Евангелие от Луки, глава 22

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) Рус. (еп. Кассиан) Беларускi Українська English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 22
22:1 См.: 🔗Мф. 26:2 🔗Мк. 14:1	Приближа­шеся же праздникъ опрѣснокъ, глаголемый Пасха:
22:2	и искаху архiерее и книжницы, како бы убили Его: бояхуся бо людей.
22:3 См.: 🔗Мф. 26:14	Вниде же сатана во Иуду нарицаемаго Искарiотъ, суща от­ числа обою­на­де­ся­те.
22:4	И шедъ глагола архiереомъ и во­еводамъ, како Его предастъ имъ.
22:5	И воз­радовашася, и совѣщаша ему сребреники дати:
22:6	и исповѣда {обѣщася}, и иска­ше удобна времене, да предастъ Его имъ безъ народа.
22:7 См.: 🔗Втор. 16:1 🔗Мф. 26:17 🔗Мк. 14:12	Прiиде же день опрѣсноковъ, въ онъ же подоба­ше жрети пасху:
22:8	и посла Петра и Иоан­на, рекъ: шедша уготовайта намъ пасху, да ямы.
22:9	Она же рекоста Ему: гдѣ хощеши уготоваемъ?
22:10	Онъ же рече има: се восходящема вама во градъ, срящетъ вы человѣкъ въ скудельницѣ воду нося: по немъ идѣта въ домъ, въ онъ же входитъ,
22:11	и рцѣта дому владыцѣ: глаголетъ тебѣ Учитель: гдѣ есть обитель, идѣже пасху со ученики Мо­ими снѣмъ?
22:12	И той вама покажетъ горницу велiю постлану: ту уготовайта.
22:13	Шедша же обрѣтоста, якоже рече има: и уготоваста пасху.
22:14 См.: 🔗Мф. 26:20 🔗Мк. 14:18 🔗Ин. 13:12	И егда бысть часъ, воз­леже, и оба­на­де­ся­те апостола съ Нимъ.
22:15	И рече къ нимъ: желанiемъ воз­желѣхъ сiю пасху ясти съ вами, прежде даже не прiиму мукъ:
22:16 См.: 🔗Деян. 10:41	глаголю бо вамъ, яко от­селѣ не имамъ ясти от­ нея, дондеже скончают­ся во Цар­ст­вiи Божiи.
22:17	И прiимъ чашу, хвалу воз­давъ, рече: прiимите сiю, и раздѣлите себѣ:
22:18	глаголю бо вамъ, яко не имамъ пити от­ плода лознаго, дондеже Цар­ст­вiе Божiе прiидетъ.
22:19 См.: 🔗Мф. 26:26 🔗Мк. 14:22 🔗1Кор. 11:24	И прiимъ хлѣбъ, хвалу воз­давъ преломи, и даде имъ, глаголя: сiе есть Тѣло Мое, еже за вы даемо: сiе творите въ Мое воспоминанiе.
22:20	Такожде же и чашу по вечери, глаголя: сiя чаша Новый Завѣтъ Мо­ею Кровiю, яже за вы проливает­ся:
22:21 См.: 🔗Пс. 40:10 🔗Мф. 26:22	обаче се, рука предающаго Мя со Мною [есть] на трапезѣ,
22:22 См.: 🔗Деян. 2:23 🔗Деян. 4:28	и Сынъ убо Человѣческiй идетъ по речен­ному {по предуставлен­ному совѣту}: обаче горе человѣку тому, имже предает­ся.
22:23	И тіи начаша искати въ себѣ, который убо от­ нихъ хощетъ сiе сотворити.
22:24	Бысть же и пря въ нихъ, кій мнит­ся ихъ быти болiй.
22:25	Онъ же рече имъ: царiе языкъ господ­ст­вуютъ ими, и обладающiи ими благодателе нарицают­ся.
22:26	Вы же не тако: но болiй въ васъ, да будетъ яко мній: и старѣй, яко служай.
22:27 См.: 🔗Флп. 2:7	Кто бо болiй, воз­лежай ли, или служай? Не воз­лежай ли? Азъ же посредѣ васъ есмь яко служай.
22:28	Вы же есте пребыв­ше со Мною въ напастехъ Мо­ихъ:
22:29	и Азъ завѣщаваю вамъ, якоже завѣща Мнѣ Отецъ Мой, Цар­ст­во,
22:30 См.: 🔗Мф. 19:28 🔗1Кор. 6:2 🔗Отк. 3:21 🔗Отк. 20:4	да ясте и пiете на трапезѣ Мо­ей во Цар­ст­вiи Мо­емъ: и сядете на престолѣхъ, судяще обѣма­на­де­ся­те колѣнома Израилевома.
22:31 См.: 🔗1Пет. 5:8	Рече же Господь: Симоне, Симоне, се сатана проситъ васъ, да бы сѣялъ, яко пшеницу:
22:32 См.: 🔗Мф. 16:18 🔗Ин. 17:15	Азъ же молихся о тебѣ, да не оскудѣетъ вѣра твоя: и ты нѣкогда обращься утверди братiю твою.
22:33	Онъ же рече Ему: Господи, съ Тобою готовъ есмь и въ темницу и на смерть ити.
22:34 См.: 🔗Мф. 26:34 🔗Мк. 14:30 🔗Ин. 13:38	Онъ же рече: глаголю ти, Петре, не воз­гласитъ пѣтель днесь, дондеже трикраты от­вержешися Мене не вѣдѣти.
22:35 См.: 🔗Мф. 10:9 🔗Мк. 6:8 🔗Лк. 9:3 🔗Лк. 10:4	И рече имъ: егда послахъ вы безъ влагалища и безъ мѣха и безъ сапогъ, еда чесого лишени бысте? Они же рѣша: ничесоже.
22:36	Рече же имъ: но нынѣ иже имать влагалище, да возметъ, такожде и мѣхъ: а иже не имать, да продастъ ризу свою, и купитъ ножъ.
22:37 См.: 🔗Ис. 53:12 🔗Мк. 15:28	Глаголю бо вамъ, яко еще писаное се, подобаетъ, да скончает­ся о Мнѣ, еже: и со беззакон­ными вмѣнися. Ибо еже о Мнѣ, кончину имать.
22:38	Они же рѣша: Господи, се ножа здѣ два. Онъ же рече имъ: доволно есть.
22:39 См.: 🔗Мф. 26:36 🔗Мк. 14:32 🔗Ин. 18:1	[Зач. 109.] И изшедъ иде по обычаю въ гору Елеонскую: по Немъ же идоша ученицы Его.
22:40 См.: 🔗Мф. 26:41 🔗Мк. 14:38	Бывъ же на мѣстѣ, рече имъ: молитеся, да не внидете въ напасть.
22:41	И Самъ от­ступи от­ нихъ яко верженiемъ камене, и поклонь колѣна моляшеся,
22:42	глаголя: Отче, аще волиши мимонести чашу сiю от­ Мене: обаче не Моя воля, но Твоя да будетъ.
22:43	Явися же Ему Ангелъ съ небесе, укрѣпляя Его.
22:44	И бывъ въ подвизѣ, при­­лѣжнѣе моляшеся: бысть же потъ Его яко капли крове каплющыя на землю.
22:45	И воставъ от­ молитвы [и] при­­шедъ ко ученикомъ, обрѣте ихъ спящихъ от­ печали
22:46	и рече имъ: что спите? Востав­ше молитеся, да не внидете въ напасть.
22:47 См.: 🔗Мф. 26:47 🔗Мк. 14:43 🔗Ин. 18:3	Еще же Ему глаголющу, се народъ, и нарицаемый Иуда, единъ от­ обою­на­де­ся­те, идяше предъ ними, и при­­ступи ко Иисусови цѣловати Его. Сiе бо бѣ знаменiе далъ имъ: Егоже аще лобжу, Той есть.
22:48	Иисусъ же рече ему: Иудо, лобзанiемъ ли Сына Человѣческаго предаеши?
22:49	Видѣв­ше же, иже бѣху съ Нимъ, бываемое, рѣша Ему: Господи, аще ударимъ ножемъ?
22:50	И удари единъ нѣкiй от­ нихъ архiереова раба, и урѣза ему ухо десное.
22:51	Отвѣщавъ же Иисусъ рече: оставите до сего. И коснувся уха его, исцѣли его.
22:52	Рече же Иисусъ ко при­­шедшымъ Нань архiереомъ и во­еводамъ церковнымъ и старцемъ: яко на разбойника ли изыдосте со оружiемъ и дрекольми яти Мя?
22:53	По вся дни сущу Ми съ вами въ церкви, не простросте руки на Мя: но се есть ваша година и область темная.
22:54 См.: 🔗Мф. 26:57 🔗Мк. 14:53 🔗Ин. 18:24	Емше же Его ведоша, и введоша Его во дворъ архiереовъ. Петръ же вослѣдъ идяше издалеча.
22:55	Возгнѣщшымъ же огнь посредѣ двора и вкупѣ сѣдящымъ имъ, сѣдяше Петръ посредѣ ихъ.
22:56	Узрѣв­ши же его рабыня нѣкая сѣдяща при­­ свѣтѣ {огни}, и воз­зрѣв­ши нань, рече: и сей съ Нимъ бѣ.
22:57	Онъ же от­вержеся Его, глаголя: жено, не знаю Его.
22:58	И помалѣ другій видѣвъ его, рече: и ты от­ нихъ еси. Петръ же рече: человѣче, нѣсмь.
22:59	И мимошедшу яко часу единому, инъ нѣкiй крѣпляшеся глаголя: во­истин­ну и сей съ Нимъ бѣ: ибо Галилеанинъ есть.
22:60	Рече же Петръ: человѣче, не вѣмъ, еже глаголеши. И абiе, еще глаголющу ему, воз­гласи пѣтель.
22:61 См.: 🔗Мф. 26:34 🔗Мк. 14:30 🔗Ин. 13:38	И обращься Господь воз­зрѣ на Петра: и помяну Петръ слово Господне, якоже рече ему, яко прежде даже пѣтель не воз­гласитъ, от­вержешися Мене трикраты.
22:62	И изшедъ вонъ, плакася горько.
22:63 См.: 🔗Мф. 26:67 🔗Мк. 14:65	И мужiе держащiи Иисуса ругахуся Ему, бiюще:
22:64	и закрыв­ше Его, бiяху Его по лицу, и вопрошаху Его, глаголюще: прорцы, кто есть ударей Тя?
22:65	И ина многа хуляще глаголаху Нань.
22:66 См.: 🔗Пс. 2:2 🔗Мф. 27:2 🔗Мк. 15:1 🔗Ин. 18:28	И яко бысть день, собрашася старцы людстіи и архiерее и книжницы, и ведоша Его на сонмъ свой,
22:67	глаголюще: аще Ты еси Христосъ? Рцы намъ. Рече же имъ: аще вамъ реку, не имете вѣры:
22:68	аще же и вопрошу [вы], не от­вѣщаете Ми, ни от­пустите:
22:69 См.: 🔗Пс. 109:1 🔗Дан. 7:13 🔗Мф. 26:64 🔗Мк. 14:62 🔗Ин. 6:62	от­селѣ будетъ Сынъ Человѣческiй сѣдяй одесную силы Божiя.
22:70	Рѣша же вси: Ты ли убо еси Сынъ Божiй? Онъ же къ нимъ рече: вы глаголете, яко Азъ есмь.
22:71	Они же рѣша: что еще требуемъ свидѣтел­ст­ва? Сами бо слышахомъ от­ устъ Его.