Книга Иисуса Навина, глава 9

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) Українська English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 9
9:1 См.: 🔗Нав. 3:10	Егда же услышаша вси царiе Аморрейстiи, иже объ ону страну Иордана, иже въ горнѣй и иже въ равнѣй, и иже во всемъ при­­морiи моря великаго и иже при­­ антиливанѣ, и Хеттеи и Аморреи, и гергесеи и Хананеи, и ферезеи и Евеи и Иевусеи,
9:2	снидошася вкупѣ сѣщися со иисусомъ и со Израилемъ единомыслен­но.
9:3 См.: 🔗2Цар. 2:12 🔗3Цар. 3:4	И живущiи въ холмѣ въ гаваонѣ слышаша вся, елика сотвори Господь иерихону и гаю,
9:4	и сотвориша и сіи съ лукав­ст­вомъ, и шедше уготоваша брашна и уготовашася: и вземше вретища ветха на ослы своя, и мѣхи вина ветхи и разсѣдшыяся завязаны:
9:5	и сапоги ветхи и заплачены на ногу ихъ, и ризы обветшаны на нихъ, и хлѣбы брашна ихъ бѣша пресохли и сплѣснѣли и сдроблени.
9:6 См.: 🔗Нав. 5:9	И прiидоша ко иисусу въ полкъ Израилевъ въ Галгалы, и рекоша ко иисусу и всему Израилю: от­ земли дальнiя прiидохомъ, и нынѣ завѣщайте намъ завѣтъ.
9:7 См.: 🔗Исх. 23:32 🔗Втор. 7:2	И рекоша сынове Израилевы къ Хоррею: виждь, не посредѣ ли насъ живеши, и како тебѣ завѣщаю завѣтъ?
9:8	И рекоша ко иисусу: раби есмы тво­и. И рече къ нимъ иисусъ: от­куду есте? и от­куду прiидосте?
9:9	И рекоша къ нему: от­ дальнiя земли зѣло прiидохомъ раби тво­и во имя Господа Бога тво­его: слышахомъ бо имя его и вся, елика сотвори во Египтѣ,
9:10 См.: 🔗Чис. 21:24	и вся, елика сотвори дво­имъ царемъ Аморрейскимъ, иже быша объ ону страну Иордана, сиону царю есевонску и огу царю Васанску, иже живяше во Астароѳѣ и во едраинѣ.
9:11	И слышав­ше рекоша къ намъ старцы наши и вси живущiи на земли на­шей, глаголюще: воз­мите себѣ брашно на путь и идите противу имъ, и рцыте къ нимъ: раби есмы ваши, и нынѣ завѣщайте намъ завѣтъ:
9:12	сіи хлѣбы наши, теплыя на путь взяхомъ ихъ от­ домовъ нашихъ, въ оньже день изыдохомъ прiити къ вамъ: нынѣ же пресхоша и быша содроблени:
9:13	и сіи мѣси вина, ихже налiяхомъ новы, и сіи разсѣдошася: и ризы нашя сiя и обувища наша обетшаша от­ долгаго пути зѣло.
9:14 См.: 🔗Исх. 25:22 🔗Чис. 27:21 🔗1Цар. 23:9	И взяша князи брашно ихъ, а Господа не вопросиша.
9:15	И сотвори иисусъ съ ними миръ, и устави къ нимъ завѣтъ, еже снабдѣти ихъ: и кляшася имъ князи сонма.
9:16	И бысть по трiехъ днехъ по завѣщанiи къ нимъ завѣта, услышаша, яко близъ ихъ суть и яко посредѣ ихъ живутъ.
9:17 См.: 🔗Нав. 18:25 🔗1Пар. 2:50	И восташа сынове Израилевы и внидоша во грады ихъ въ третiй день: гради же ихъ [бяху] гаваонъ и кефира, и виротъ и градъ Иаримъ.
9:18 См.: 🔗Нав. 11:19	И не сотвориша съ ними рати [иисусъ и] сынове Израилевы, яко кляшася имъ вси князи сонма Господемъ Богомъ Израилевымъ. И ропташа весь сонмъ Израилевъ на князей.
9:19	И рекоша вси князи всему сонму: мы кляхомся имъ Господемъ Богомъ Израилевымъ, и нынѣ не воз­можемъ коснутися ихъ:
9:20 См.: 🔗2Цар. 21:1 🔗3Цар. 9:21	сiе сотворимъ имъ, еже живити ихъ, и снабдимъ ихъ, и не будетъ на насъ гнѣва клятвы ради, еюже кляхомся имъ.
9:21	И рекоша имъ князи: да живутъ сіи, и будутъ древосѣчцы и водоносцы всему сонму. И сотвори весь сонмъ, якоже рекоша имъ князи.
9:22	И созва ихъ иисусъ и рече имъ, глаголя: почто прельстисте мя, глаголюще: далече есмы от­ тебе зѣло? вы же населницы есте от­ живущихъ въ насъ:
9:23 См.: 🔗Неем. 10:28	и нынѣ прокляти есте: и не оскудѣетъ от­ васъ рабъ, ниже древосѣчецъ, ниже водоносецъ мнѣ и Богу мо­ему.
9:24 См.: 🔗Втор. 7:2	И от­вѣщаша иисусу, глаголюще: понеже воз­вѣстися намъ [рабомъ тво­имъ], елика заповѣда Господь Богъ твой Моисею рабу сво­ему, дати вамъ землю сiю и потребити насъ и вся живущыя на ней от­ лица ва­шего, сего ради убояхомся зѣло о душахъ нашихъ от­ лица ва­шего, и сотворихомъ дѣло сiе:
9:25	и нынѣ, се, мы подручни вамъ, якоже угодно есть вамъ, и якоже вамъ мнит­ся, творите намъ.
9:26 См.: 🔗Нав. 11:19	И сотвориша имъ сице: и избави я иисусъ въ той день от­ руку сыновъ Израилевыхъ, и не убиша ихъ.
9:27 См.: 🔗1Пар. 9:2 🔗2Пар. 2:18 🔗1Езд. 8:20	И постави я иисусъ въ той день древосѣчцы и водоносцы всему сонму и олтарю Божiю. Сего ради быша живущiи въ гаваонѣ древосѣчцы и водоносцы олтарю Божiю, даже до днешняго дне, и на мѣстѣ еже аще изберетъ Господь.