Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 2 | |
2:1 | И бысть слово Господне ко мнѣ глаголющее: иди и вопій во ушы Иерусалиму, рекій: сiя глаголетъ Господь: |
2:2 См.: 🔗Иез. 16:8 🔗Ос. 9:10 | помянухъ милость юности твоея и любовь совершенства {Евр.: обрученiя.} твоего, егда послѣдовалъ еси въ пустыни ненасѣяннѣй святому Израилеву, глаголетъ Господь. |
2:3 См.: 🔗Исх. 19:6 🔗Пс. 113:2 | Святъ Израиль Господеви, начатокъ плодовъ его: вси поядающiи его согрѣшатъ, злая прiидутъ на нихъ, рече Господь. |
2:4 | Услышите слово Господне, доме Иаковль и вся племена дому Израилева. |
2:5 См.: 🔗Мих. 6:3 | Сiя глаголетъ Господь: кое обрѣтоша отцы ваши во мнѣ погрѣшенiе, яко удалишася от мене и ходиша вслѣдъ суетныхъ и осуетишася, |
2:6 См.: 🔗Втор. 8:15 | и не рекоша: гдѣ есть Господь, изведый насъ от земли Египетскiя, преведый насъ по пустыни, по земли необитаннѣй и непроходнѣй, по земли безводнѣй и неплоднѣй, по земли, по нейже не ходилъ мужъ никогдаже и не обиталъ человѣкъ тамо? |
2:7 См.: 🔗Втор. 8:1 🔗Лев. 25:23 | И введохъ васъ въ землю кармилъ, да снѣсте плоды его и благая того: и внидосте, и осквернили есте землю мою, и достоянiе мое поставили есте въ мерзость. |
2:8 См.: 🔗Рим. 2:20 | Священницы не рекоша: гдѣ есть Господь? и держащiи законъ не вѣдѣша мя, и пастырiе нечествоваша на мя, и пророцы пророчествоваша въ Ваала и идоломъ послѣдоваша. |
2:9 | Сего ради еще судомъ прѣтися имамъ съ вами, рече Господь, и съ сыны вашими препрюся. |
2:10 См.: 🔗Иер. 18:13 | Того ради прiидите во островы Хеттимъ и видите, и въ Кидаръ послите и разсмотрите прилѣжно и видите, аще сотворена быша таковая? |
2:11 См.: 🔗Рим. 1:23 | аще премѣниша языцы боги своя, и тіи не суть бози? людiе же мои премѣниша славу свою на то, от негоже не упользуются. |
2:12 | Ужасеся небо о семъ и вострепета попремногу зѣло, глаголетъ Господь. |
2:13 | Два бо зла сотвориша людiе мои: мене оставиша источника воды живы, и ископаша себѣ кладенцы сокрушеныя, иже не возмогутъ воды содержати. |
2:14 | Еда рабъ есть Израиль, или домочадецъ есть? вскую бысть въ плѣненiе? |
2:15 | На него рыкаша львове и издаша гласъ свой, иже поставиша землю его въ пустыню, и грады его сожжени суть, еже не обитати въ нихъ. |
2:16 См.: 🔗Ис. 19:13 🔗Ис. 30:4 | И сынове мемфиса и тафны познаша тя и поругашася тебѣ. |
2:17 См.: 🔗Втор. 29:25 🔗3Цар. 9:8 | Не сiя ли сотвори тебѣ то, яко оставилъ еси мене? глаголетъ Господь Богъ твой. |
2:18 | И нынѣ что тебѣ и пути Египетскому, еже пити воду геонскую {Евр.: мутну.}, и что тебѣ и пути Ассирійскому, да пiеши воду рѣчную? |
2:19 | Накажетъ тя отступленiе твое, и злоба твоя обличитъ тя: и увѣждь и виждь, яко зло и горько ти есть, еже оставити мя, глаголетъ Господь Богъ твой: и не благоволихъ о тебѣ, глаголетъ Господь Богъ твой. |
2:20 | Понеже от вѣка сокрушилъ еси иго твое и растерзалъ еси узы твоя и реклъ еси: не имамъ тебѣ служити, но пойду на всякiй холмъ высокiй и подъ всякимъ древомъ лиственнымъ тамо разлiюся въ блудѣ моемъ. |
2:21 | Азъ же насадихъ тя виноградъ плодоносенъ, весь истиненъ: како превратился еси въ горесть, виноградъ чуждій? |
2:22 См.: 🔗Иов. 9:30 | Аще умыешися нитромъ и умножиши себѣ травы бориѳовы, пороченъ еси во беззаконiихъ твоихъ предо мною, рече Господь Богъ. |
2:23 См.: 🔗Иер. 7:32 🔗Иер. 32:35 | Како речеши: не осквернихся и вслѣдъ Ваала не ходихъ? виждь пути твоя на мѣстѣ многогробищнѣмъ и увѣждь, что сотворилъ еси. Въ вечеръ гласъ его рыдаше, |
2:24 | пути своя разшири на воды пустынныя, въ похотехъ души своея вѣтромъ ношашеся, преданъ бысть, кто обратитъ его? вси ищущiи его не утрудятся, во смиренiи его обрящутъ его. |
2:25 См.: 🔗Иер. 18:12 | Отврати ногу твою от пути стропотна и гортань твой от жажди. И рече: возмужаюся, яко возлюби чуждихъ и вслѣдъ ихъ хождаше. |
2:26 | Якоже стыдъ татю, егда ятъ будетъ, тако постыдятся сынове Израилевы, тіи и царiе ихъ, и началницы ихъ и священницы ихъ и пророцы ихъ. |
2:27 | Древу рекоша: яко отецъ мой еси ты: и камени: ты мя родилъ еси: и обратиша ко мнѣ хребты, а не лица своя: и во время озлобленiя своего рекутъ: востани и избави насъ. |
2:28 См.: 🔗Иер. 11:13 | И гдѣ суть бози твои, яже сотворилъ еси тебѣ? да востанутъ и избавятъ тя во время озлобленiя твоего: по числу бо градовъ твоихъ быша бози твои, Иудо, и по числу путій Иерусалимскихъ жряху Ваалу. |
2:29 См.: 🔗Пс. 52:4 | Вскую глаголете ко мнѣ? вси вы нечествовасте и вси вы беззаконновасте ко мнѣ, глаголетъ Господь. |
2:30 | Всуе поразихъ чада ваша, наказанiя не прiясте, мечь пояде пророки вашя, аки левъ погубляяй, и не убоястеся. |
2:31 | Слышите слово Господне, тако глаголетъ Господь: еда пустыня быхъ Израилю, или земля неплодна? вскую рѣша людiе мои: обладаеми не будемъ и потомъ не прiидемъ къ тебѣ? |
2:32 | Еда забудетъ невѣста красоту свою, и дѣва мониста персiй своихъ? людiе же мои забыша мене дни безчисленны. |
2:33 | Что еще добро ухитриши на путехъ твоихъ, еже взыскати любве? Не тако: но и ты лукавновала еси, еже осквернити пути твоя, |
2:34 | и въ рукахъ твоихъ обрѣтеся кровь душъ [убогихъ] неповинныхъ: не въ ровѣхъ обрѣтохъ ихъ, но во всяцѣй дубравѣ. |
2:35 | И рекла еси: неповинна есмь, но да отвратится ярость твоя от мене. Се, азъ суждуся съ тобою, внегда рещи тебѣ: не согрѣшихъ: |
2:36 См.: 🔗2Пар. 28:21 🔗Иер. 2:18 | понеже презрѣла еси зѣло, еже повторити пути твоя: и от Египта постыдишися, якоже постыдѣна еси от Ассура: |
2:37 См.: 🔗2Цар. 13:19 🔗Иер. 32:5 | яко и оттуду изыдеши, и руцѣ твои на главѣ твоей: яко отрину Господь надѣянiе твое, и не благопоспѣшится тебѣ въ немъ. |