Деяния святых Апостолов, глава 25

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) Рус. (еп. Кассиан) Беларускi Українська English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 25
25:1	Фистъ же убо прiимь власть, по трiехъ днехъ взыде во Иерусалимъ от­ Кесаріи.
25:2	Сказаша же ему архiерее и первiи от­ Иудей на Павла и моляху его,
25:3	просяще благодати нань, яко да послетъ его во Иерусалимъ, ковъ творяще, яко да убiютъ его на пути.
25:4	Фистъ же повелѣ Павла стрещи въ Кесаріи, самъ тамо хотя вскорѣ изыти:
25:5	иже убо сильнiи въ васъ, рече, со мною шедше, аще есть кая неправда въ мужи семъ, да глаголютъ нань.
25:6	Пребывъ же у нихъ не множае десяти дній, сниде въ Кесарію: на утрiе сѣдъ на судищи, повелѣ Павла при­­вести.
25:7	Приведену же быв­шу ему, окрестъ сташа иже от­ Иерусалима сшедшiи Иудее, многи и тяжки вины при­­носяще на Павла, ихже не можаху изъявити:
25:8 См.: 🔗Деян. 24:12 🔗Деян. 28:17	от­вѣщавающу ему, яко ни на законъ Иудейскiй, ни на церковь, ни на кесаря что согрѣшихъ.
25:9	Фистъ же хотя угодное Иудеемъ сотворити, от­вѣщавъ Павлови рече: хощеши ли, во Иерусалимъ воз­шедъ, тамо о сихъ судъ прiяти от­ мене?
25:10	Рече же Павелъ: на судищи кесаревѣ стоя есмь, идѣже ми достоитъ судъ прiяти: Иудей ни чимже обидѣхъ, якоже и ты добрѣ вѣси:
25:11 См.: 🔗Деян. 28:18	аще бо неправдую или достойно смерти сотворихъ что, не от­мещуся умрети: аще ли же ничтоже есть во мнѣ, еже сіи на мя клевещутъ, никтоже мя можетъ тѣмъ выдати: кесаря нарицаю.
25:12	Тогда Фистъ состязався съ совѣтники, от­вѣща: кесаря ли нареклъ еси? Къ кесарю пойдеши.
25:13	Днемъ же минув­шымъ нѣкимъ, Агриппа царь и Верникіа снидоста въ Кесарію цѣловати Фиста.
25:14	[Зач. 48.] И якоже многи дни пребыста ту, Фистъ сказа царю яже о Павлѣ, глаголя: мужъ нѣкiй есть оставленъ от­ Филикса узникъ,
25:15 См.: 🔗Деян. 24:1	о немже, быв­шу ми во Иерусалимѣ, явиша архiерее и старцы Иудейстiи, просяще нань суда.
25:16	Къ нимже от­вѣщахъ, яко нѣсть обычай Римляномъ выдати человѣка ко­его на погибель, прежде даже оклеветаемый не имать предъ лицемъ клевещущихъ его и мѣсто от­вѣта прiиметъ о сво­емъ согрѣшенiи.
25:17	Сшедшымся же имъ здѣ, закоснѣнiе ни едино сотворь, на утрiе сѣдъ на судищи, повелѣхъ при­­вести мужа.
25:18	Окрестъ же его став­ше клеветницы, ни едину вину, яже азъ непщевахъ, нанесоша:
25:19 См.: 🔗Деян. 18:15	стязанiя же нѣкая о сво­ей различнѣй вѣрѣ имяху къ нему и о нѣко­емъ Иисусѣ умершемъ, Егоже глаголаше Павелъ жива быти.
25:20	Недо­умѣяся же азъ о взысканiи сихъ, глаголахъ, аще хощетъ ити во Иерусалимъ и тамо судъ прiяти о сихъ.
25:21	Павлу же нарекшу блюдену быти ему до разсужденiя Августа, повелѣхъ блюсти его, дондеже послю его къ кесарю.
25:22	Агриппа же къ Фисту рече: хотѣлъ быхъ и самъ человѣка сего слышати. Онъ же рече: утрѣ услышиши его.
25:23	На утрiе же при­­шедшу Агриппѣ и Верникіи со многою гордостiю и в­шедшымъ въ судебную палату съ тысящники и съ нарочитыми мужи града, и повелѣв­шу Фисту, при­­веденъ бысть Павелъ.
25:24 См.: 🔗Деян. 22:22 🔗Деян. 24:5	И рече Фистъ: Агриппо царю и вси сущiи съ нами мужiе, видите сего, о немже все множе­с­т­во Иудей стужаху ми во Иерусалимѣ же и здѣ, вопiюще, яко не подобаетъ жити ему ктому:
25:25 См.: 🔗Деян. 23:9	азъ же разумѣвъ ничтоже достойно смерти сотворша его, и самому же сему нарекшу Севаста, судихъ послати его:
25:26	о немже извѣстное что писати господину не имамъ: тѣмже и при­­ведохъ его предъ васъ, наипаче же предъ тя, Агриппо царю, яко да разсужденiю быв­шу имамъ что писати:
25:27	безсловесно бо мнит­ся ми, посылающу юзника, а вины, яже нань, не сказати.