Вторая книга Маккавейская, глава 11 неканонич.

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 11
11:1	По малѣ же весьма времени лисіа, намѣст­никъ царевъ и сродникъ и къ дѣломъ при­­ставникъ, зѣло тяжцѣ снося быв­шая,
11:2	собравъ аки осмьдесятъ тысящъ и кон­ники вся, прiиде на Иудеевъ, помышляя убо градъ еллиномъ обиталище,
11:3	храмъ же среброданенъ сотворити, якоже и прочiихъ языкъ капища, и по вся лѣта продавати архiерей­ст­во,
11:4	никакоже помышляя Божiю державу, безумно уповая на тьмы пѣшцевъ и на тысящы кон­никовъ и на осмьдесятъ слоновъ.
11:5	Вшедъ же во Иудею и при­­ближився ко веѳсурѣ, къ мѣсту убо крѣпкому сущу, от­ Иерусалима же от­стоящему яко стадiй пять, сiе утѣсняше.
11:6	Егда же позна маккавей и иже съ нимъ рату­ю­ща его твердыни, съ плачемъ и слезами моляху Господа со всѣмъ народомъ, благаго ангела послати ко спасенiю Израиля.
11:7	Самъ же маккавей первый взявъ оружiе увѣщава­ше прочихъ вкупѣ съ нимъ бѣд­ст­во подъяти, еже помогати братiи сво­ей: вкупѣ же и со усердiемъ устремишася.
11:8	Тамо же, и близъ Иерусалима сущымъ, явися предводяй ихъ кон­никъ во одежди бѣлѣ всеоружiе златое потрясающь.
11:9	Вкупѣ же вси благословиша милосердаго Бога и укрѣпишася душами, не точiю человѣковъ, но и звѣрей лютѣйшихъ и стѣны желѣзны сокрушати суще готови,
11:10	идяху во устро­енiи съ небесе споборника имѣюще, милу­ю­щу ихъ Господу:
11:11	львообразно же устрѣмив­шеся на супостаты, положиша от­ нихъ едино­на­де­сять тысящъ пѣшцевъ, кон­никовъ же тысящу и шесть сотъ,
11:12	всѣхъ же понудиша бѣжати: мнози же от­ нихъ язвени нази уцѣлѣша, и самъ лисіа студно бѣжавъ спасеся.
11:13	Не безъ ума же сый, размышляя въ себѣ быв­шее на себе пораженiе и уразумѣвъ непобѣдимыхъ быти Евреовъ, всемогущему Богу спобор­ст­ву­ю­щему имъ, пославъ
11:14	увѣщава­ше, яко имать при­­миритися во всѣхъ праведныхъ и яко совѣтуя преклонитъ и царя, да будетъ имъ другъ.
11:15	Со­изволи же маккавей о всѣхъ, о нихже лисіи моляше, о полезныхъ радящь: елика бо маккавей даде лисіа на писмѣ о Иудеехъ, со­изволи царь.
11:16	Бѣша бо писанiя Иудеемъ посланая от­ лисіи, имущая образъ сицевъ, лисіа множе­ст­ву Иудейску радоватися:
11:17	Иоан­нъ и Авессаломъ, иже послани суть от­ васъ, дающа написан­ный от­вѣтъ, прошаста о назнаменан­ныхъ въ немъ:
11:18	елика убо подоба­ше царю предложити, извѣстихъ, и яже бяху прiятна, со­изволи:
11:19	аще убо въ дѣлѣхъ вѣрность соблюдете, то и въ прочее покушуся виновенъ вамъ быти благихъ:
11:20	о сихъ же подробну заповѣдахъ сима и послан­нымъ от­ мене побесѣдовати съ вами:
11:21	здрав­ст­вуйте. Лѣта сто четыредесять осмаго, [месяца] Дiоскоринѳiа, дне двадесять четвертаго.
11:22	Царское же посланiе содержа­ше сiя: царь Антiохъ лисіи брату радоватися:
11:23	отцу на­шему въ боги премѣньшуся, мы хотяще во цар­ст­вiи сущихъ безмятежныхъ быти и о сво­ихъ при­­лѣжати,
11:24	слышахомъ иудей не соблаговоляющихъ отца мо­его повелѣнiю, еже премѣнитися имъ на еллинскiя законы, но изволяющихъ держати своя заповѣди и того ради молящихъ, да даруют­ся имъ закон­ная ихъ:
11:25	хотяще убо и сему языку безъ мятежа быти, судихомъ и храмъ имъ воз­вратити и жити по прародитель­скимъ ихъ обычаемъ:
11:26	благо убо сотвориши, аще послеши къ нимъ и десницу даси, яко да познав­ше на­ше про­изволенiе, благодушни будутъ и безпечально пребудутъ ко сво­ему охраненiю.
11:27	Ко Иудеомъ же царское посланiе сицево бѣ: царь Антiохъ старѣйшинамъ иудейскимъ и прочымъ Иудеомъ радоватися:
11:28	аще здрав­ст­вуете, да будетъ якоже хощемъ, и сами здрав­ст­вуемъ:
11:29	изъяви намъ менелай, яко хощете от­шедше быти съ вашими:
11:30	при­­ходящымъ убо даже до дне тридесятаго месяца занѳика, дадимъ десницу безъ опасенiя:
11:31	еже употребляти Иудеомъ сво­ихъ бра­шенъ и законовъ, якоже и прежде, и ни единъ имъ ни по единому образу стужити имать о содѣян­ныхъ въ невѣдѣнiи:
11:32	послахомъ же и менелаа имущаго утѣшити васъ:
11:33	здрав­ст­вуйте. Лѣта сто четыредесять осмаго, ксанѳика [месяца], пятаго­на­де­сять дне.
11:34	Послаша же и римляне къ нимъ посланiе имѣющее сiя: квинтъ меммiй и титъ манлiй, старѣйшины римстiи, людемъ иудейскимъ радоватися:
11:35	о нихже лисіа сродникъ царевъ со­изволи вамъ, и мы соблаговоляемъ:
11:36	а яже суди предложити царю, скорѣе послите кого созирающе о сихъ, да уставитъ, якоже подобаетъ вамъ, мы бо идемъ ко Антiохіи:
11:37	сего ради ускорите и послите нѣкiихъ, да и мы увѣмы, ко­ея есте мысли:
11:38	здрав­ст­вуйте. Лѣта сто четыредесять осмаго, пятаго­на­де­сять дне [месяца] ксанѳика.