Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 50 | |
50:1 См.: 🔗2Мак. 3:4 | Симонъ сынъ оніинъ иерей великiй, иже въ животѣ своемъ сострои домъ и во дни своя утверди церковь. |
50:2 | И тѣмъ основана бысть высота сугуба, воздвиженiе высоко огражденiя церковнаго. |
50:3 | Во дни его умалишася сосуди водніи, ровъ яко моря окруженiе. |
50:4 | Блюдый люди своя от паденiя и укрѣпивый градъ во обсѣденiи. |
50:5 | Коль прославленъ бысть въ сожителствѣ людій, во исходѣ дому катапетасмы? |
50:6 | яко звѣзда утренняя посредѣ облаковъ, аки луна полна во днехъ своихъ, |
50:7 | яко солнце сiяющее на церковь вышняго, и аки дуга свѣтящаяся на облацѣхъ славы: |
50:8 | яко цвѣтъ шипковъ во днехъ весенныхъ, яко кринъ при исходищихъ воды, яко стебло Ливаново во днехъ жатвы: |
50:9 | яко огнь и Ливанъ на огнищи, |
50:10 | якоже сосудъ златъ искованъ, украшенъ всякимъ каменiемъ многоцѣннымъ, |
50:11 | яко маслина износящая плоды и яко кипарисъ возрастаяй до облакъ. |
50:12 См.: 🔗Исх. 28:4 | Внегда взимати ему одежду славы и облачатися ему въ совершенiе хваленiя, въ восхожденiи олтаря святаго прослави одежду святыни. |
50:13 | Внегда же прiимати части от рукъ иерейскихъ, и той стояше при огнищи олтаря: |
50:14 | окрестъ его вѣнецъ братiи, яко прозябенiе кедрско въ Ливанѣ, и окружиша его яко стеблiе финиково: |
50:15 | и вси сынове Аарони во славѣ своей, и приношенiе Господне въ рукахъ ихъ предъ всѣмъ соборомъ Израилевымъ. |
50:16 | И совершенiе служителей на олтарехъ, еже украсити приношенiе вышняго Вседержителя, |
50:17 | простре на чашу возлiянiя руку свою, изгнете от крове гроздныя, возлiя на основанiе олтаря въ воню благоуханiя вышнему всѣхъ Цареви. |
50:18 См.: 🔗Чис. 10:10 | Тогда возопиша сынове Аарони, трубами коваными вострубиша, услышанъ сотвориша гласъ великъ на память предъ вышнимъ. |
50:19 | Тогда вси людiе обще приспѣша и падоша ницы на земли поклонитися Господеви своему Вседержителю Богу вышнему: |
50:20 | и восхвалиша пѣвцы гласы своими, въ велицѣмъ гласѣ усладися пѣнiе: |
50:21 | и помолишася людiе Господу вышнему молитвою предъ милостивымъ, дондеже совершися красота Господня, и службу свою скончаша. |
50:22 См.: 🔗Чис. 6:23 | Тогда сошедъ воздвиже руки своя на весь соборъ сыновъ Израилевыхъ, дати благословенiе Господеви от устенъ своихъ и именемъ его похвалитися. |
50:23 | И повтори поклоненiе прiяти благословенiе от вышняго. |
50:24 См.: 🔗Иоил. 2:21 | И нынѣ благословенiе Бога всѣхъ, велiя творящаго единаго всюду, возносящаго дни нашя от ложеснъ и творящаго съ нами по милости своей: |
50:25 | да дастъ намъ веселiе сердца, и да будетъ миръ во дни нашя во Израили якоже дни вѣка: |
50:26 См.: 🔗3Цар. 8:23 | да увѣритъ съ нами милость свою и во дни своя избавитъ ны. |
50:27 | Два языка омерзѣста души моей, а третiй нѣсть языкъ: |
50:28 См.: 🔗Ин. 4:9 | сѣдящiи на горѣ самарійстѣй и Филистимляне, и людiе буи живущiи въ Сикимѣхъ. |
50:29 | Наказанiе разума и вѣдѣнiя начерта въ книзѣ сей иисусъ сынъ Сираховъ, Иерусалимлянинъ, иже одожди премудрость от сердца своего. |
50:30 | Блаженъ, иже въ сихъ поживетъ, и иже я положитъ въ сердцы своемъ, упремудрится. |
50:31 | Аще бо сотворитъ сiя, ко всѣмъ укрѣпится, яко свѣтъ Господень слѣдъ его. |