Первое послание апостола Павла к Коринфянам, глава 12

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) Рус. (еп. Кассиан) Беларускi Українська English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 12
12:1	О духовныхъ же, братiе, не хощу васъ не вѣдѣти.
12:2 См.: 🔗Еф. 2:12	Вѣсте, яко егда невѣрни бѣсте, ко идоломъ безгласнымъ яко ведоми ведостеся.
12:3 См.: 🔗Мф. 16:17 🔗Мк. 9:39 🔗Флп. 2:11	Тѣмже сказую вамъ, яко никтоже, Духомъ Божiимъ глаголяй, речетъ анаѳема Иисуса, и никтоже можетъ рещи Господа Иисуса, точiю Духомъ Святымъ.
12:4 См.: 🔗Еф. 4:11	Раздѣленiя же дарованiй суть, а тойжде Духъ:
12:5	и раздѣленiя служенiй суть, а тойжде Господь:
12:6	и раздѣленiя дѣй­ст­въ суть, а тойжде есть Богъ, дѣй­ст­вуяй вся во всѣхъ.
12:7 См.: 🔗Мф. 25:15	[Зач. 151.] Комуждо же дает­ся явленiе Духа на пользу:
12:8	овому бо Духомъ дает­ся слово премудрости, иному же слово разума, о томже Дусѣ:
12:9 См.: 🔗Мк. 16:17	другому же вѣра, тѣмже Духомъ: иному же дарованiя исцѣленiй, о томже Дусѣ:
12:10 См.: 🔗Деян. 2:4	другому же дѣй­ст­вiя силъ, иному же пророче­с­т­во, другому же разсужденiя духовомъ, иному же роди языковъ, другому же сказанiя языковъ.
12:11	Вся же сiя дѣй­ст­вуетъ единъ и тойжде Духъ, раздѣляя властiю ко­емуждо якоже хощетъ.
12:12 См.: 🔗Рим. 12:4	[Зач. 152.] Якоже бо тѣло едино есть и уды имать многи, вси же уди единаго тѣла, мнози суще, едино суть тѣло: тако и Христосъ.
12:13 См.: 🔗Мк. 1:8 🔗Гал. 3:28	Ибо единѣмъ Духомъ мы вси во едино тѣло крестихомся, аще Иудее, аще Еллини, или раби, или свободни: и вси единѣмъ Духомъ напо­ихомся.
12:14	Ибо тѣло нѣсть единъ удъ, но мнози.
12:15	Аще речетъ нога, яко нѣсмь рука, нѣсмь от­ тѣла: еда сего ради нѣсть от­ тѣла?
12:16	И аще речетъ ухо, яко нѣсмь око, нѣсмь от­ тѣла: еда сего ради нѣсть от­ тѣла?
12:17	Аще все тѣло око, гдѣ слухъ? Аще [же] все слухъ, гдѣ уханiе?
12:18	Нынѣ же положи Богъ уды, единаго ко­егождо ихъ въ тѣлеси, якоже изволи.
12:19	Аще ли быша вси единъ удъ, гдѣ тѣло?
12:20	Нынѣ же мнози убо удове, едино же тѣло.
12:21	Не можетъ же око рещи руцѣ: не требѣ ми еси: или паки глава ногама: не требѣ ми есте.
12:22	Но много паче, мнящiися уди тѣла немощнѣйши быти, нужнѣйши суть,
12:23	и ихже мнимъ безчестнѣйшихъ быти тѣла, симъ честь множайшую при­­лагаемъ:
12:24	и неблагообразнiи наши благообразiе множайше имутъ, а благообразнiи наши не требѣ имутъ. Но Богъ ра­ст­вори тѣло, худѣйшему болшу давъ честь,
12:25	да не будетъ распри въ тѣлеси, но да тожде въ себѣ [да равно единъ о друзѣмъ] пекут­ся уди.
12:26	И аще страждетъ единъ удъ, съ нимъ страждутъ вси уди: аще ли же славит­ся единъ удъ, съ нимъ радуют­ся вси уди.
12:27 См.: 🔗Еф. 5:23	[Зач. 153.] Вы же есте тѣло Христово, и уди от­ части.
12:28 См.: 🔗Рим. 12:6 🔗Еф. 4:11	И овыхъ убо положи Богъ въ Церкви первѣе апостоловъ, второе пророковъ, третiе учителей: потомъ же силы, таже дарованiя исцѣленiй, заступленiя, правленiя, роди языковъ.
12:29	Еда вси апостоли? Еда вси пророцы? Еда вси учителе? Еда вси силы?
12:30	Еда вси дарованiя имутъ исцѣленiй? Еда вси языки глаголютъ? Еда вси сказуютъ?
12:31	Ревнуйте же дарованiй болшихъ, и еще по превосхожденiю путь вамъ показую.