|
Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 4 | |
| 4:1 | Въ день онъ воспомяну товитъ о сребрѣ, еже вдаде гаваилу въ рагахъ мидійскихъ, |
| 4:2 | и рече въ себѣ: азъ просихъ смерти, что не зову товіи сына моего, да ему объявлю, прежде даже умрети ми? |
| 4:3 | И призвавъ его рече: чадо, аще умру, погреби мя, и да не презираеши матере твоея: чти ю вся дни живота твоего и твори еже угодно ей, и да не опечаляеши ея: |
| 4:4 | помяни, чадо, яко многа бѣдствiя видѣ о тебѣ во чревѣ: егда умретъ, погреби ю при мнѣ во единѣмъ гробѣ: |
| 4:5 | вся дни, чадо, Господа Бога нашего помни, и да не похощеши согрѣшати и преступати заповѣди его: правду твори вся дни живота твоего, и да не ходиши путемъ неправды, |
| 4:6 | зане творящу ти истину благопоспѣшества будутъ въ дѣлѣхъ твоихъ и всѣмъ творящымъ правду: |
| 4:7 | от имѣнiй твоихъ твори милостыню, и да не зазритъ твое око, внегда творити ти милостыню: да не отвращаеши лица твоего от всякаго нищаго, и от тебе не отвратится лице Божiе: |
| 4:8 | якоже тебѣ будетъ по множеству, твори от нихъ милостыню: аще мало тебѣ будетъ, по малому да не боишися творити милостыню: |
| 4:9 | залогъ бо добръ сокровищствуеши тебѣ на день нужды, |
| 4:10 | зане милостыня от смерти избавляетъ и не оставляетъ ити во тму: |
| 4:11 | даръ бо добръ есть милостыня всѣмъ творящымъ ю предъ вышнимъ: |
| 4:12 | внемли себѣ, чадо, от всякаго блудодѣянiя, и жену первѣе поими от сѣмене отецъ твоихъ: да не поймеши жены чуждія, яже нѣсть от племене отца твоего, зане сынове пророковъ есмы: Ное, Авраамъ, Исаакъ, Иаковъ отцы наши от вѣка: помяни, чадо, яко сіи вси пояша жены от братiй своихъ и благословени быша въ чадѣхъ своихъ, и сѣмя ихъ наслѣдитъ землю: |
| 4:13 | и нынѣ, чадо, люби братiю твою и не возносися сердцемъ твоимъ паче братiй твоихъ и сыновъ и дщерей людій твоихъ, пояти тебѣ от нихъ жену, зане въ гордыни погибель и развращенiе много, и въ непотребствѣ умаленiе и убожество велико, ибо непотребство мати есть глада: |
| 4:14 | мзда всякаго человѣка, иже аще работати будетъ у тебе, да не премедлитъ, но отдаждь ему абiе: аще послужиши Богу, воздастся тебѣ: внемли тебѣ, чадо, во всѣхъ дѣлѣхъ твоихъ и буди наказанъ во всемъ житiи твоемъ, |
| 4:15 | и еже ненавидиши, да ни комуже твориши: вина въ пiянство да не пiеши и да не ходитъ съ тобою пiянство въ пути твоемъ: |
| 4:16 | от хлѣба твоего даждь алчущему и от одеянiй твоихъ нагимъ: все, еже аще преизбудетъ тебѣ, твори милостыню, и да не зазритъ твое око, внегда творити ти милостыню: |
| 4:17 | иждивай хлѣбы твоя при гробѣ праведныхъ, грѣшникомъ же да не даси: |
| 4:18 | совѣта у всякаго премудраго ищи, и да не небрежеши о всяцѣмъ совѣтѣ полезнемъ: |
| 4:19 | и на всякое время благослови Господа Бога и от него проси, яко да путiе твои прави будутъ, и вся стези и совѣти твои да благоуспѣютъ, зане всякъ языкъ не имѣетъ совѣта, но самъ Господь даетъ вся благая, и егоже аще восхощетъ, смиряетъ, якоже хощетъ: и нынѣ, чадо, помяни заповѣди моя, и да не изгладятся от сердца твоего: |
| 4:20 | и нынѣ объявляю тебѣ десять талантъ сребра, яже вдахъ гаваилу сыну гавріину въ рагахъ мидійскихъ: |
| 4:21 | и не бойся, чадо, яко обнищахомъ: суть тебѣ многа, аще убоишися Бога и отступиши от всякаго грѣха и сотвориши, еже угодно предъ нимъ. |
