|
Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 5 | |
| 5:1 | О знаменiихъ же: се, дніе прiидутъ, въ нихже живущiи на земли обременени будутъ даньми многими, и скрыется путь правды, и будетъ вселенная неплодна от вѣры, |
| 5:2 | и умножится неправда паче сея, юже ты видиши, и паче тоя, о нейже еси слышалъ издревле: |
| 5:3 | и будетъ земля, въ нюже вшедъ нынѣ видиши царствующую, и узрятъ ю опустѣну: |
| 5:4 | аще же тебѣ дастъ вышнiй живу быти, узриши по третiей трубѣ, и возсiяетъ внезапу солнце въ нощи, и луна трижды въ день, |
| 5:5 | и воскаплетъ кровь от древа, и камень дастъ гласъ свой, и поколеблются людiе: |
| 5:6 | и той будетъ царствовати, егоже не надѣются живущiи на земли, и птицы прейдутъ от мѣста своего, |
| 5:7 | и море Cодомское рыбы изринетъ и дастъ гласъ нощiю, егоже мнози не знаша, и вси услышатъ гласъ его: |
| 5:8 | и смятенiе будетъ на мѣстѣхъ мнозѣхъ, и огнь часто низпустится, и звѣрiе польстiи преселятся, и жены болѣзнивыя породятъ щуда, |
| 5:9 | и въ сладкихъ водахъ сланы обрящутся, и друзи вси сами на ся ополчатся: и скрыется тогда умъ, и разумъ отлучится въ хранилище свое, |
| 5:10 | и взыщется от многихъ и не обрящется: неправда же и невоздержанiе умножится на земли, |
| 5:11 | и вопроситъ страна ближнюю свою и речетъ: не прейде ли по тебѣ правда праведнаго творящая? и сего отречется: |
| 5:12 | и будетъ въ то время, и уповати будутъ человѣцы и не воспрiимутъ: трудитися будутъ, и не управятся путiе ихъ. |
| 5:13 | Сiя знаменiя попущено есть мнѣ глаголати къ тебѣ: и аще помолишися паки, и восплачешися, якоже и нынѣ, и попостишися седмь дній, еще болшая сихъ услышиши. |
| 5:14 | И возбнухъ, и тѣло мое устрашися зѣло, и душа моя утрудися, аки бы исчезала. |
| 5:15 | И удержа мя, иже прииде ангелъ, иже глаголаше ко мнѣ, и укрѣпи мя и постави мя на ногахъ. |
| 5:16 | И бысть въ нощь вторую, и прiиде ко мнѣ Салаѳіилъ вождь людемъ и рече мнѣ: гдѣ былъ еси, и вскую лице твое скорбно? |
| 5:17 | или не вѣси, яко тебѣ ввѣренъ есть Израиль во странѣ преселенiя ихъ? |
| 5:18 | востани убо и вкуси хлѣба, и не остави насъ, якоже пастырь стадо свое въ рукахъ волковъ лукавыхъ. |
| 5:19 | И рекохъ ему: иди от мене и не приближайся ко мнѣ. И услыша, якоже рекохъ, и отъиде от мене. |
| 5:20 | И азъ постихся дній седмь стеня и плачя, якоже мнѣ заповѣда урiилъ ангелъ. |
| 5:21 | И бысть по днехъ седмихъ, и паки помышленiя сердца моего трудна бяху мнѣ зѣло: |
| 5:22 | и воспрiя душа моя духъ разума, и паки начахъ глаголати предъ вышнимъ словеса |
| 5:23 | и рѣхъ: О, Владыко Господи! от всѣхъ дубравъ земли и от всѣхъ древесъ ея избралъ еси виноградъ единъ, |
| 5:24 | и от всего круга земнаго избралъ еси себѣ юдоль едину, и от всѣхъ цвѣтовъ вселенныя избралъ еси себѣ кринъ единъ, |
| 5:25 | и от всѣхъ безднъ морскихъ исполнилъ еси себѣ источникъ единъ, и от всѣхъ созданныхъ градовъ освятилъ еси себѣ Сiонъ, |
| 5:26 | и от всѣхъ сотворенiй летающихъ именовалъ еси себѣ голубицу едину, и от всѣхъ сотворенныхъ скотовъ промыслилъ еси себѣ овцу едину, |
| 5:27 | и от всѣхъ умноженныхъ людій взыскалъ еси себѣ народъ единъ, и от всѣхъ искушенъ законъ далъ еси симъ, ихже возлюбилъ еси, людемъ: |
| 5:28 | и нынѣ, Господи, вскую предалъ еси единаго многимъ и уготовалъ еси на единъ корень многи иныя и расточилъ еси единъ твой во многи? |
| 5:29 | и потопташа его, иже противу глаголаша обѣтованиемъ твоимъ и иже твоимъ завѣтомъ не вѣроваху: |
| 5:30 | и аще ненавидящь возненавидѣлъ еси люди твоя, твоими руками долженствуютъ наказатися. |
| 5:31 | И бысть егда глаголахъ словеса, и посланъ есть ангелъ ко мнѣ, иже прежде прiиде ко мнѣ въ прешедшую нощь, |
| 5:32 | и рече ми: послушай мя, и научу тя: и вонми ми, и предложу предъ тобою. |
| 5:33 | И рекохъ: глаголи, господи мой. И рече ко мнѣ: зѣло ты во ужасѣ ума сотворился еси ради Израиля: или паче возлюбилъ еси его, неже сотворивый его? |
| 5:34 | И рѣхъ къ нему: ни, господи, но болящь глаголалъ есмь: мучатъ бо мя лядвiя моя по вся часы ищущаго постигнути стезю вышняго, изслѣдовати часть суда его. |
| 5:35 | И рече ко мнѣ: не можеши. И рекохъ: чесо ради, господи? почто родихся? или вскую не сотворися утроба матере моея мнѣ гробъ, да не видѣлъ быхъ труда Иаковля и изнеможенiя рода Израилева? |
| 5:36 | И рече ко мнѣ: сочти ми сiя, яже еще не прiидоша, и собери ми разсѣянныя капли, и озелени ми сухія цвѣты, |
| 5:37 | и отверзи ми запертая хранилища, и изведи ми заключенныя въ нихъ вѣтры: покажи ми гласа образъ, и тогда покажу ти трудъ, егоже жадаеши видѣти. |
| 5:38 | И рѣхъ: О, Владыко Господи! кто бо есть, иже можетъ сiя вѣдѣти, развѣ той, иже съ человѣки обитанiя не имать? |
| 5:39 | азъ же безуменъ, и како могу глаголати о сихъ, о нихже мене вопросилъ еси? |
| 5:40 | И рече ко мнѣ: якоже не можеши сотворити едино от сихъ, яже глаголана суть, тако не можеши обрѣсти суда моего, или въ конецъ любве, юже людемъ обѣщахъ. |
| 5:41 | И рѣхъ: но се, Господи, ты близъ еси сихъ, иже при концы суть, и что сотворятъ, иже прежде мене быша, или мы, или иже послѣди насъ? |
| 5:42 | И глагола ко мнѣ: вѣнцу уподоблю судъ мой: якоже не послѣднихъ умедленiе, тако ниже первыхъ ускоренiе. |
| 5:43 | И отвѣщахъ и рекохъ: не моглъ ли еси сотворити сихъ, иже сотворени быша, и иже суть, и иже будутъ вкупѣ, дабы скорѣе судъ твой показалъ еси? |
| 5:44 | И отвѣща ко мнѣ и рече: не можетъ ускорити творенiе надъ творца, ниже снести вѣкъ сихъ, иже въ немъ творими суть вкупѣ. |
| 5:45 | И рѣхъ: како реклъ еси рабу твоему, понеже оживляя оживилъ еси от тебе сотвореное творенiе во едино, и сносило творенiе: можетъ и нынѣ носити настоящихъ во едино. |
| 5:46 | И рече ко мнѣ: вопроси ложеснъ женскихъ и речеши къ ней: и аще родиши, вскую по времени? моли убо ю, да родитъ десять во едино. |
| 5:47 | И рекохъ: не можетъ, но по времени. |
| 5:48 | И рече ко мнѣ: и азъ дахъ ложесна земли симъ, иже посѣяни суть на ней по времени: |
| 5:49 | имже бо образомъ младенецъ не родитъ тѣхъ, яже старыхъ суть, тако азъ устроихъ от мене сотвореный вѣкъ. |
| 5:50 | И вопросихъ и рекохъ: понеже уже даеши ми путь, возглаголю предъ тобою: ибо мати наша, о нейже глаголалъ еси мнѣ, еще млада есть, а уже къ старости приближается. |
| 5:51 | И отвѣща ко мнѣ и рече: вопроси тоя, яже родитъ, и речетъ тебѣ. |
| 5:52 | Речеши бо ей: вскую, коихъ родила еси, нынѣ не суть подобни тѣмъ, иже прежде тебе, но менши возрастомъ? |
| 5:53 | И речетъ тебѣ и та: иніи суть, иже въ юности силы рождени суть, и иніи иже подъ время старости оскудѣвающымъ ложеснамъ родишася. |
| 5:54 | Разумѣй убо и ты, яко менши возрастомъ есте от тѣхъ, иже прежде васъ, |
| 5:55 | и иже послѣди васъ, менши неже вы, аки уже старѣющаяся творенiя, и крѣпость юности преминующая. |
| 5:56 | И рекохъ: молю, Господи, аще обрѣтохъ благодать предъ очима твоима, покажи рабу твоему, имже посѣтиши творенiе твое. |
