Книга Иова, глава 40

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) Українська English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 40
40:1	Паки же от­вѣщавъ Господь, рече ко иову изъ облака:
40:2 См.: 🔗Иов. 38:3	ни, но препояши яко мужъ чресла твоя: вопрошу же тя, ты же ми от­вѣщай.
40:3	Не от­вергай суда мо­его: мниши ли мя инако тебѣ сотворша, развѣ да явишися правдивъ?
40:4	Еда мышца ти есть на Господа, или гласомъ на него гремиши?
40:5	Прiими же высоту и силу, въ славу же и въ честь облецыся:
40:6	пусти же ангелы гнѣвомъ и всякаго укорителя смири,
40:7	величава же угаси и согной нечестивыя абiе:
40:8	скрый же въ землю внѣ вкупѣ и лица ихъ безчестiя исполни.
40:9	Исповѣмъ, яко можетъ десница твоя спасти.
40:10	Но убо се, звѣрiе у тебе, траву аки волове ядятъ:
40:11	се убо, крѣпость его на чреслѣхъ, сила же его на пупѣ чрева:
40:12	постави ошибъ яко кипарисъ, жилы же его [яко уже] сплетены суть,
40:13	ребра его ребра мѣдяна, хребетъ же его желѣзо слiяно.
40:14	Сіесть начало созданiя Господня: сотворенъ поруганъ быти ангелы его:
40:15	воз­шедъ же на гору стремин­ную, сотвори радость четвероногимъ въ тартарѣ:
40:16	подъ всякимъ древомъ спитъ, при­­ рогозѣ и тростiи и Ситовiи:
40:17	осѣняютъ же надъ нимъ древеса велика съ лѣторасльми и вѣтви напольныя:
40:18	аще будетъ наводненiе, не ощутитъ: уповаетъ, яко внидетъ Иорданъ во уста его:
40:19	во око свое возметъ его, ожесточився продиравитъ ноздри.
40:20	Извлечеши ли зміа удицею, или обложиши узду о ноздрехъ его?
40:21	или вдѣжеши колце въ ноздри его? шиломъ же провертиши ли устнѣ его?
40:22	воз­глаголетъ же ли ти съ моленiемъ, [или] съ прошенiемъ кротко?
40:23	сотворитъ же ли завѣтъ съ тобою? поймеши же ли его раба вѣчна?
40:24	по­играеши же ли съ нимъ, якоже со птицею, или свяжеши его яко врабiя дѣтищу?
40:25	питают­ся ли же имъ языцы, и раздѣляютъ ли его Финикійстiи народи?
40:26	вся же плава­ю­щая собрав­шеся не подъимутъ кожи единыя ошиба его, и корабли рыбарей главы его.
40:27	Возложиши же ли нань руку, воспомянувъ брань бывающую на тѣлѣ его? и ктому да не будетъ.