|
Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 14 | |
| 14:1 | И рече къ нимъ Иудиѳъ: послушайте убо мене, братiя, и вземше главу сiю повѣсите ю на забралѣ стѣны вашея: |
| 14:2 | и будетъ егда возсiяетъ утро, и взыдетъ солнце на землю, прiимете кождо орудiя бранная ваша, и изыдете всякъ мужъ сильный внѣ града, и дадите воеводу надъ ними, аки сходяще на поле ко первѣй стражи сыновъ Ассуровыхъ, и не снидете: |
| 14:3 | и вземше сіи всеоружiя своя, пойдутъ ко ополченiю своему, и возбудятъ воеводы силы Ассуровы, и стекутся ко шатру Олофернову, и не обрящутъ его, и нападетъ на нихъ страхъ, и побѣгнутъ от лица вашего: |
| 14:4 | и возслѣдовавшiи вамъ, и вси живущiи во всемъ предѣлѣ Израилстѣмъ, постилайте я по путемъ ихъ: |
| 14:5 | прежде же еже сотворити сiя, призовите мнѣ Ахiора Амманитина, да видѣвъ познаетъ уничтожающаго домъ Израилевъ, и сего яко на смерть посланнаго къ намъ. |
| 14:6 | И призваша Ахiора изъ дому Озіина. Егда же прiиде и видѣ главу Олофернову въ руцѣ мужа единаго въ собранiи людій, паде на лице, и разслабися духъ его. |
| 14:7 | Егда же подъяша его, припаде къ ногама Иудиѳы, и поклонися лицу ея, и рече: благословена ты во всяцѣмъ селенiи Иудинѣ и во всяцѣмъ языцѣ, иже услышавше имя твое смятутся: |
| 14:8 | и нынѣ возвѣсти ми, елика сотворила еси во днехъ сихъ. И возвѣсти ему Иудиѳъ посредѣ людіи вся, елика сотвори, от негоже дне изыде, дондеже глаголаше имъ. |
| 14:9 | Егда же преста глаголющи, воскликнуша людiе гласомъ великимъ и дадоша гласъ веселый во градѣ своемъ. |
| 14:10 | Видѣвъ же Ахiоръ вся, елика сотвори Богъ Израилевъ, вѣрова Богу зѣло, и обрѣза плоть крайнюю свою, и приложися къ дому Израилеву даже до дне сего. |
| 14:11 | Егда же денница взыде, свѣсиша главу Олофернову со стѣны: и воспрiятъ всякъ мужъ Израилевъ оружiя своя, и изыдоша полками на восходы горы. |
| 14:12 | Сынове же Ассуровы, яко увидѣша ихъ, разослаша къ вождемъ своимъ: они же прiидоша къ воеводамъ и тысящникомъ и ко всякому князю своему, |
| 14:13 | и прiидоша къ шатру Олофернову, и рѣша сущему надъ всѣми его: возбуди убо господина нашего, зане дерзнуша раби сходити къ намъ на брань, да истребятся въ конецъ. |
| 14:14 | И вниде вагоа и толкну во дворъ шатра, мняше бо спати его со Иудиѳою. |
| 14:15 | Егда же никтоже послушаше, растворивъ вниде въ ложницу и обрѣте его при празѣ повержена мертва, и глава его отъята бысть от него: |
| 14:16 | и возопи гласомъ великимъ съ плачемъ и стенанiемъ и воплемъ крѣпкимъ, и раздра ризы своя: |
| 14:17 | и вниде въ шатеръ, идѣже бѣ Иудиѳъ обитающи, и не обрѣте ея, и изскочи къ людемъ и возопи: |
| 14:18 | отвергошася раби, сотвори студъ едина жена Еврейская на домъ царя навуходоносора: зане се, Олофернъ долу, и главы нѣсть на немъ. |
| 14:19 | Егда же услышаша сiя глаголы князiе силы Ассуровы, раздраша ризы своя, и смятеся душа ихъ зѣло, и бысть ихъ крикъ и вопль зѣло посредѣ полка. |
