Вторая книга Маккавейская, глава 14 неканонич.

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 14
14:1	По трiехъ же лѣтѣхъ увѣда Иуда, яко димитрiй селевковъ сынъ вплыве сквоз­ѣ при­­станище, еже при­­ триполи, со множе­с­т­вомъ крѣпкимъ и кораблями,
14:2	и одержа страну и уби Антiоха и его намѣст­ника лисію.
14:3	Алкимъ же нѣкто бывый прежде архiерей, волею же осквернивыйся во времена смѣшенiя, помысливъ, яко никіимъ образомъ нѣсть ему спасенiя, ниже при­­хожденiя ко святому олтарю,
14:4	прiиде ко царю димитрiю сто пятьдесятъ перваго лѣта, при­­нося ему вѣнецъ златъ и финикъ, къ симъ же и цвѣты, иже мняхуся церковнiи быти: и въ день оный молча­ше.
14:5	Получивъ же время безумiю сво­ему содѣй­ст­ву­ю­щее, призванъ бысть димитрiемъ на соборъ и вопрошенъ, въ ко­емъ состоянiи и совѣтѣ стоятъ Иудее?
14:6	Къ симъ рече: глаголемiи от­ иудей Асидее, ихже вождь Иуда маккавей, брани строятъ и распри воз­двизаютъ, не допускающе цар­ст­ву благостоянiя получити:
14:7	сего ради от­лученъ прародитель­скiя славы, сирѣчь священ­ноначаль­ства, сѣмо нынѣ прiидохъ,
14:8	первое убо о надлежащихъ царю вѣрность содержащь, второе же и о сво­ихъ гражданѣхъ промышляя: предречен­ныхъ бо безсловесiемъ весьма родъ нашъ не мало страждетъ:
14:9	каяждо же сихъ познавъ, ты, царю, о странѣ и о обстоянiи рода на­шего про­уразумѣй по человѣколюбiю, еже имаши ко всѣмъ благопреклон­но­е:
14:10	донелѣже бо Иуда живъ есть, невоз­можно мира получити вещемъ.
14:11	Сицевымъ же речен­нымъ быв­шымъ от­ него, абiе прочiи друзи, вражду имущiи на Иуду, разжегоша димитрiа.
14:12	Призвавъ же скоро никанора старѣйшину надъ слонами и во­еводою поставивъ Иудеею, посла,
14:13	давъ заповѣдь, самаго убо Иуду убити, сущихъ же съ нимъ расточити, поставити же алкима архiереемъ превеликаго храма.
14:14	Тогда языцы убѣгшiи изъ Иудеи от­ Иуды, стадами при­­хождаху къ никанору, иудейская злополучiя и бѣд­ст­ва себѣ благополучiя мняще быти.
14:15	Слышав­ше же [Иудее] никанорово при­­ше­ст­вiе и нападенiе языковъ, посыпав­шеся землею, моляху поставив­шаго даже до вѣка люди своя и присно съ явленiемъ защищающаго свою часть.
14:16	Повелѣв­шу же во­еводу, скоро от­туду двигнушася и смѣсишася съ ними при­­ градцѣ десавли.
14:17	Симонъ же братъ Иудинъ сразився съ никаноромъ, мало же устрашився внезапнаго ради нахожденiя супостатовъ.
14:18	Обаче же слышавъ никаноръ муже­с­т­во при­­ Иудѣ сущихъ и благодушiе, имже подвизают­ся за отече­с­т­во, убояся судъ кровiю сотворити:
14:19	сего ради посла посидонiа и Ѳеодота и маттаѳію дати и взяти десницу.
14:20	Многу же о семъ быв­шу совѣту и во­еводѣ людемъ воз­вѣстив­шу и быв­шу единогласному всѣхъ изволенiю, со­изволиша на мирная
14:21	и нарекоша день, въ онъ же особно снидут­ся купно. И прiиде. И поставиша различная сѣдалища.
14:22	Повелѣ же Иуда вооружен­нымъ быти готовымъ въ мѣстѣхъ при­­личныхъ, да не когда от­ супостатъ внезапу злодѣянiе будетъ, и подобающую бесѣду обще сотвориша.
14:23	Пребыва­ше же никаноръ во Иерусалимѣ и нико­егоже зла сотвори, стада же народовъ собран­ныхъ от­пусти.
14:24	Имѣяше же Иуду всегда въ лицы, душевно къ мужу преклонися:
14:25	моли же его оженитися и чада сотворити. Оженися, благо поживе, общежитель­ствоваше.
14:26	Алкимъ же видя между ими благопрiят­ст­во и быв­шая совѣщанiя познавъ, иде къ димитрiю и глаголаше, яко никаноръ о вещехъ чуждая мудр­ст­вуетъ: Иуду бо, навѣтника цар­ст­ву, преемника воспрiя себѣ.
14:27	Царь же воз­ъярився и прелукавыми оклеветанiи его разсверѣпѣвъ, писа никанору глаголя: о совѣщанiихъ сихъ тяжко [ми есть] носити: повелѣваю ти маккавеа связана послати скоро во Антiохію.
14:28	Увѣдавъ же о сихъ никаноръ, смятеся и тяжко терпяше завѣщан­ная от­ринути, ничимже его мужу обидѣв­шу.
14:29	Но понеже царю сопротивитися не бѣ воз­можно, благовремен­ства наблюда­ше хитростiю во­ен­ною сiе совершити.
14:30	Маккавей же видя надъ собою грознѣе дѣюща никанора и обыкновен­ное срѣтенiе свирѣпѣе имуща, уразумѣвъ не от­ блага быти суров­ст­ву сему, собравъ не мало сущихъ окрестъ себе, скрыся от­ никанора.
14:31	Познавъ же другій, яко добль­ствен­но от­ мужа хитростiю предваренъ, при­­шедъ къ великому и святому храму, священ­никомъ подобающыя жертвы при­­носящымъ повелѣ предати мужа.
14:32	Симъ же съ клятвою рекшымъ, яко не вѣдятъ, гдѣ есть искомый, простеръ десницу на церковь, сими клят­ся:
14:33 См.: 🔗1Мак. 7:35	аще не предадите ми связана Иуду, то Божiй храмъ равенъ со землею сотворю, и олтарь раскопаю, и капище Дiонису славное воз­ставлю здѣ.
14:34	И сiя рекъ отъиде. Жерцы же воз­дѣюще руцѣ на небо, при­­зываху сущаго всегда споборника языку сво­ему, сiя рекуще:
14:35	ты, Господи всѣхъ, не требуяй ничтоже, благоволилъ еси храму обитанiя тво­его быти въ насъ:
14:36	и нынѣ, о, святе, всякаго освященiя Господи, сохрани во вѣкъ нескверненъ сей храмъ недавно очищен­ный, загради же всяка уста неправедна.
14:37	Разій же нѣкто от­ старѣйшинъ Иерусалимскихъ оклеветанъ бысть никанору, мужъ любитель гражданъ и зѣло добрѣ словущь и по благопрiят­ст­ву отецъ Иудеомъ именуемый:
14:38	бяше бо внесый въ прежнихъ временѣхъ несмѣшенiя судъ во Иудей­ст­вѣ, и тѣло и душу за Иудей­ст­во предаяше со всякимъ усердiемъ.
14:39	Хотящь же никаноръ явну сотворити ненависть, юже имѣ на иудеи, посла воиновъ болѣе пяти сотъ яти его.
14:40	Мняше бо, яко онаго по­имавъ, симъ содѣлаетъ бѣду.
14:41	Множе­ст­ву же народа хотящу столпъ обдержати и дворовыя двери разрушающу, и повелѣв­шу огнь при­­нести и двери зажещи, объятъ от­всюду бывъ, мечемъ поразися,
14:42	лучше добль­ствен­но хотящь умрети, нежели беззакон­никомъ подручникъ быти и свое благород­ст­во недостойнѣ обезчестити.
14:43	Скорости же ради подвига несмертна язва бысть, и народомъ внутрь дверiй врѣяв­шымся, востекъ дерзостно на стѣну, сверже самъ себе муже­с­т­вен­но на народы.
14:44	Онымъ же скоро разбѣгшымся и быв­шу разстоянiю, паде срединою чрева посредѣ ихъ:
14:45	еще же дышущь и разжженъ душею, воставъ, крови его потокомъ текущей и тяжчайшымъ ранамъ сущымъ, бѣжащь сквоз­ѣ народы пройде,
14:46	и ставъ на нѣко­емъ камени стремнин­нѣмъ, весьма уже безъ крови бывъ, исторгнувъ внутрен­няя [своя] и вземъ обѣма рукама верже на народы: и при­­звавъ владѣющаго животомъ и духомъ, да сiя ему паки воз­дастъ, и симъ образомъ животъ сконча.