18 | ты прейдеши днесь предѣлы Моавлими Ароиръ: |
2:19 См.: 🔗Суд. 11:13 🔗Быт. 19:38 | и пришедше близъ сыновъ Амманихъ, не совраждуйтеся имъ и не сотворите съ ними рати: не дамъ бо тебѣ от земли сыновъ Амманихъ во жребiй, яко сыномъ Лотовымъ дахъ ю во жребiй. |
2:20 | Земля Рафаинска возъименуются: Рафаини бо на ней прежде живяху: Амманитяне же прозываютъ ихъ Зомминъ: |
2:21 См.: 🔗Чис. 13:23 | языкъ великъ и многъ и крѣпокъ, якоже и Енакими: и погуби я Господь от лица ихъ, и прiяша наслѣдiе и вселишася вмѣсто ихъ даже до сего дне: |
2:22 | якоже сотвориша сыномъ Исавовымъ живущымъ въ Сиирѣ, имже образомъ потребиша Хорреа от лица своего и наслѣдиша ихъ, и вселишася вмѣсто ихъ даже до сего дне: |
2:23 | и Евее живущiи во Асироѳѣ даже до Газы, и Каппадоки изшедшiи изъ Каппадокіи потребиша я, и вселишася вмѣсто ихъ. |
2:24 | Нынѣ убо востаните и воздвигнитеся, и прейдите вы дебрь Арноню: се, предахъ въ руцѣ твои Сиона царя Есевоня Аморрейска и землю его: начни наслѣдовати, сотвори съ нимъ рать днешнiй день: |
2:25 См.: 🔗Нав. 2:9 | начинай даяти трепетъ твой и страхъ твой предъ лицемъ всѣхъ языковъ сущихъ подъ небесемъ, иже слышавше имя твое возмятутся, и болѣзнь прiимутъ от лица твоего. |
2:26 См.: 🔗Чис. 21:21 | И послахъ послы от пустыни Кедамоѳъ къ Сиону царю Есевоню словесы мирными, глаголя: |
2:27 | да пройду сквозѣ землю твою: по пути пройду, не совращуся ни на десно, ни на лѣво: |
2:28 См.: 🔗Чис. 20:19 | пищу на цѣнѣ даси ми, и ямъ: и воду на цѣнѣ даси ми, и пiю: точiю ногама моима да прейду: |
2:29 | якоже сотвориша ми сынове Исавли живущiи въ Сиирѣ и Моавити живущiи во Ароирѣ, дондеже прейду Иорданъ на землю, юже Господь Богъ нашъ даетъ намъ. |
2:30 | И не восхотѣ Сионъ царь Есевонь, да пройдемъ сквозѣ его, яко ожесточи Господь Богъ нашъ духъ его и укрѣпи сердце его, да предастся въ руцѣ твои якоже во днешнiй день. |
2:31 См.: 🔗Ам. 2:9 | И рече Господь ко мнѣ: се, начахъ предаяти предъ лицемъ твоимъ Сиона царя Есевоня Аморрейска и землю его, и начинай наслѣдити землю его. |
2:32 | И изыде Сионъ царь Есевонь противу намъ самъ и вси людiе его на брань во Иассу: |
2:33 См.: 🔗Чис. 21:24 | и предаде его Господь Богъ нашъ предъ лицемъ нашимъ въ руцѣ наши: и убихомъ его, и сыны его и вся люди его: |
2:34 | и одержахомъ вся грады его во оно время, и разорихомъ всякъ градъ, ктому и жены ихъ и дѣти ихъ не оставихомъ живы: |
2:35 | токмо скотъ плѣнихомъ себѣ, и корысти градовъ взяхомъ. |
2:36 См.: 🔗2Цар. 24:5 🔗Чис. 21:15 | Изъ Ароира, иже есть при устiи водотечи Арнони, и градъ иже есть въ дебри, и даже до горы Галаадовы, не бысть градъ уцѣлѣвый от насъ: вся предаде Господь Богъ нашъ въ руцѣ наши: |
2:37 | токмо въ земли сыновъ Амманихъ не приступахомъ ко всѣмъ прилежащымъ къ водотечи Иавоковѣ и ко градомъ иже въ горахъ, якоже повелѣ намъ Господь Богъ нашъ. |