Книга Есфири, глава 2

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) Українська English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 2
2:1	И по словесѣхъ сихъ утолися царь от­ гнѣва, и не воспомяну ктому Астини, воспоминая, елика глагола и како осуди ея.
2:2	И рѣша слуги царевы: да изыщут­ся царю дѣвицы нерастлѣн­ны, красны зракомъ, и да поставитъ царь взыскатели во всѣхъ странахъ цар­ст­вiя сво­его,
2:3	и да изберутъ отроковицъ дѣв­с­т­вен­ныхъ доброзрачныхъ въ сусы градъ, въ чертогъ женскiй, и да от­дадут­ся евнухови цареву стражу женъ, и да дадут­ся масти и прочыя потребы:
2:4	и жена, юже воз­любитъ царь, да будетъ царицею вмѣсто Астини. И угодно бѣ царю слово, и сотвори тако.
2:5	И мужъ бѣ Иудеанинъ во градѣ сусѣхъ, и имя ему мардохей сынъ Иаировъ, сына семеина, сына кисеова, от­ племене Венiаминя,
2:6 См.: 🔗4Цар. 24:15	иже бяше плѣненъ от­ Иерусарлима навуходоносоромъ царемъ Вавилонскимъ:
2:7	и бяше ему отроковица воспитана, дщерь Аминадава брата отцу его, и имя ей есѳирь. По преставленiи же родителей ея, прiя ю мардохей во дщере мѣсто: и бяше дѣвица красна и доброзрачна.
2:8	И егда услышано бысть повелѣнiе царево, собраны быша дѣвицы многи во градъ сусы, подъ руку гаiеву, и при­­ведена бысть есѳирь ко гаiю хранителю женъ:
2:9	и угодна бысть ему отроковица и обрѣте благодать предъ нимъ: и потщася дати ей масти и участiе, и седмь дѣвицъ при­­стави къ ней изъ дому царева, и снабдѣва­ше ю и рабынь ея добрѣ въ дому женстѣмъ.
2:10	И не повѣда есѳирь рода сво­его, ниже отече­ст­ва, мардохей бо заповѣда ей не воз­вѣщати.
2:11	На всякъ же день хожда­ше мардохей по двору женскому, назирая, что есѳири случит­ся.
2:12	Сiе же бѣ время дѣвицъ входити ко царю, егда исполнят­ся два­на­де­сять месяцей: тако бо наполняхуся дніе украшенiя, шесть месяцъ во ароматѣхъ и въ мастехъ женскихъ, и шесть месяцъ намазующяся смирновымъ елеемъ,
2:13	и тогда вхождаху ко цареви: и емуже аще речетъ при­­вести ю, входитъ съ нимъ купно изъ дому женскаго даже до дому царева:
2:14	на вечеръ вхожда­ше и заутра воз­враща­шеся въ домъ женскiй вторый, идѣже гай евнухъ царевъ хранитель женъ, и не вхожда­ше паки ко царю, аще не будетъ позвана именемъ.
2:15	Егда же исполнися время есѳири дщери Аминадава, брата отца мардохеова, [иже поялъ ю себѣ въ дщере мѣсто,] внити ко цареви, ничтоже преступи от­ сихъ, яже заповѣда ей евнухъ хранитель женъ: бѣ бо есѳирь обрѣтающая благодать предъ всѣми зрящими ю.
2:16	И вниде есѳирь ко царю Артаксерксу во вторый­на­де­сять месяцъ, иже есть Адаръ, въ лѣто седмое цар­ст­ва его.
2:17	И воз­люби царь есѳирь, и обрѣте благодать паче всѣхъ дѣвицъ, и воз­ложи вѣнецъ женскiй на главу ея.
2:18 См.: 🔗Есф. 1:3	И сотвори царь пиръ всѣмъ другомъ сво­имъ и силамъ седмь дній, и воз­несе бракъ есѳиринъ, и сотвори от­раду сущымъ во цар­ст­вiи его.
2:19	Мардохей же служа­ше во дворѣ [царевѣ].
2:20 См.: 🔗Есф. 4:8	Есѳирь же не повѣда рода сво­его, [ни людій сво­ихъ]: сице бо заповѣда ей мардохей боятися Бога и творити заповѣди его, якоже бѣ съ нимъ, есѳирь же не измѣни обычая сво­его.
2:21	И опечалистася два евнуха царева началнѣйшiи стражы тѣла его, яко предпочтенъ бысть мардохей, и искаста убити Артаксеркса царя.
2:22	И воз­вѣстися слово мардохею, и сказа есѳири: она же повѣда царю, яже навѣтуютъ.
2:23 См.: 🔗Есф. 6:2	Царь же испыта дву евнуху, [и исповѣдаста,] и обѣси ихъ. И повелѣ царь вписати на память въ царстѣй книгохранителницѣ о благодѣянiи мардохеовѣ въ похвалу.