Книга Притчей Соломоновых, глава 24

	Язык: Церковнослав. (дореф.) Церковнослав. (гражд.) Церковнослав. (цс.) Рус. (Синодальный) Українська English (NKJV) English (KJV) Srpski Библия на церковно­слявянском языке в дореволюционной (дореформенной) орфографии.
	Глава 24
24:1 См.: 🔗Пс. 36:1 🔗Прит. 23:17	Сыне, не ревнуй мужемъ злымъ, ниже воз­желѣй быти съ ними:
24:2 См.: 🔗Пс. 9:28	лжамъ бо по­учает­ся сердце ихъ, и болѣзни устнѣ ихъ глаголютъ.
24:3	Съ премудростiю зиждет­ся домъ и съ разумомъ исправляет­ся.
24:4	Съ чув­ст­вiемъ исполняют­ся сокровища от­ всякаго богат­ст­ва честнаго и добраго.
24:5	Лучше мудрый крѣпкаго, и мужъ разумъ имѣяй земледѣлца велика.
24:6 См.: 🔗Прит. 20:18	Со управленiемъ бываетъ брань, помощь же съ сердцемъ совѣтнымъ.
24:7 См.: 🔗Прит. 14:6	Премудрость и мысль блага во вратѣхъ премудрыхъ: смыслен­нiи не укланяют­ся от­ закона Господня,
24:8	но совѣтуютъ въ сонмищихъ. Ненаказан­ныхъ срѣтаетъ смерть,
24:9	умираетъ же безумный во грѣсѣхъ. Нечистота мужу губителю:
24:10	осквернит­ся въ день золъ и въ день печали, дондеже оскудѣетъ.
24:11 См.: 🔗Пс. 81:4	Избави ведомыя на смерть и искупи убиваемыхъ, не щади.
24:12 См.: 🔗Иов. 34:11 🔗Пс. 61:13 🔗Иер. 32:19 🔗Рим. 2:6 🔗Отк. 22:12	Аще же речеши: не вѣмъ сего: разумѣй, яко Господь всѣхъ сердца вѣсть, и создавый дыханiе всѣмъ, сей вѣсть всяческая, иже воз­дастъ комуждо по дѣломъ его.
24:13	Яждь медъ, сыне, благъ бо есть сотъ, да насладит­ся гортань твой:
24:14	сице уразумѣеши премудрость душею тво­ею: аще бо обрящеши, будетъ добра кончина твоя, и упованiе не оставитъ тебе.
24:15 См.: 🔗Прит. 1:11	Не при­­води нечестиваго на пажить праведныхъ, ниже прельщайся насыщенiемъ чрева:
24:16 См.: 🔗Пс. 36:24 🔗Ам. 5:2	седмерицею бо падетъ праведный и востанетъ, нечестивiи же изнемогутъ въ злыхъ.
24:17 См.: 🔗Иов. 31:29	Аще падетъ врагъ твой, не обрадуйся ему, въ преткновенiи же его не воз­носися:
24:18	яко узритъ Господь, и не угодно ему будетъ, и от­вратитъ ярость свою от­ него.
24:19 См.: 🔗Пс. 36:1	Не радуйся о злодѣющихъ и не ревнуй грѣшнымъ,
24:20 См.: 🔗Прит. 13:9	не пребудутъ бо внуцы лукавыхъ, свѣтило же нечестивыхъ угаснетъ.
24:21 См.: 🔗Мф. 22:21 🔗1Пет. 2:17 🔗Рим. 13:2	Бойся Бога, сыне, и царя, и ни единому же ихъ противися:
24:22	–Слово сохраняяй сынъ кромѣ погибели будетъ: прiемляй же прiятъ оное.–
24:23	–Ничтоже ложно от­ языка цареви да глаголет­ся, и ни едина лжа от­ языка его да изыдетъ:–
24:24	–мечь [есть] языкъ царевъ, а не плотянъ: и иже аще преданъ будетъ, сокрушит­ся:–
24:25	–аще бо раздражит­ся ярость его, со жилами человѣки губитъ,–
24:26	–и кости человѣческiя поядаетъ и сожигаетъ яко пламень, яко не ядомымъ быти птенцами орлими.–
24:27	–Мо­ихъ словесъ, сыне, бойся, и прiимъ я покайся.
24:28	внезапу бо истяжутъ нечестивыхъ, мученiя же обо­ихъ кто увѣсть?–
24:29 См.: 🔗Прит. 18:5	Сiя же вамъ смыслен­нымъ глаголю разумѣти: срамлятися лица на судѣ не добро.
24:30 См.: 🔗Ис. 5:23	Глаголяй нечестиваго, яко праведенъ есть, проклятъ от­ людій будетъ и воз­ненавидѣнъ во языцѣхъ:
24:31	обличающiи же лучшiи явят­ся, на няже прiидетъ благословенiе благо:
24:32	и устнѣ облобызаютъ от­вѣщающыя словеса блага.
24:33	Уготовляй на исходъ дѣла твоя, и уготовися на село, и ходи вслѣдъ мене, и созиждеши домъ твой.
24:34	Не буди свидѣтель лживъ на тво­его гражданина, ниже пространяйся тво­има устнама.
24:35 См.: 🔗Прит. 17:13	Не рцы: имже образомъ сотвори ми, сотворю ему и от­мщу ему, имиже мя преобидѣ.
24:36	Якоже нива мужъ безумный, и яко виноградъ человѣкъ скудо­умный:
24:37 См.: 🔗Прит. 15:19	аще оставиши его, опустѣетъ и травою порастетъ весь, и будетъ оставленъ, ограды же камен­ныя его раскопают­ся.
24:38	Послѣди азъ покаяхся, воз­зрѣхъ избрати наказанiе:
24:39 См.: 🔗Прит. 6:10	мало дремлю, мало же сплю и мало объемлю рукама перси:
24:40 См.: 🔗Прит. 28:19	аще же сiе твориши, прiидетъ предъидущи нищета твоя и скудость твоя, яко благъ течецъ.