Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 3 | |
3:1 См.: 🔗Втор. 24:4 | Аще отпуститъ мужъ жену свою, и отъидетъ от него и будетъ мужу иному, еда возвращающися возвратится къ нему паки? еда непорочна будетъ и неосквернена жена та? Ты же соблудила еси съ пастырьми многими, и возвращалася еси {Евр.: обаче обратися.} ко мнѣ, глаголетъ Господь. |
3:2 См.: 🔗Иез. 16:24 | Воздвигни очи твои на правоту и виждь, гдѣ не смѣсилася еси? На путехъ сидѣла еси аки врана особящаяся и осквернила еси землю въ любодѣянiихъ и въ лукавствѣхъ твоихъ, |
3:3 | и имѣла еси пастырей многихъ въ претыканiе себѣ {Евр.: сея ради вины удержаны суть капли дождевныя, и дождь вечернiй не бысть.}: лице жены блудницы бысть тебѣ, не хотѣла еси постыдѣтися ко всѣмъ. |
3:4 См.: 🔗Мф. 6:9 🔗Иез. 16:43 | Не аки ли домомъ мене нарекла еси и Отцемъ и вождемъ дѣвства твоего? |
3:5 | еда пребудетъ во вѣкъ, или сохранится въ побѣду? Сiя глаголала еси, и сотворила еси злая, и возмогла еси. |
3:6 См.: 🔗Иер. 2:20 | И рече Господь ко мнѣ во дни Иосіи царя: видѣлъ ли еси, яже сотвори ми домъ Израилевъ? поидоша на всяку гору высоку и подъ всяко древо листвяно и соблудиша тамо. |
3:7 См.: 🔗Иез. 16:46 🔗Иез. 23:2 | И рекохъ по внегда прелюбодѣйствовати ему во всѣхъ сихъ: ко мнѣ обратися. И не обратися. И видѣ преступленiе его преступница Иудеа сестра его. |
3:8 См.: 🔗Иез. 23:11 | И видѣхъ, яко от всѣхъ [изобличенъ есть], въ нихже ятъ бысть, въ нихже любодѣйствова домъ Израилевъ: сего ради отпустихъ и и дахъ ему книгу распустную въ руцѣ его. Обаче не убояся преступница Иудеа [сестра его], но иде и соблудила есть и та: |
3:9 См.: 🔗Иер. 2:27 | и бысть ни во что блудъ ея, и оскверни землю, и соблудила есть съ каменемъ и со древомъ. |
3:10 | И во всѣхъ сихъ не обратися ко мнѣ преступница сестра ея Иудеа от всего сердца своего, но во лжи, рече Господь. |
3:11 См.: 🔗Иез. 16:52 | И рече Господь ко мнѣ: оправда душу свою отступница Израиль, паче преступницы Иудеи: |
3:12 | иди, и прочти словеса та къ сѣверу, и речеши: обратися ко мнѣ, доме Израилевъ, рече Господь: и не утвержду лица моего на васъ, яко милостивъ азъ есмь, рече Господь, и не прогнѣваюся на вы во вѣки. |
3:13 См.: 🔗Ис. 57:5 | Обаче вѣждь беззаконiе твое, яко въ Господа Бога твоего преступила еси, и расточила еси пути твоя чуждимъ подъ всякимъ древомъ листвянымъ, гласа же моего не послушала еси, рече Господь. |
3:14 См.: 🔗Ис. 31:6 | Обратитеся, сынове отступившiи, глаголетъ Господь: яко азъ возобладаю вами и поиму вы единаго от града и двухъ от племене, и введу васъ въ Сiонъ |
3:15 См.: 🔗Иер. 23:4 | и дамъ вамъ пастыри по сердцу моему, и упасутъ васъ разумомъ и ученiемъ. |
3:16 | И будетъ, егда умножитеся и возрастете на земли, глаголетъ Господь, во дни оны не рекутъ ктому: кивотъ завѣта святаго Израилева: не взыдетъ на сердце, ни воспомянется, ниже посѣтится, ниже сотворится ктому. |
3:17 См.: 🔗Ис. 2:2 | Во дни оны нарекутъ Иерусалима престолъ Господень, и соберутся къ нему вси языцы во имя Господне во Иерусалимъ, и не пойдутъ ктому вслѣдъ похотей сердца своего злѣйшаго. |
3:18 См.: 🔗Ос. 1:11 🔗Иер. 31:8 | Во днехъ тѣхъ прiидетъ домъ Иудинъ ко дому Израилеву, и пойдутъ вкупѣ от земли сѣверныя и от всѣхъ странъ къ земли, юже дахъ въ наслѣдiе отцемъ ихъ. |
3:19 | Азъ же рѣхъ: да будетъ, Господи, яко положу тя въ чада и дамъ тебѣ землю избранную, достоянiе Бога Вседержителя языковъ: и рекохъ: Отцемъ наречете мя и от мене не отвратитеся. |
3:20 См.: 🔗Иер. 2:8 | Обаче якоже отвергается жена сожителя своего, тако отвержеся от мене домъ Израилевъ, рече Господь. |
3:21 | Гласъ изъ устенъ слышанъ бысть плача и моленiя сыновъ Израилевыхъ, яко беззаконноваша въ путехъ своихъ, забыша Господа Бога святаго своего. |
3:22 См.: 🔗Ос. 3:5 | Возвратитеся, сынове возвращающiися, и исцѣлю сокрушенiя ваша. Се, раби мы будемъ тебѣ, ты бо еси Господь Богъ нашъ. |
3:23 См.: 🔗Пс. 120:1 | Истинно лживи быша холми и множество горъ, токмо Господемъ Богомъ нашимъ спасенiе Израилево. |
3:24 См.: 🔗Ос. 4:19 | Студъ же пояде труды отецъ нашихъ, от юности нашея, овцы ихъ и телцы ихъ, и сыны ихъ и дщери ихъ. |
3:25 См.: 🔗Иер. 14:7 | Уснухомъ въ постыдѣнiи нашемъ, и покры насъ безчестiе наше, яко Господу Богу нашему согрѣшихомъ, мы и отцы наши, от юности нашея даже до сего дне, и не послушахомъ гласа Господа Бога нашего. |